1 Dw 5 - BAEBOLO ANZƐƐ BULUKU NWUANZANWUANZA

Yɛ ewiade ye anwo zo konimlilɛ

¹ Awie biala mɔɔ die di kɛ Gyisɛse a le Mɛzaya ne la le Nyamenle ara, yɛɛ mɔɔ kulo wovolɛ ne la kulo ɔ ra ne noko.

² Saa yɛkulo Nyamenle na yɛdi ye mɛla zo a ɛnee yɛhile kɛ yɛkulo Nyamenle amra ne mɔ noko.

³ Ɔluakɛ saa yɛdi Nyamenle mɛla ne mɔ azo a ɛnee yɛkulo Nyamenle, yɛɛ ye mɛla ne mɔ noko ɛnyɛ ɛnlomboɛ mɔɔ bu sonla kɔme a,

⁴ ɔluakɛ Nyamenle ara biala di ewiade anwo zo konim. Yɛ diedi mɔɔ yɛlɛ ye wɔ Nyamenle anu la azo yɛɛ yɛdua yɛdi ewiade anwo zo konim a.

⁵ Nwane a di ewiade ye anwo zo konim a? Yemɔ a le sonla ne mɔɔ die di kɛ Gyisɛse le Nyamenle Ara la.

Gyisɛse Kelaese anwo daselɛlilɛ

⁶ Gyisɛse Kelaese a le mɔɔ luale ye ɛzɔnenlɛ nzule nee ye ewule mogya zo rale la. Tɛ nzule ngome a ɔluale zo a, ɔluale nzule nee mogya zo. Nyamenle Sunsum ne di daselɛ kɛ ɔle zɔhane, ɔboalekɛ Sunsum ne a le nɔhalɛ ne.

⁷ Alasevolɛ nsa a wɔ ɛkɛ a:

⁸ bɛmɛ a le Nyamenle Sunsum ne, nzule ne, nee mogya ne. Bɛmɛ nsa bɛdi daselɛ na bɛkile debie ko ne ala.

⁹ Saa yɛdie sonla daselɛ yɛto nu a, ɛnee Nyamenle daselɛlilɛ ɛdeɛ ne anu yɛ se kpalɛ, ɔluakɛ Nyamenle daselɛlilɛ ne fane ɔ Ra ne anwo.

¹⁰ Zɔhane ati awie biala mɔɔ die Nyamenle Ara ne di la lɛ daselɛlilɛ ne wɔ ye nu. Awie biala mɔɔ ɛnlie Nyamenle ɛnli la ɛmaa Nyamenle ɛbɔ adalɛ, ɔluakɛ yeanlie daselɛ ne mɔɔ Nyamenle ɛli ye wɔ ɔ Ra ne anwo la yeanli.

¹¹ Daselɛlilɛ ne a le ɛhye: Nyamenle ɛlua ɔ Ra ne anwo zo ɛmaa yɛ ngoane mɔɔ ɛnlɛ awieleɛ la.

¹² Awie biala mɔɔ kɛlie Ralɛ ne la lɛ ngoane, na awie biala mɔɔ anlie Nyamenle Ara ne la ɛnlɛ ngoane.

Ngoane mɔɔ ɛnlɛ awieleɛ la

¹³ Melɛkɛlɛ ɛhye mearɛlɛ bɛ amaa bɛanwu kɛ bɛdabɛ mɔɔ bɛdie Nyamenle Ara ne bɛdi la bɛlɛ ngoane mɔɔ ɛnlɛ awieleɛ la.

¹⁴ Yɛsi pi wɔ Nyamenle anu, yɛɛ yɛdie yɛdi kɛ saa yɛdua ye ɛhulolɛ zo yɛbiza ye debie biala a ɔtie yɛ.

¹⁵ Na kɛmɔ yɛze kɛ yɛbiza ye debie a ɔtie yɛ la ati, eza yɛze kɛ yɛ sa ka mɔɔ yɛbiza yɛfi ye ɛkɛ ne la.

¹⁶ Saa awie nwu adiema bie kɛ ɔlɛyɛ ɛtane mɔɔ ɛndwe ye ɛngɔ ewule nu la a, ɔzɛlɛ ɔmaa ye na Nyamenle kɛmaa adiema ne ngoane. Noko ɛtane ne bie wɔ ɛkɛ mɔɔ wie ewule a. Menga ye kɛ awie ɛzɛlɛ ɛhye anwo.

¹⁷ Nyɛleɛ biala mɔɔ tɔ sinli la le ɛtane, na tɛ ɛtane ne mɔ amuala a wie ewule a.

¹⁸ Yɛze kɛ awie biala mɔɔ le Nyamenle ara la ɛnyɛ ɛtane, ɔluakɛ Nyamenle Ara ne fa ye sie gyɛlɛɛnye mɔɔ Abɔnsam ɛngola ɛnva ɔ sa ɛnga ye a.

¹⁹ Saa bɔbɔ Abɔnsam di ɛtane ewiade ye azo belemgbunli a, yɛze kɛ yɛmɛ yɛle Nyamenle menli.

²⁰ Yɛze kɛ Nyamenle Ara ne ɛra na yeramaa yɛ ndelebɛbo mɔɔ yɛfa yɛnwu nɔhalɛ Nyamenle ne a. Yɛ nee nɔhalɛ Nyamenle ne nee ɔ Ra Gyisɛse Kelaese a lua a. Ɛhye a le nɔhalɛ Nyamenle ne a. Ɛhye a le ngoane ne mɔɔ ɛnlɛ awieleɛ la a.

²¹ Me mra ngakula, bɛhwe bɛ nwo bɛvi awozonle ɛzonlenlɛ nwo.