1 Dw 4 - BAEBOLO ANZƐƐ BULUKU NWUANZANWUANZA

Nɔhalɛ sunsum nee adalɛ sunsum

¹ Ayi mɔ, bɛmmadie sunsum ne mɔ amuala bɛdi, bɛzɔ bɛ bɛnlea na bɛnwu sunsum ne mɔɔ vi Nyamenle ɛkɛ ne la. Ɔluakɛ Nyamenle kpɔmanvolɛma adalɛ dɔɔnwo ɛdwazo ewiade ye anu.

² Debie mɔɔ kɛmaa bɛkɛhola bɛkɛnwu kɛ sunsum ne vi Nyamenle ɛkɛ ne la a le ɛhye: sunsum biala mɔɔ ka to gua kɛ Gyisɛse Kelaese rale kɛ sonla la le Nyamenle Sunsum,

³ yɛɛ sunsum biala mɔɔ ɛnlie Gyisɛse ɛndo nu la ɛnle Nyamenle Sunsum. Sunsum ɛhye le Kelaese Kpɔvolɛ ne sunsum ne mɔɔ bɛdele kɛ ɔbara, na kɛkala ɔwɔ ewiade ye anu dɛbadɛba la.

⁴ Me mra ngakula, bɛmɛ bɛle Nyamenle ɛdeɛ, na bɛli Nyamenle kpɔmanvolɛma adalɛ ɛhye mɔ anwo zo konim, ɔluakɛ sunsum ne mɔɔ wɔ bɛ nu la le kpole tɛla sunsum ne mɔɔ wɔ ɛtane ewiade ye amra anu la.

⁵ Nyamenle kpɔmanvolɛma alane ɛhye mɔ le ɛtane ewiade ye ɛdeɛ, yemɔti bɛka ewiade ye edwɛkɛ, yɛɛ ɛtane ewiade ye tie bɛ.

⁶ Na yɛmɛ yɛle Nyamenle menli. Awie biala mɔɔ ze Nyamenle la tie yɛ, yɛɛ awie biala mɔɔ ɛnle Nyamenle ɛdeɛ la ɛndie yɛ. Ɛhye yɛɛ maa yɛnwu nɔhalɛ sunsum ne nee adalɛ sunsum ne a.

Nyamenle le ɛhulolɛ

⁷ Ayi mɔ, bɛmaa yɛhulo yɛ nwo ngoko ngoko, ɔluakɛ ɛhulolɛ vi Nyamenle. Awie biala mɔɔ lɛ ɛhulolɛ la le Nyamenle ara na ɔze Nyamenle.

⁸ Awie biala mɔɔ ɛnlɛ ɛhulolɛ la ɛnze Nyamenle, ɔluakɛ Nyamenle le ɛhulolɛ.

⁹ Kɛ Nyamenle zile hilele kɛ ɔkulo yɛ la ɛne: ɔzoanle ɔ Ra kokye ne wɔ ewiade ye anu, amaa ɔlua ɔ nwo zo yɛanyia ngoane.

¹⁰ Ɛhulolɛ kɛ de la ɛne: tɛ yɛmɛ a yɛhulole Nyamenle a, yemɔ a ɔhulole yɛ na ɔzoanle ɔ Ra ne kɛ ɔrayɛ yɛ ɛtane ne mɔ anwo mgbɔdalɛdeɛ, amaa ɔlua ɔ nwo zo bɛava yɛ ɛtane ne mɔ bɛahyɛ yɛ.

¹¹ Ayi mɔ, saa Nyamenle ɛhulo yɛ ɛhulolɛ zɛhae a, ɛnee ɔwɔ kɛ yɛdayɛ noko yɛkulo yɛ nwo ngoko ngoko.

¹² Awie biala ɛtɛnwunle Nyamenle ɛlɛ, na saa yɛkulo yɛ nwo ngoko ngoko a, ɛnee Nyamenle de yɛ nu, na ye ɛhulolɛ ne ɛli munli wɔ yɛ nu.

¹³ Saa yɛyɛ ye zɔhane a yɛkɛnwu kɛ yɛde Nyamenle anu na ɔdaye noko ɔde yɛ nu, ɔboalekɛ yeva ɔdaye mumua ne ye Sunsum ne yemaa yɛ.

¹⁴ Yɛnwu ye yɛɛ yɛdi daselɛ kɛ Selɛ ne ɛzoa ɔ Ra ne kɛ yemɔ a ɔle ɛtane ewiade ye amra ngoanedievolɛ a.

¹⁵ Awie biala mɔɔ ka to gua kɛ Gyisɛse a le Nyamenle ara ne la, Nyamenle nee ye de, yɛɛ ɔdaye noko ɔ nee Nyamenle de.

¹⁶ Yɛdayɛ mumua ne yɛze, yɛɛ yɛdie yɛdi kɛ Nyamenle kulo yɛ. Nyamenle le ɛhulolɛ, yemɔti awie biala mɔɔ lɛ ɛhulolɛ la nee Nyamenle de, yɛɛ Nyamenle nee ye de.

¹⁷ Nyamenle maa ɛhulolɛ di munli wɔ yɛ nu, amaa yɛahola gyinla wɔ Ndɛnebualɛ Kenle ne, ɔboalekɛ kɛ Kelaese si de la, zɔhane ala yɛɛ yɛdayɛ noko yɛle wɔ ewiade ye anu a.

¹⁸ Ɛzulolɛ ɛnle ɛhulolɛ nu; ɛhulolɛ kpalɛ mɔɔ di munli la tu ɛzulolɛ kpokpoti. Ɔluakɛ awie biala mɔɔ lɛ ɛzulolɛ la ɛhulolɛ ɛnli munli, ɔboalekɛ ɛzulolɛ nee ndeanlɛ a lua a.

¹⁹ Yɛkulo Nyamenle, ɔboalekɛ ɔlumuale ɔhulole yɛ.

²⁰ Saa awie ka kɛ, “Mekulo Nyamenle”, na ɔkpɔ ɔ diema a, ɛnee ɔle adalɛ, ɔluakɛ awie mɔɔ ɛngulo ɔ diema mɔɔ ɔ nye dua ye la ɛnrɛhola ɛnrɛhulo Nyamenle mɔɔ ɔtɛnwunle ye ɛlɛ la.

²¹ Mɛla ne mɔɔ Kelaese manle yɛ la kɛ se la ɛne: ɔwɔ kɛ sonla mɔɔ kulo Nyamenle la kulo ɔ diema noko.