1 Dw 3 - BAEBOLO ANZƐƐ BULUKU NWUANZANWUANZA

Nyamenle amra

¹ Bɛnlea kɛ Selɛ ne ɛzi ɛhulo yɛ a! Ye ɛhulolɛ kpole ne ati, bɛfɛlɛ yɛ Nyamenle amra, yɛɛ nɔhalɛ nu, yɛle ɔ mra. Debie mɔɔ yemɔti ɛtane ewiade ye ɛnze yɛ la a le kɛ yeannwu Nyamenle.

² Ayi mɔ, kɛkala yɛle Nyamenle amra, noko akee kɛ kenle bie yɛbazi yɛayɛ la ɛtɛdale ali. Noko yɛze kɛ mekɛ mɔɔ Kelaese bara bieko la, yɛbayɛ kɛ ɔdaye ala la, ɔluakɛ yɛbanwu ye kɛmɔ ɔde ala la.

³ Awie biala mɔɔ lɛ anyelazo ɛhye wɔ Kelaese anu kɛ yɛbayɛ kɛ Kelaese ala la maa ɔ nwo te kɛ Kelaese la.

⁴ Awie biala mɔɔ yɛ ɛtane la di fɔlɛ kɛ ɔto Nyamenle mɛla ne, ɔluakɛ ɛtane le mɛladonlɛ.

⁵ Bɛze kɛ Kelaese rale amaa yeaye ɛtane ne mɔ yeavi ɛkɛ. Yemɔ, ɛtane biala ɛnle ye nu.

⁶ Zɔhane ati awie mɔɔ nee Kelaese lua la ɛnyɛ ɛtane; awie biala mɔɔ yɛ ɛtane la ɛtɛnwunle Kelaese yɛɛ ɔnze ye.

⁷ Me mra ngakula, bɛmmamaa awie bɛlɛbɛla bɛ! Awie biala mɔɔ yɛ mɔɔ tenrɛ la le tenlenenli, kɛmɔ Kelaese le tenlenenli la.

⁸ Na awie biala mɔɔ yɛ ɛtane la le Abɔnsam ɛdeɛ, ɔluakɛ mɔlebɛbo ne Abɔnsam a lumuale yɛle ɛtane a. Deɛ mɔɔ yemɔti Nyamenle Ara ne rale la a le kɛ ɔbazɛkye Abɔnsam gyima biala mɔɔ yeli la.

⁹ Awie biala mɔɔ le Nyamenle ara la ɛnyɛ ɛtane, ɔluakɛ Nyamenle su ne wɔ ye nu, na kɛmɔ ɔ Ze a le Nyamenle la, ɔngola ɔnyɛ ɛtane.

¹⁰ Ngakyile mɔɔ wɔ bɛdabɛ mɔɔ bɛle Nyamenle amra nee bɛdabɛ mɔɔ bɛle Abɔnsam amra la avinli la ɛne: awie biala mɔɔ ɛmbɔ ɛbɛla kpalɛ anzɛɛ ɛngulo ɔ diema la ɛnle Nyamenle ara.

Bɛhulo bɛ nwo ngoko ngoko

¹¹ Nrɛlaleɛ mɔɔ mɔlebɛbo ne ala bɛdele la a le ɛhye: ɔwɔ kɛ yɛkulo yɛ nwo ngoko ngoko.

¹² Ɔnle kɛ yɛyɛ kɛ Keen mɔɔ le Abɔnsam ara, mɔɔ hunle ɔ diema ne la. Na duzu ati a ɔhunle ye a? Ɔhunle ɔ diema ne, ɔluakɛ ɔdaye Keen ye nyɛleɛ ne mɔ ɛnle kpalɛ, na ɔ diema ne nyɛleɛ ne mɔ le fɔɔnwo.

¹³ Zɔhane ati me mediema, saa ɛtane ewiade ye ɛngulo bɛ edwɛkɛ a bɛmmamaa ɔyɛ bɛ ɛzulolɛ.

¹⁴ Yɛze kɛ yɛvi ewule nu yɛra ngoane nu; yɛze ɛhye, ɔluakɛ yɛkulo yɛ mediema ne mɔ. Awie biala mɔɔ ɛnlɛ ɛhulolɛ la de ewule nu.

¹⁵ Awie biala mɔɔ kpɔ ɔ diema la le kɔdiawu, yɛɛ bɛdabɛ noko bɛze kɛ kɔdiawu biala ɛnlɛ ngoane mɔɔ ɛnlɛ awieleɛ la wɔ ye nu.

¹⁶ Kɛ ɛhulolɛ de la ɛne: Kelaese dole ye ngoane aze manle yɛ, yemɔti ɔwɔ kɛ yɛdayɛ noko yɛto yɛ ngoane aze yɛmaa yɛ mediema.

¹⁷ Saa awie mɔɔ lɛ ewiade ye anu ninyɛne la nwu ɔ diema mɔɔ ɛhyia, na ɔye ɔ nye ɔto ɛbɔ nu a, ɛnee kɛ ɔsi ɔka kɛ ɔkulo Nyamenle ɛ?

¹⁸ Me mra ngakula, bɛmmamaa yɛfa edwɛkɛ ɛhanlɛ anzɛɛ yɛ nloa mgbane yɛkulo menli; ɔwɔ kɛ ɔyɛ nɔhalɛ ɛhulolɛ kpalɛ, na eza ɔfinde yɛ nyɛleɛ nu.

Nyamenle anyunlu ɛhɔlɛ

¹⁹ Ɛhye a kɛmaa yɛkɛnwu kɛ yɛlɛ nɔhalɛ ne wɔ yɛ nu, na yɛkɛzi pi wɔ Nyamenle anyunlu

²⁰ mekɛ biala mɔɔ yɛ adwenle kɛbu yɛ fɔlɛ la a, ɔluakɛ Nyamenle le kpole tɛla yɛ adwenle, yɛɛ ɔze debie biala.

²¹ Ayi mɔ, saa yɛ adwenle ɛmbu yɛ fɔlɛ a, ɛnee yɛsi pi wɔ Nyamenle anyunlu.

²² Debie biala mɔɔ yɛkɛbiza ye la, yɛ sa ka ye, ɔluakɛ yɛdi ye mɛla ne mɔ azo na yɛyɛ mɔɔ sɔ ɔ nye la.

²³ Ye mɛla ne a le kɛ yɛlie ɔ Ra Gyisɛse Kelaese yɛli na yɛhulo yɛ nwo ngoko ngoko, kɛmɔ Kelaese ɔdaye ɔzele yɛ la.

²⁴ Awie biala mɔɔ di Nyamenle mɛla ne mɔ azo la nee Nyamenle a lua a yɛɛ Nyamenle nee ye lua. Mɔɔ maa yɛnwu kɛ Nyamenle nee yɛ lua la a le Nyamenle Sunsum ne mɔɔ Nyamenle ɛva ɛmaa yɛ la.