1 Kɔl 9 - BAEBOLO ANZƐƐ BULUKU NWUANZANWUANZA

Ɛzoanvolɛma gyima

¹ Menle dehelɛ ɔ? Menle ɛzoanvolɛ ɔ? Metɛnwunle yɛ Awulae Gyisɛse ɔ? Na tɛ bɛmɛ a Awulae ati bɛle me sa anloa gyima a?

² Saa bɔbɔ awie mɔ ɛnlie me ɛndo nu kɛ mele ɛzoanvolɛ a ɛnee tɛ bɛmɛ ɔ! Bɛdabɛ mumua ne bɛ ɛbɛlabɔlɛ mɔɔ Awulae ati bɛbɔ la kile kɛ mele ɛzoanvolɛ.

³ Me ne mɔɔ mesa meahile bɛdabɛ mɔɔ bɛfedevede me ɛbɛlabɔlɛ nu la ɛne!

⁴ Yɛnlɛ adenle kɛ yɛdi na yɛno ɔ?

⁵ Yɛnlɛ adenle kɛ yɛgya Kelaese ɛdoavolɛ mraalɛ ne mɔ bie na yɛ nee ye tu adenle kɔyɛ gyima, kɛmɔ ɛzoanvolɛma ɛhendeɛ ne mɔ nee Awulae amediema ne mɔ nee Pita yɛ ye la ɔ?

⁶ Anzɛɛ me nee Banabase yɛ mu nwiɔ ala yɛɛ ɔwɔ kɛ yɛpele na yɛali a?

⁷ Sogyanli boni a wɔ konle nloa na ɔdaye ɔ ngome ɔdi ɔ nloa anu ndɔnie a? Nwane a ɛyɛ vanye egyinli na ɔnli vanye ma ne bie a? Nwane a nea nyɛmoa na ɔnno bɛ nyɛfonzule ne bie a?

⁸ Tɛ sonla tumi zo yɛɛ melua mɔɔ meka ɛhye mɔ a. Nyamenle mɛla ne ɔdaye ɔka edwɛkɛ ko ne ala.

⁹ Bɛhɛlɛ ye wɔ Mosisi mɛla ne anu kɛ, “Mmakyekye ɛnlankɛ ne mɔɔ wozo awule ne la anloa.” Asoo ɛnlankɛ nwo hyia Nyamenle tɛla yɛ la ati a ɔhanle ɛhye a?

¹⁰ Anzɛɛ tɛ yɛmɛ yɛ ti a ɔhanle ɛhye a? Nɔhalɛ, bɛhɛlɛ ɛhye wɔ sonla ti. Bɛmaa mɔɔ so ɛya nee mɔɔ fa nu aleɛ la ɛyɛ bɛ gyima ne anyelazo nu kɛ bɛbanyia bɛ afoa nu aleɛ ɛdeɛ.

¹¹ Yɛlua sunsum nu ma wɔ bɛ nu, na saa yɛnyia nvasoɛ wɔ ninyɛne nu yɛfi bɛ ɛkɛ ne a, ɛnee ɔnle ɛtane.

¹² Saa awie mɔ bɔbɔ lɛ adenle kɛ bɛdie ɛhye wɔ bɛ lɔ a, ɛnee akee yɛmɛ ɛ? Noko yɛtɛyɛle debie zɛhae mɔ bie. Yɛkponle ninyɛne muala azo, amaa yɛandua Kelaese anwo Edwɛkpa ne ɛhanlɛ adenle.

¹³ Nɔhalɛ, bɛze kɛ menli mɔɔ yɛ Ɛzonlenlɛ Sua nu gyima la nyia bɛ aleɛ fi Ɛzonlenlɛ Sua ne anu, yɛɛ bɛdabɛ mɔɔ bɛboa azubɔlɛ nu wɔ azukponle ne anyunlu la nyia ninyɛne ne mɔ mɔɔ bɛfa bɛbɔ azu ne la bie.

¹⁴ Zɔhane ala yɛɛ Awulae ɛhyehyɛ ɛdo ɛkɛ ne kɛ ɔwɔ kɛ bɛdabɛ mɔɔ bɛbɔ Edwɛkpa ne nolo la nyia bɛ aleɛ fi bɛ gyima nu a.

¹⁵ Noko metɛbizale debie biala metɛfile bɛ lɔ, yɛɛ mengɛlɛ ɛhye kɛ akee bɛyɛ ninyɛne ɛhye mɔ bɛmaa me. Menwɔhulo kɛ menwɔwu kɛdɛla kɛ awie kɛmaa me nloa anu mɔɔ metu kɛ menga Edwɛkpa ne menlie ahatualɛ la kɛyɛ mgbane.

¹⁶ Menlɛ adenle kɛ mememaa me nwo zo kɛ mebɔ Edwɛkpa ne nolo a, ɔluakɛ ɔle me gyima mɔɔ ɔwɔ kɛ meyɛ a. Saa meambɔ Edwɛkpa ne nolo a, me gyakɔ!

¹⁷ Saa melɛ medame me ɛhulolɛ yɛɛ melɛyɛ gyima ne a, anrɛɛ me nye bala ahatualɛ zo, na meyɛ ye kɛ ɔle ɛzonle ɔla me nwo zo, ɔboalekɛ Nyamenle a ɛva ɛwula me sa nu a.

¹⁸ Ɛnee akee duzu ahatualɛ a menyia ye a? Me ahatualɛ a le kɛ menwɔbɔ Edwɛkpa ne mɔɔ fane Kelaese anwo la nolo mɔɔ menlie ɛhwee, na eza menva adenle mɔɔ melɛ ye wɔ Edwɛkpa ne ɛhanlɛ nwo la menyɛ me nwo boɛ.

¹⁹ Mele dehelɛ, menle awie biala akɛlɛ; noko meyɛ me nwo akɛlɛ memaa awie biala, amaa me sa aha bɛ nuhua dɔɔnwo ne ala.

²⁰ Wɔ Dwuuma anu, membɔle me ɛbɛla kɛ mele Dwuunli, amaa me sa aha bɛ; na saa medame Pɔɔlo menle Mosisi mɛla ne abo bɔbɔ a, membɔle me ɛbɛla kɛ mewɔ mɛla ne abo wɔ mekɛ mɔɔ me nee Dwuuma mɔɔ bɛmɛ bɛwɔ mɛla ne abo la de la, amaa me sa aha bɛ.

²¹ Zɔhane ala yɛɛ meyɛ ye wɔ mekɛ mɔɔ mewɔ bɛdabɛ mɔɔ bɛnle Dwuuma la avinli a; meyɛ me nwo kɛ asɛɛ menle mɛla ne abo, amaa me sa aha bɛdabɛ noko. Ɛhye ɛngile kɛ menli Nyamenle mɛla ne azo; nɔhalɛ ne a le kɛ mewɔ Kelaese mɛla bo.

²² Saa mewɔ bɛdabɛ mɔɔ bɛ diedi ɛnli munli la anu noko a, meyɛ me nwo kɛ bɛ nuhua bie la, amaa me sa aha bɛ. Zɔhane ala yɛɛ me nee menli muala yɛ ko a, amaa adenle biala azo mealua mealie bie mɔ ngoane meamaa Nyamenle.

²³ Meyɛ ɛhye mɔ amuala wɔ Edwɛkpa ne ati, amaa meanyia nwolɛ nyilalɛ ne bie.

²⁴ Bɛze ye wienyi kɛ menli dɔɔnwo a su ɛnriandilɛ a, noko bɛ nuhua ko ala yɛɛ asa ka nwolɛ ahyɛlɛdeɛ ne a. Ɛhye ati bɛnriandi kpalɛ kɛ bɛkɛnyia nwolɛ ahyɛlɛdeɛ ne.

²⁵ Awie biala mɔɔ kazu ɛnriandilɛ la siezie ɔ nwo kpalɛ wɔ adenle biala anu. Ɔyɛ ye zɔhane, amaa bɛabɔ ye nwolɛ abɔtile, abɔtile ɛhye bɔbɔ ɛngyɛ na yeazɛkye. Na yɛmɛ Keleseɛnema, yɛsu ɛnriandilɛ yɛdie abɔtile mɔɔ ɛnzɛkye ɛlɛ la.

²⁶ Ɛhye ati, kɛmɔ me ɛnriandilɛ ne gyi kpɔkɛ zo la, dahuu menriandi fɔɔnwo; mele kɛ sonla mɔɔ ko la. Mentoto me abotokuma ne mɔ mgbane mgbane.

²⁷ Mebɔ mɔdenle mesɔ me nwo na megyinla me ti koonwu medie abotokuma kpalɛ, amaa mame mɔɔ mebɔ edwɛkɛ ne nolo la meandɔ sinli wɔ sɔnea ne anu.