1 Kɔl 1 - BAEBOLO ANZƐƐ BULUKU NWUANZANWUANZA

¹ Pɔɔlo, mɔɔ Nyamenle ɛlua ɔdaye ye ɛhulolɛdeɛ zo ɛvɛlɛ ye kɛ ɔrayɛ Kelaese Gyisɛse ɛzoanvolɛ, nee yɛ diema Sɔsetinɛse a

² ɛlɛkɛlɛ kɛlata ɛhye a. Yɛlɛ yɛkamaa Nyamenle menli ne mɔɔ wɔ Kɔlente, mɔɔ Kelaese Gyisɛse ati bɛdu bɛ bɛzie ɛkɛ ne, na bɛvɛlɛ bɛ nee bɛdabɛ mɔɔ bɛwɔ ɛleka muala, mɔɔ bɛbɔ yɛ Awulae Gyisɛse Kelaese duma la, kɛ bɛrayɛ Nyamenle menli la.

³ Yɛ Ze Nyamenle nee Awulae Gyisɛse Kelaese ɛlo bɛ na ɔmaa bɛ anzonudwolɛ!

Kelaese anu nyilalɛ

⁴ Dahuu meyɛ me Nyamenle ne mo memaa bɛ kɛ yelua Kelaese Gyisɛse anwo zo yelo bɛ a.

⁵ Ɔluakɛ Kelaese ati bɛnyia bɛ nwo wɔ ninyɛne kɔsɔɔti anu, bɔbɔ wɔ edwɛkɛ ɛhanlɛ nee adwenle nu amuala.

⁶ Kelaese anwo edwɛkɛ ne ɛwie nyi wɔ bɛ nu dɛba,

⁷ yemɔti bɛngyia ɛlolɛ ahyɛlɛdeɛ biala anwo, wɔ mekɛ mɔɔ bɛlɛkendɛ yɛ Awulae Gyisɛse Kelaese ɛralɛ bieko mɔɔ ɔbara la.

⁸ Kelaese ɔdaye ɔbamaa bɛagyinla kpundii bɛahɔ awieleɛ, amaa bɛanli fɔlɛ wɔ debie biala anu wɔ yɛ Awulae Gyisɛse Kelaese Kenle ne.

⁹ Bɛkola bɛfa bɛ rɛle bɛwula Nyamenle ne mɔɔ vɛlɛle bɛ kɛ bɛ nee ɔ Ra Gyisɛse Kelaese, yɛ Awulae ɛradila agɔnwolɛ la anu.

Mgbakyemgbakye wɔ Asɔne ne anu

¹⁰ Mediema, melɛ yɛ Awulae Gyisɛse Kelaese duma ne mesɛlɛ bɛ kɛ bɛmaa bɛ muala bɛ nloa ɛzɛ bɛ nwo; bɛmmamaa mgbakyemgbakye biala bada bɛ avinli. Bɛhye bɛ nwo file wɔ adwenle nu nee bɛ kpɔkɛbɔlɛ nu.

¹¹ Melɛka ɛhye, ɔluakɛ me mediema Kuloyi sua nu amra bie mɔ ɛraha ɛhile me kɛ bɛdabɛ bɛ ngome bɛpɛ bɛ nwo bɛdi butule.

¹² Mɔɔ mekpondɛ meaha la a le kɛ asolo bɛ nuhua ko biala nee ye edwɛkɛ. Mɔɔ ko se “Mewɔ Pɔɔlo afoa la”, ɛnee bie se, “Mewɔ Apɔlɔso afoa.” Bie se, “Mewɔ Pita afoa,” ɛnee bie noko se, “Mewɔ Kelaese afoa.”

¹³ Bɛhyɛ Kelaese anu ekpunli ekpunli ɔ? Na mebiza bɛ kɛ, Pɔɔlo a bɛbɔle ye meanubaka nu bɛmanle bɛ ɔ? Anzɛɛ bɛzɔnenle bɛ kɛ bɛle Pɔɔlo ɛdoavolɛma ɔ?

¹⁴ Meyɛ Nyamenle mo kɛ meanzɔne bɛ nuhua biala kyesɛ Kelesepɛse nee Gayɛse ala.

¹⁵ Yemɔti awie biala ɛnga kɛ bɛzɔnenle ye kɛ ɔle me ɛdoavolɛ.

¹⁶ Mekakye noko kɛ medame a menzɔnenle Setɛfanase nee ye sua nu amra a, na mengola mengakye kɛ menzɔnenle awie bieko.

¹⁷ Kelaese anzoa me kɛ membanzɔne menli. Ɔzoanle me kɛ memambɔ Edwɛkpa ne nolo, na memmafa sonla nrɛlɛbɛ meka, anrɛɛ tumi ne mɔɔ wɔ Kelaese meanubaka ne anwo edwɛkɛ ne anu la kɛyɛ mgbane.

Kelaese a le Nyamenle tumi nee nrɛlɛbɛ ne a

¹⁸ Ɔluakɛ Kelaese meanubaka ne azo ewule ne anwo edwɛkɛ le debie funli maa bɛdabɛ mɔɔ bɛlɛminli la; noko ɔle Nyamenle tumi ɔmaa yɛdayɛ mɔɔ Nyamenle ɛlɛdie yɛ ngoane la.

¹⁹ Ɔluakɛ Nyamenle Edwɛkɛ ne se, “Mebaminliminli nrɛlɛbɛvolɛma nrɛlɛbɛ ne abo zo, na meamaa adwenlema ndelebɛbo ayɛ mgbane.”

²⁰ Ɛnee akee nrɛlɛbɛvolɛma hale nienwu? Nienwu a mɛla kilehilevolɛma ne hale a? Anzɛɛ mekɛ ɛhye anu kpolerazulɛ benlerama ne mɔ hale nienwu? Asoo Nyamenle ɛtɛkilele kɛ ewiade anu nrɛlɛbɛ le debie mgbane?

²¹ Ɔluakɛ Nyamenle luale ye nrɛlɛbɛ zo zile menli adenle, yeammaa bɛanlua bɛdabɛ bɛ nrɛlɛbɛ zo bɛannwu ye. Mɔɔ ɔyɛle la a le kɛ, Nyamenle luale mɔɔ bɛmɛ bɛse ɔle “koasea” edwɛkɛ yɛɛ yɛlɛbɔ ye nolo la azo bɔle kpɔkɛ kɛ ɔdie bɛdabɛ mɔɔ bɛdie bɛdi la ngoane.

²² Dwuuma kpondɛ sɛkɛlɛneɛ mɔɔ si edwɛkɛ ne dawua la, yɛɛ Gilikima kpondɛ nrɛlɛbɛ.

²³ Na yɛmɛ, yɛbɔ Kelaese meanubaka ne azo ewule ne mɔɔ maa Dwuuma tu koti na ɔle ɛzɛlɛ edwɛkɛ ɔmaa bɛdabɛ mɔɔ bɛnle Dwuuma la nolo;

²⁴ na bɛdabɛ mɔɔ Nyamenle ɛvɛlɛ bɛ la, Dwuuma o, bɛdabɛ mɔɔ bɛnle Dwuuma la o, Kelaese a le Nyamenle tumi ne yɛɛ ɔdaye ko ne ala a ɔle Nyamenle nrɛlɛbɛ ne a.

²⁵ Ɔluakɛ Nyamenle nu koasea edwɛkɛ tɛla menli nrɛlɛbɛ, yɛɛ Nyamenle nu bɛtɛɛ ɛyɛlɛ yɛ se tɛla sonla anwosesebɛ.

²⁶ Mediema, akee bɛhakye kɛ anrɛɛ bɛsi bɛde mɔɔ Nyamenle vɛlɛle bɛ la. Saa sonla afoa nu a anrɛɛ bɛ nuhua ekyi bie ala a ze nrɛlɛbɛ, lɛ tumi anzɛɛ le mandimase a.

²⁷ Nyamenle anye la nwo yɛɛ ɔkpale nu ɔyele deɛ mɔɔ ewiade bu ye ɛzɛlɛ debie la kɛ ɔfa yeamaa nrɛlɛbɛvolɛma anyunlu agua aze a, yɛɛ ɔkpale nu ɔyele deɛ mɔɔ ewiade bu ye kɛ ɔle bɛtɛɛ na bɛmbu ye bie la kɛ ɔfa yeagua bɛdabɛ mɔɔ bɛlɛ tumi la anyunlu aze a.

²⁸ Nyamenle kpale nu yele deɛ mɔɔ ewiade nea a ɔmbu ye bie na ɔfa ye kɛ ɔnle debie biala la kɛ ɔfa yeazɛkye deɛ mɔɔ ewiade dwenle kɛ ɔ nwo hyia la.

²⁹ Nyamenle yɛle ɛhye amaa dasanli biala angola ammemaa ɔ nwo zo wɔ ɔ nyunlu.

³⁰ Nyamenle ɛva bɛ nee Kelaese Gyisɛse ɛbɔ nu, na yemaa Kelaese ɛrayɛ yɛ nrɛlɛbɛ. Ɔ nwo zo yɛɛ yɛlua a yɛsɔ Nyamenle anye, yɛ nwo te na yɛyɛ alehelɛ a.

³¹ Ɛhye ati, kɛmɔ Nyamenle Edwɛkɛ ne se la, “Awie biala mɔɔ kpondɛ kɛ ɔmemaa ɔ nwo zo la ɛva mɔɔ Awulae ɛyɛ la ɛmemaa ɔ nwo zo.”