Taitus 3 - Nobonob Baibel

Kobol tutukku dim lamittaknu nai

¹ Na danab ah ag ahilkad ikki danab, amu ahilkad danab gumaknu ehah ele waalkadppa daaglagnu daulkadppa dokkunu, ag oɗe dim lamittak danab daan oina, ag aɗi uɗat amu uɗat ena hekkulagnu babaittak daaglagnu,

² ag danab laa baeg ii qemananu, ag maɗoɗ kobol, laa dilag dabmettak kobol ele hekkulagnu, ag danab ah oh noolagppa ag akka ag onilkad qeppeg nekkunu appe doyeg!

³ Aɗinu ig anam oignig? Ig ele anukka dabmak tutukku iittappa, nai tappe nakppa, Satan nuhig hambuppuakppa ele oimut. Ig oo ahaknu keeke digdig kuɗum, amu beɗunig gamag ahak aokkunu kobol digdig kuɗum ele waappa daat hemut. Ig oo aeg bak kobolppa oitta, laa dilagnu ele amenig qe oonig elele ii dayom. Ig oonigppa lainkad dilagnu nau ninig ele doot oimut, amu ag ele ihinignu anamib doon oippig.

⁴ Amge Kayak, Nug am Padal ii maknu ehanittak ihinig daatte amu, Nug he, nuhig oo bodoettak kobol, oo mauhak kobol ele miag atieh,

⁵ Nug ig eɗua awikkom. Ig ihinig genab tutukku hak kobol hemutnu laala anatta ii heum. Iitta. Nug ihinignu oo gai-iitta doya oo mekka ehanikkom amunu, Nug ig ihikka, nuhig Ouɗippa Nug bauklel mekke, ig bau menuak aomut.

^6-7 Kayak Nug Jesusnu ehanittak okkai hamu mettak, amuppa Nug ig genab tutukku hak danab beta daagnignu, ig nuhig bauklel hanhannu aot daagnignu dabmak aot ameg mekkunignu, Nug Jesus Kristus, Nug am ihinig Eɗua Awikkak Danab amu, Nug nuhig uɗatppa nuhig Ouɗi ig elelenab mekkom.

⁸ Nai amuam genabnab. Amu danab ag Kayaknu oolagppa genab dooppig ele, ag ena henan daaglagnu tutukku dabmekkulagnu, da na ippunittak nai da iikku medattem, na danab ah ippuanadkkutnunab ool daatte. Keeke amu oh am danab ah ele ehanadtte.

⁹ Amge na danab ag dabmak tutukku iittappa nai aeg ona aeg doak hetteb, ag kaino onilagnu ge iitta mattiak hetteb, amu ag ɗo meunu nug mehqak, aeg ona aeg doak ele hetteb amu, na ahilagnu awaidna laih ukke! Aɗinu? Keeke amu oh am keeke hamu; am ig kobol enappa laa ii ehanigmana.

¹⁰ Laa ele, danab laa nug tamaniak ena loppaɗtte ele, na tolittak uɗat laippu hewona, laa ele heppe amu anam bataɗ! Amu nug baula tippaleb amu, na nug geɗitte!

¹¹ Na doottem, danab amu nug ib ena eɗitta, hipuninppa daatte. Nug nukka nuhigppa nai yaatte.

Bagqak nai

¹² Dimppa da Artemastai o iitta Tikikustai meppi, na gumitta ukkeb amu, na paha da gumiɗna, Nikopolis uɗie! Da oug haenppa appa daakkulnu maittak aottem.

¹³ Na ɗonu doyak danab Senas amu Apolos ele, aa oiglahnu keekenu amu na elele ehanate! Aa amunu keeke laanu tutu aib daapiɗ!

¹⁴ Aria ihinig danab, ag Kristen, ag uɗat hekkulagnu, ag amuppa bau dayaknu keeke aoglagnu dooglagoitte. Ag hamuib daaglagnu am aib.

¹⁵ Am danab da ele daattem imu oh na humidtteb. Na danab aun aɗi ag ig ele oh Kayaknu oonigppa genab doottem, ag ig lainkad daan, ihinignu oo mauhak dootteb amu, ag humittak ihinig ag matte! Kayaknu ehanittak okkai hamu mettak ag oh, ahilagppa dayaɗ!