Taitus 2 - Nobonob Baibel

Ippunittak nai digdig

¹ Nahipnu amu, na danab ah oh amelagppa ippunittak nai genab ena aɗi ippunigtte amu, na amu ippunadna appe doyeg!

² Na danab kaino ag doyak dabmak ena ele aon oina, ag danab laa ahilagnu ena elele dooglagnu daan, ag akka ag ahilag oiyak pehettak atognona, ag ooppa genab doyakppa, ag oo mauhak kobolppa, amu ag uug ohppa ɠagattag dayaknu kobolppa ele, ag ɠagattag daaglagnu appe doyeg!

³ Amu na ah kaino ag ele danab ah oppiaawak doon oiglagnu ib daatte, amubia ag tutukku oinna, ag baeg qak nai ii mattimnanu, ag wain huana ii lamananu, ag kobol enanu ippunittak ah daaglagnu,

⁴ ag ah bau ag gamulkad amu ahilkad nid naunau ele dilagnu oo mauhak dooglagnu ippuanadkkulagnu,

⁵ ag akka ag oiyak pehettak atognoak kobol dim lamidna, ag oppiak daaglagnu, ag laulag atognona dabmettanna bappaidkkulagnu, ag kobol ena hekkulagnu, ag gamulkad waalagppa daaglagnu appe doyeg! Diig aɗinu ag anam oiglag. Amunu diig am dimittim danab ag Kayak nainu nai nau ii mattimnanu, ag anam oiglag.

⁶ Amubia na danab bau ag ele akka ag ahilag oiyak pehettak atognoak kobolppa oiglagnu appe doyeg!

^7-8 Na amu, na aɗi hettemppa na ag ippulag enaib ippunadnana, tutukku he! Amu laa ag nahip nai tabappeg nekkunu hetteb ele, ag ihinignu nai eheɗ laa mattiglagnu ib iitta anidkkulag amunu, ag ⌊anam heppignu⌋ uɗa nak dooglagnu na ippunattak nai nahip-ppa na danab dabmak oiyak nuhig ele am tutukkuib, na danab nug nuhig uɗatnu am keeke meu ele, hamu iitta dootte, amu na danab nug nai genab ena ele, danab ag nai amunu nai nau anaknu elele iitta maditte, na danab anam daan ippunadna, ippunittak nai nahip mattie!

^9-10 Aria, begbeg maɗi nid dilagnu amu, ag ahilkad okkai ag Kayak, Nug ig eɗua awikkom ele amu, ag ib ohppa nuhig nai binag mekkulagnu begbeg maɗi nid ag ahilkad okkai waalagppa daanna, uɗat oh ahilkad okkai oolag ena daakkunu hena, ag dagom daanna, ahilkad okkai dilag nai dim lamidna, ag ahilkad okkai dilagppa yabhok ii hemana, ag ahilkad okkai ag ahilagnu oolagppa genab dooglagnu elele daatteb dooglagnu enaib hekkulagoitte.

¹¹ Kayaknu ehanittak okkai hamu mettak amu, ehanittak amuam eɗua awikkaknu diig, amuam danab oh amelagppa aakku miag atiom.

¹² Kayaknu ehanittak okkai hamu mettak amu, nug ig Kayak dimettak kobol amu wannu oo gamag ahaknu dabmak nau ele, ig amu oh uuta, ig wannu haen imunu oitta, ig ikka ig ihinig oiyak pehettak atognota, tutukku oita, Kayaknu kobol dim lamidkkunignu ippunigtte.

¹³ Ig anam oitta, ig Jesus eɗua uɗiaknu deɗ okkai amu uɗikkunu dabmak aɗat ameg meta daattem. Deɗ amuppa amu Jesus Kristus, Nug am ihinig Kayak Naɗi, Padal ii maknu ehanittak ihinig ele daatte amu, Nug binag amahlak oppiaawak ele miag atiak uɗikku.

¹⁴ Kristus Nug ig ihinig nau hak ohnu qagaiettakppanu eɗua uhuqak hekkunu, ig nuhikkudnab danab ah oppiaawak ele daatta, kobol ena tutukku aakkuib hekkunignu dabmak aognignu amu, Nug ihinignu mauhom.

¹⁵ Na nai amu haen oh danab ah ippunadkkut. Na hekkutnu ehah aome daattemppa, na danab ah oolag ɠagattag qettan, ag daulag ele batakkut. Nahip hakppanu, nahip oiyakppanu ele laa nug nahipnu ena iinab doomanu, na enaib oiye!