Taitus 1 - Nobonob Baibel

Pol Taitusnu nai yom

¹ Da Pol, da Kayaknu maɗi nid, amu Jesus Kristusnu totol danab ele daattem. Kayak Nug da laa Nug ag tituanattom ele, da ahilag ooppa genab doyak ehanidkkulnu, da ele doyak diig genabib, doyak amuam ag Kayaknu neekkakppa genab tutukku hak danab daaglagnu ippunadtte amu, da ag doyak amu ele ippunadkkulnu meiɗe uɗimi.

² Doyak diig genabib amuam he, ag bauklel hanhannu aoppig daatteb dootteb. Kayak, Nug hambuppuak nakok laa iinab maditte amu, Nug ag bauklel hanhannu amu aoglagnu anukkanab, keeke ii heum haenppa nai qakka aum.

³ Amu Nug haen tituanom ele amu elele antta, Nug he, nai mehuqakppa nuhig nai amu miag atiom. Kayak, Nug ig eɗua awikkom ele amu, Nug da ele nai amu mehuqkkulnu uɗat meɗom.

⁴ O Taitus, i oh ooppa genab doyak laippu aɗattep, ooppa genab doyak amuppa na da bekkalnab daattem amu, da nahipnu iikku yaattem. Mame Kayak, amu ihinig Eɗua Awikkak Danab Jesus Kristus ele, ahilah ehanittak okkai hamu mettak, amu ahilah maɗoɗ ele nahip-ppa daaglahnu ool daatte.

⁵ Da na Krit nudppa daakkutnu uuidmi amu, amunu diig amu da anukka na amenppa ami amubia, na dahil uɗat pehettan tuɗidna, elele mettan, na Kristen tamaniak ooppa aab aben abenppa ikki danab otiadkkutnu appa uuidmi.

⁶ Aun laa nug ikki danab daakku dayeb amu, nug Kayaknu neekkakppa ooppa kaliak laa iitta, nug ah laippuib gamu ele daakkuoitte. Ele amu, nug bekkod ag Jesusnu oolagppa genab doon, ag laa dilag neekkakppa kobol dubuttid ele, oɗe tappe nak kobol ele, ag amu ii hemananu daatteb. Na danab amubia na ikki danab anidna maadkkutnu elele.

⁷ Kristen tamaniaknu gumak ikki danab amu, nug Kayaknu uɗat gumatte amunu, nug Kayaknu neekkakppa ooppa kaliak laa iitta ele daakkuoitte. Nug beɗuppa tak danab aib dayom, nug oppoɗi paha aib beum, nug le ɠagattag huana aib laum, nug la guittak nau mauhnoak mettaknu tiigppa dayak danab aib dayom, amu nug men doɗo kuɗum awaknu hik aib qeum.

⁸ Nug amu ii hema. Iitta! Nug ɗo danab aab laappanu uɗippeg amu ehanattaɗ! Nug kobol ena ohnu oo mauhaɗ! Nug nukka nug nuhig oiyak pehettak atognoaɗ! Nug tutukku, oppiaawak ele dayaɗ! Nug nukka beɗu atognoa hagakka awak ele oiyaɗ!

⁹ Nug danab ah ippunittak nai genab ena eleppa oolag ɠagattag qekkunu, nug ɗo tappe nak danab nai amuppa toliadkkunu, nug nai danab aun aɗi ag nai amunu oolagppa genab doon ib ii apiɗidmana, tamaniak dilag ikki danab ag nai amu danab ah ippunatteg uɗie, gemu ele hetteb amu, nug nai amu ɠagattag aɗaɗ!

¹⁰ Aɗinu? Nai tappe nak danab, ag oɗelagppa nai meu iitta hambuppuak kuɗum maditteb ele, ag kuɗum daatteb. Danab amunu oolagppa Juda laa ag gaɗa otaɗaknu dabmak okkai aotteb ele amu, ag laa eɗattak anuqak daatteb.

¹¹ Danab amu ag hambuppuna, men doɗo aoglagnu ippunittak nau heegeg, laa ag ahilag nai dootteb ele amu, ag amunu ena anana, nob laa, men doɗo, madatteb. Danab ag ippunittak nau amu hetteb amu ag amu henana, ag laa nai ahilag dootteb ele kobol ig hekkunignu elele iitta ele amu ippunadna, kobol amuppa ag danab laala, ag waalkad bekkalkad ele oh amu ahilag dabmak kabolitteb amunu, na appe, danab amu ag oɗelag qamuteg!

¹² Anukka Krit danab ag ahilag propet laa nug nukka kobol amunu aum. Nug inam aum. “Krit danab ag nai hambuppuak danab ah. Ag am doɗ dakkuɗ nau, ag ee huanak lanana, bahilag ele yaatte,” awa aum.

¹³ Nai amuam genab amunu, ag ooppa genab doyak tutukku mettaglagnu, na ag daulag ɠagattag bate!

¹⁴ Ag Juda dilag kaya hamu, amu danab laa ag doyak diig genabib dimettan, haknunab nai laala metteb ele amu, ag Krit ag nai hamu amu, haknunab nai amu ele dim lamidmananu na appe doyeg!

¹⁵ Am danab ag oolag dubuttid iitta ele amu, ahilagnu keeke oh am oppiaawak ele daatte, amge danab ag dubuttid ele, ag oolagppa genab ii dootteb ele amu, ahilagnu keeke oh am oppiaawak iitta. Ahilag dabmakppa, ahilag ooppan oiyak ippunittaknu ulum eleppa dubuttid aakku teum daatte.

¹⁶ Ag oɗelagppa, “Ig Kayak doottem,” atteb, amge ahilag hakppa ag Kayak dimedatteb. Ag danab naunab, oɗe dim lamittak danab iitta. Kobol ena laa ahilagppa ii daatte amunu, ag ena hekkulagnu elele iitta.