Solomonnu Ahi 8 - Nobonob Baibel

Wau, tuɗitta, gamu amegppa atte

¹ O danab dahil, na da awal, nug da ele oh i aninihnu huh lamuɗ ele, na nug daalom amu; da na dimittim anittenlob, da ⌊ihinig kobolppa⌋ na aɗaitten, ootuqidlom. Anam daalo, da anam heppilob amu, laa nug dahil hak amunu dahilnu ena iinab doyak ii doolo.

² Anam daalo amu, da nug da anil laugppa omaitten golom; appa da anil nug da ippunittak meɗom. Appa amu, da wain ena mettalom; wain amuam pomigranet dahil lebuppa hak.

Wau nug nukka nuhignu nai maditte

³ ⌊Laa nug dahilnu oo mauhtte ele amu,⌋ nug eppeg naneh da ikkil waappa ma aɗaɗa; eppeg naɗiap-ppa da aɗailtte.

Wau nug laikkud Jerusalemnu amelagppa atte

⁴ O Jerusalem ah, ag wan yaan meɗan, da amelppa, “Ig genab oo mauhak nug oo ii daatte haenppa ii maɗettamta,” akkulagnu ag amelagppa ɠagattag attem.

Wau laikkud Jerusalemnu ag ahnu atteb

⁵ Laa nug atu taɗakppanu, laa nuhignu oo mauhtte ele ehanittette uɗitte amu, nug am aun? Apel ad laa waappa, appa na mamen nug na anin na mettom, appa na anin nug guittak naɗi doyaya menuittom amu; appa da maɗettidmi.

Wau gamu amegppa atte

⁶ Amu nahip doyaknu at stemp-ppa daatte, keeke amuam na momonppa aihak daatte amu, da anambia daakkulnu ool daatte. Ao, nahip doyaknu at stemp-ppa daatte, keeke amuam na eppenppa qakkak daatte amu, da anambia daakkulnu ool daatte. Aɗinu? Oo mauhak am keeke ɠagattagnab. Ao, laanu oo hak huanak am keeke uug naunab ele eɗidkkunu elele. Oo mauhak am aab ewak bia; am aab ewa auta autanab aotte bia.

⁷ Danab nug le okkai aab ewakppa gokkaɗeb, aab ewak iitta mekkunu elele, amge laa heeb, oo mauhak ii iitta mema. Ao, laa nug le huanaknab aab naɗi ewakppa gokkaɗeb, aab ewak am qauhkku, amge laa nug heeb, oo mauhak ii iitta mema. Danab nug en nuhig ohppa oo mauhak daden mekkunu helo amu, en amuam elele iittanab iitta; am keeke nagnag bia. Oo mauhak am keeke okkainab.

Wau awakkud ag appinalagnu, akka akka nuhignu maditteb

⁸ Ig appinanig laa dimunigppa neum ele, nug huhukuɗ am digma ii qabatte. Ao, nug anam daatte, nug ahnab ii meum. Nug anam daatte amunu, laa nug nuhig ah daakkunu anak haen ameg maknu amu, ig appinanignu attem hekkunig?

⁹ Nug gilil laa daalo, laa nuhigppa eheɗ hemanu ig aɗ laa silwappa hak gilil amu nug talilidkkunu helom. Ge, nug od daalo amu, laa eheɗ nuhigppa hemanu ig ad sida plang teppunab ele aot, amu hemanu ib keldolom.

Wau nai maditte

¹⁰ Da gilil bia daami. Da eheɗ hekkulnu ool ii daye, da dakka da awaitte, pehetten dahil oiyak atognoin oiiyi, huh dahil ba mappattom, haen amu dimppa ele da anamib oimi. Ao, da anam oiiyi ukke, da ah okkai, oolppa dubuttid nakok laa iitta bein daaiyi, danab laa nug gemu da gamul daatte, nug aniɗa, da nug wau daakkulnu dabma, awiɗkkunu oo daye, nug he, da nug wau bemi daattem, amu nug ooppa uug laa ii dootte.

¹¹ Solomon nug Balhamon appa nug grep dad laa ele, amu nug me, appan danab laala ag Solomon men doɗo maɗ maɗppa mettanna, dad amu guman, dad amunu meu aoglagnu nug ele nai qagappig. Nai qakkak amuppa amu, appan danab ag dad amuppa anam hekkulagnu, ag anen anen Solomon 11.5 kilogram silwa mettaglagnu bappaidppig.

¹² Anam, amge grep dad dahilnu ⌊amuam da meul oh,⌋ dad amuam da gamul Solomonnu aakkuib daatte, da amu oh nug medattem; grep dad nahip laa, O Solomon, amuam nahip, na 11.5 kilogram silwa appanu aokkut, amuam nahip, amu 2.3 kilogram silwa am laa ag dad amu gumatteb ele dilag. ⌊Amge dahil grep dad amu, dad amu ohnab am nahipib daatte.⌋

Gamu nug wau amegppa atte

¹³ O ah dahil, na nahip dad ooppa daan, na laipad ele nai maditteb; na da ele nai mattignihnu oɗ medattem.

Wau gamu amegppa atte

¹⁴ O danab dahil, na dahilnu oot mauhtte. Doɗ gasel, o doɗ dia bau, doɗ amu ag qaukoppa, spais bettebppa qaiettan gotteb amu; na anam qaiettan, dahilppa uɗikkutnu ool daye, anam hekkutnu od medattem.