Solomonnu Ahi 7 - Nobonob Baibel

Gamu nug wau amegppa atte

¹ O ah dahil, na king bekka aɗeg daattem, amu na baen laih laih oh am baeg gaɗa ooppa neekkak enanag; na tuɗin am neekkak enanag, am danab uɗat men daden nob okkai eleppa haknu doyak okkai ele, nug men enanagnab awa, elelenab bappaidtte, amubia.

² Na hiuɗin diig am tappiɗ, amuppa wain digdig kaboliak hanhan daatte, am amubia daatte. Yo, na oot am wit aeg qagmak okkai, lili haɗag talilittak ele, amubia.

³ Doɗ laa onig gasel, amu anig laa nug nid gani ele menuateb, ahilah neekkak am enanag daatte; amubia na huhun laih laih oh am ahilah neekkak enanag.

⁴ Lag attan ta ukkak aivorippa hak, am nuhig neekkak enanag; amu na baat ele amubia neekkak nuhig enanag daatte. Hesbon appa, aabnu aɗ od onig Batrabim, appa le gottu aɗit, neekkak ahilah enanag ele daattep; am na amen laih laih oh ele amubia neekkak enanag daattep. Aab okkai Damaskus guguittak am lag attan ta ukkak menppa hak laa appa onig Lebanonnu lag attan ta ukkak daatte. Lag amuam neekkak enanag; amu na noom ele am neekkak enanag, amubia daatte.

⁵ Qauko Karmel nug aben amuppan qauko laa oh eɗattak daatte, neekkak ele am enanag; amu na ikkin ele amubia daatte; king laulkadppa lamen ena, amuppa piksa enanag hak ele daatteb; amu na ikkin uɗug, nuhig neekkak am enanag amubia daatte; da king, da na ikkin uɗug neekkitten, nahipib daakkulnu doottem.

⁶ O ah dahil, da nahipnu ool mauhtte, oolppa ele ena doottem. Na ah iɗun tuqaknab ele. Na beɗun oh am anamib. Nahipnu amu, da enanagnab doottem.

⁷ Na ad onig det pam bia, na ah elab, pattibtib, awat iitta ele; nahip huh aɗit am ad det pamnu meu uu aɗit bia daattep.

⁸ Na anam daattem amunu, da ami. “Da det pam ad dahil tein; da meu nuhig aɗakkul,” awe ami. Huh nahipaɗ am grep meu aɗa auta awak bia daaglahnu ool daatte. Ao, na oɗen ouɗi am apel ad muttuɗig bia daakkunu ool hette.

⁹ Ge, na oɗen am wain enanag bia daakkunu ool daatte. Wain amuam laa dahilnu oo mauhtte ele, am nuhignu; nug layaya, enanag dookkunu ool daatte.

Wau nug gamu amegppa atte Wau nug laa amelagppa gamunu atte

¹⁰ Laa nug dahilnu oo mauhtte ele amu, da nuhig daattem; nug dahilnu, nug oo okkai daatte.

Wau nug gamu amegppa atte

¹¹ O danab dahil, na dahilnu oot mauhtte, na ahappe, i laih aab okkai dimittim goɗu! Ao, i ahaɗ, aab dimittim goɗa, tuqan imuppa i ma lakka daaɗu!

¹² I dayoɗa, buttuanab ahaɗ, grep dadppa goɗu! Ao, i goɗa, appa i muɗi grep am eppeg bau mettebtai anadɗa; haɗag ele mappatppigtai anidkkunih. I ele pomigranet ag ahilag bala mappatppig am anidɗu! I anam goɗa, appa da oo mauhak dahil oh na medakkul.

¹³ Appa amu, mandrek ag haɗag mappat-tteb; muttuɗig enanag ahilag am tuala gotte. Aɗi ad meu ena, na amunu oot hette ele amu, da bappaidmi daatte; laa na matu lame, laa na nakok laa lana ii doome ele, da bappaidmi. Amge o danab dahil, na dahilnu oot mauhtte, da amu oh na lanan, ena dookkutnu bappaidmi daatteb.