Solomonnu Ahi 6 - Nobonob Baibel

Wau laikkud Jerusalemnu ag wau amegppa atteb

¹ O ah iɗun tuqaknab ele, na ah iɗulag tuqak laa oh eɗattak daattem amu, laa nug nahipnu oo mauhtte ele, nug adeppa ukkom daatte? Ig na nug madippeppe, ig ele nug mattita anidta mettagnignu amu, na appe, nug ib atten awa ukkom appe dootu!

Ah nug laikkud Jerusalemnu amelagppa atte

² Laa nug dahilnu oo mauhtte ele amu, nug dad nuhigppa ukkom daatte. Nug dad laa, amuppa spais oh daattebppa ukkom. Nug dadppa hamu oiyaya keeke andatta, lili bala ele diikkunu ukkom.

³ Da laa nug dahilnu oo mauhtte ele, da nuhig daattem. Nug dahil daatte; Nug dadppa bala lili oolagppa hamu oiyaya, keeke anidtte.

Gamu nug wau amegppa atte

⁴ O ah dahil, da nahipnu ool huan mauhtte. Na am ah iɗun tuqak ele. Aab onig Tirsa, nug neekkak nuhig enanag, amu na ele amubia daattem. Ao, Jerusalem am neekkak enanag, am na ele amubia daattem. Genab, na bannu huu laa ag ahilag pilak aɗan, neekkaknu enanag ele daatteb amu, na amubia daattem.

⁵ Da neekki ukke, na amen anitti, da beɗul gai-iitta mette amunu, na neegppe laih gokkunu oɗ medattem. Na ikkin uɗug ele am neekkak nuhig enanag. Ao, am meeme ameg laa ag qauko onig Gileat heqoppa nenan ukkaegeg, danab enanag anadtte, am anamnab daatte.

⁶ Na aen am hakkabnab, sipsip danab geha iikku uɗig otaɗeg ukke, le ihaeg daatteb bia. Ao, na aen oh am iɗu laippu; laa okkai, laa nakok laa iitta. Na aen oh daatteb, laa ii kaumom.

⁷ Na hippen laplap oh am iɗu hautaknu lamen dimugppa ad pomigranet meu gamagppa obatak laih laih daatte bia daattep.

Gamu nug laa amelagppa waunu maditte

⁸ Da king, da waalad oolagppa kuin 60 daaloblob; aria, da waalad oolagppa da waalad amge waaladnab iitta 80 daaloblob; amu ah makkun ebqaknu elele iitta da waalad daaglagnu diilomnu elele daaloblob; ⌊ah amu oh oolagppa da ah dahil imunu anuqak doolom.⌋

⁹ Ah dahil imu, nug dahil uppuɗil beɗulag nakok, nuhig neekkak enanag ele, nug dahil ah qa oppiaawaknab ele amu, nug am ah laa oh bia iitta; ag oh daatteb, amge nug nukka, nug piɗe, ag bianab ii daatte. Nug anig nug aɗeg laa iitta, dahil ah, nug nukka; anig nug nuhikkud nid laa oh dilagnu oo hette, amge nug dahil ahnu amu, nug nuhignu oo huana hette. Ah bau ag dahil ah imu, ag nug anidna, ag dooppig, nug itittak ena awom daatte; aria, kuin laa oh, amu king wauud amge wauudnab iitta oh ele, ag nug binag meppig.

¹⁰ Laa ag nug anidna, ag oɗ mettan atteb. “Imuam aun? Nug iɗu tuqaknab, aam digma bette bia, o kalamnu haɗak, amubia, o aamnu amahalak, amubia, o hoɗoppai ag ag ippulag dim lamidna gotteb, ag ahilag neekkak enanag ele, nug amubia daatte.” Ag anam atteb.

¹¹ Da adnu dad laa, ad am kanaɗ meu bia meu otteb, da dad amuppa gomi. Ao, da aɗi keeke bau bette, da amu anidkkulnu, oolnu noakppa gomi. Da muɗi grep eppelkad bau mettebtai; o pomigranet haɗag mappat-ttebtai anidkkulnu gomi.

¹² Da amu heiyi, da dahil dabmak eɗile, dahil ah nug he, da king, nug nuhikkud danab ah kuɗum gumatta dayaya, enanag dootte amu, da enanag, doyak amu eɗittak da doomi.

Gamu nug wau amegppa atte

¹³ “O na laa, na oppiaawaknab daattem, na eɗun, dahilppa neekke! Na eɗun dahilppa neekke! Da haen elab neegppi ukkeb, naib anidkkulnu na eɗue! O na eɗue!” Na dahilnu, “Nug qa oppiaawaknab daatte,” attem amunu, diig amunu na da haen elab neekkiɗttemte? Ao, diig amunu na laa ag ahi goɗak huu aɗitppa ahi goɗan autna aotteb neekkadna daatteb bia, na da neekkiɗna daattemte?