Solomonnu Ahi 5 - Nobonob Baibel

Gamu wau amegppa atte

¹ O ah dahil, na dahil ah daakkutnu awidmi. Da dahil dadppa iikku bemi; dad dahil imuppa amu, da keeke muttuɗig enanag mir, spais digdig ele aomi. Da ippa uppuh leppu ataɗa nette, uppuh leppu teɗppanu ele lainne; da wain, huh ele lami. O ig lainti, aa ee, le ele laiɗ! Ao, danab le elelenab lanana, elele dootte, amubia aa nug oo mauhak doottep ele, aa lapeɗ, eleleppa taɗ!

Wau laikkud Jerusalemnu ag ewau, gamu nug wau ele oh amelahppa atteb Wau tul niia, aha oitte

² Tuqan laappa da niimi, amge da niie gad ii mein, da tul niimi. Da tul niiiyi, laa dahilnu oo mauhtte nug od dahil qeqalele dooiyi, nug aum “O ah dahil, na dahil ah daakkutnu awidmi. Da nahipnu ool huan mauhtte. Na dahil uppuɗil beɗulag nakok, anttak enanag ele daattem. Nahip-ppa nau nakok laa ii daatte. Na od matulna meɗe! Da tuqan imuppa dimittim oiiyi, baito na, da ikkil leppu mettom. Ao, baito da ikkil uɗug bauɗe, ikkil uɗug leppu ele daatte amunu, na od matulna meɗakkutnu oɗ medattem!” awa aum.

³ Nug anam aum, amge da ami. “Da lamen elab uɗen, niiaknu lamen takkami daattemde amunu, da ahen, lamen elab baula tagakkulte? Ge, da bael ihamide amunu, da ahen, tappe wain, od matulen, bael baula ihakkulte?” Da anam ami.

⁴ Da anam awoya daaiyi, da gamul, dahilnu oo mauhtte ele, nug od matulkkunu heum; nug anam heehe amu, da ool gamag eheɗnab ahom, ⌊amge qakkak daye, matulkkunu elele iitta⌋.

⁵ Nug anam he doyen, da gamag ahak huanak am doye, da laa dahilnu oo mauhtte amu, da od matulen medakkulnu ahai, goɗen muttuɗig enanag onig mir da eppelppanu toɗotoɗoetta neum. Ge, da goɗen muttuɗig onig mir huanak dakka laidmi, amu goɗen amu eppel doɗoppanu neene, da manak qaknu keeke matulkkunu aɗami.

⁶ Da aɗen, od matulen, laa dahilnu oo mauhtte ele mettami; amge nug appa ii dayom, nug ukka malom. Da nug baag baula dookkulnu ool huana dayom. Da nug anidkkulnu mattimi, amge da nug ii anidmi. Da onigppa emi, amge nug da oɗelppa nakok laa ii awom.

⁷ ⌊Danab dahil da oɗelppa ii awe, da dimittim wain oiiyi⌋, aɗi uɗitte anittak danab ag aab okkaippa appa ahilag uɗat henan oinna, ag da aniɗna ⌊ag dahilnu, “Ah nau,” doon⌋; ag makkuɗilna, guittak meɗappig. Ag amu henana, ag ulahnu lamen dahil aɗan, ɠagattag aɗan, eeɗna aoppig; aɗi uɗitte anittak danab amu, ag aakku, ag amu heppig.

Ah nug laikkud Jerusalemnu amelagppa atte

⁸ O Jerusalem ah, da ag laa, nug dahilnu oo mauhtte ele, ag nug anidna, ag nug amegppa dahilnu, “Nug nahipnu oo mauhak huanak doyeye, beɗu gai-iitta meum daatte,” appeg dookkunu wan yaan meɗan, da amelppa ɠagattag akkulagnu ag amelagppa attem.

Wau laikkud Jerusalemnu ag wau amegppa atteb

⁹ Na am ah iɗun tuqaknab ele, am laa na nuhignu oot mauhtte ele amu, nug danab laa oh attem eɗadtte. Ge, laa na nuhignu oot mauhtte ele, am nug danab laa oh attem eɗadtte amunu, na ig wan yaat mettata, nai amu akkunignu ɠagattag ig amenigppa attem amu, na amunu diig appe, ig doognignu oɗ medattem.

Ah nug laikkud Jerusalemnu amelagppa atte

¹⁰ Amu laa nug dahilnu oo mauhtte ele amu, nug am danab iɗu tuqak ele, nug danab ɠagattag; danab 10,000 oolagppa amu, nug enanag daatte, nug laa oh eɗattak daatte.

¹¹ Nug ikki am gol ena dubuttid iittanab ele, amubia; nug ikki uɗug am hinqaknab, am qe ta, qe nak ele.

¹² Laa dahilnu oo mauhtte amu, nug ameg laih laih oh am amemɗiag aottep, uppuɗil beɗulag nakok lenag daugppa daan, ag amelkad amemɗiag aotteb bia. Ao, nug ameg laih laih oh am men daden nob okkainab ele huhppa ihak aɗaknu keeke enanagnabppa qataqak daatte, am anambia daattep.

¹³ Nug hippeg laih laih oh am spais digdig muttuɗilag enanag ele dadppa daatteb, nug hibekuɗ amubia daattep; nug otti am bala lili, mir huanak bala haɗagppa ataɗa nak daatte bia daattep.

¹⁴ Nug eppeg am ad eppeg, golppa hak, men krisolait amuppa qataqak daatteb, aa amubia daattep; nug meu am aivori amemɗiag aotte ele, amu men sapaia, amuppa qataqak ele, am anambia daatte.

¹⁵ Nug baeg am biidod men onig mabelppa hak, tatap gol ena dubuttid iitta eleppa hak daatteb bia daattep; nug nuhig neekkak am enanag, Lebanon wan bia daatte; nug Lebanon wanppa ad sida ena ena daatteb, nug amubia daatte.

¹⁶ Danab laa nug ee ubuhinab ele lakkunu oo huan hette, amubia da dahil danab ootuqitte, da anamnab doottem; nug iɗu tuqak aakkuib daatte, aɗitai laa nuhignu am nakok nau laa iitta, enanagib. O Jerusalem ah, amuam laa, nug dahilnu oo mauhtte ele, nug da layal.