Solomonnu Ahi 4 - Nobonob Baibel

Danab nug wau amegppa atte

¹ O ah dahil, da nahipnu ool huan mauhtte. Na am ah iɗun tuqak ele; ge, na am ah iɗun tuqaknab ele. Na amen ele am anttaknu enanagnab. Uppuɗil beɗulag nakok ag amelag enanag, amu na amen ele, na iɗun hautak dimugppa anamnab daattep; na ikkin uɗug ele am anttaknu enanag. Amu meeme ameg laa ag qauko onig Gileat heqoppa nenan ukkaegeg, danab enanag anadtte bia daatte.

² Na aen am hakkabnab, sipsip danab geha iikku uɗig otaɗeg ukke, le ihaeg daatteb bia. Ao, na aen oh am iɗu laippu, laa okkai, laa nakok laa iitta. Na aen oh daatteb, laa ii kaumom.

³ Na ottin am kokoɗnab; na oɗen am neekkak enanag. Na hippen laplap oh am iɗu hautaknu lamen dimugppa ad pomigranet meu gamagppa obatak laih laih kokoɗ daatte bia daattep.

⁴ Dawitnu lag attan ta ukkak menppa hak am anttaknu enanag, amu na baat am anttaknu enanag, lag amubia daatte; danab ag lag amu elelenab heppig. Ag lag amuppa guppiɗ 1,000 kalele bia aihadppig daatteb; guppiɗ amu oh am ban danab ɠagattag dilag guppiɗ.

⁵ Doɗ laa onig gasel amu, anig laa nug nid gani ele menuateb, aa nakok okkai meya, lili ooppa ee layaya daapeɗ, ahilah anatak am enanag; amubia na huhun laih laih oh, ahilah neekkak am enanag.

⁶ Qauko mirppa hak, amuppa dayak am enanag. Ao, qauko nakok kalu danab ile, muttuɗig enanag bedeppa hak, amuppa dayak am enanag. Amubia amu, haɗaetta wagkkaɗkkunu haen ii bak, haen amuppa da paha goppi, na ele daagnih.

⁷ O ah dahil, da nahipnu ool huan mauhtte. Na ah iɗun tuqak ele, enanag daattem; na beɗun ohppa laih laa anttaknu nau nakok laa ii daatte.

⁸ O ah dahil, na Lebanon appanu da ele eɗuɗ uɗignih. Ge, i oh laippu oiɗa, Lebanonnu uɗignih. I qauko Amana, qauko Senir, am qauko Hermon ele uuɗ uɗignih; qauko amuppa doɗ laion, doɗ lepad ele teɗ menan daanna oitteb amu, i appanu eɗuɗ uɗignih.

⁹ O ah dahil, na da gamalnab, na dahil ah daakkutnu awidmi. Na nakokib neekkiɗe, na dahil ah daakkutnu, da na gamut daakkulnu ool dayom. Ge, da nahip kalelenu men daden nob okkainab ele laippu nakokib antte, na dahil ah daakkutnu, da na gamut daakkulnu ool dayom.

¹⁰ O ah dahil, na dahil ah daakkutnu awidmi. Nahip oo mauhaknu amu, da enanagnab doottem, am ubuhi ele. Da wain lakkulnu ool hette, amge nahip oo mauhak amu, am wain lanak eɗitta auta autanab aotte! Spais ena ena digdig am muttuɗig enanag, amge leppu muttuɗig enanag na beɗunppa laidttem amu, muttuɗig amuam spais amunu muttuɗig eɗitta auta autanab aotte.

¹¹ O ah dahil, ubuhi okkai, uppuh leppu teɗppanu ataɗa nette bia, na ottinppa daatte. Ao, uppuh leppu, makau huh ele am na lemaɗun waappa daattep; amu nahip lamennu muttuɗig am enanag, plang gikkiak Lebanon wanppan ad sidappanu, amubia.

¹² O ah dahil, na dahil ah daakkutnu awidmi. Na dahilib, dad laa, dad amunu aɗnu od lok qak daye, dad mameg nuhigib daatte, na amubia daattem. Genab, na dahilib, le qeppuɗia bak laa daye, le mameg, nugib ita laakkunu elele amu, na amubia daattem. Ao, na dahilib, le moɗ laa, mameg aakkuib appanu le itaknu elele, na amubia daattem.

^13-14 Na am dad enanag, amuppa pomigranet ad, meu enanag otteb ele eppak daatteb bia daattem. Dad amuppa keeke muttuɗilkad enanag ele, aria spais ele eppak daatteb. Amuam henna, nad, nad diig laa, safron, kalamus, sinamon, mir, alo, ad frankinsens digdig ele. Aria spais enanag laala ele appa eppak daatteb.

¹⁵ Na dattanu le qeppuɗia bak bia daattem. Ge, na am le moɗ laa, deɗ laa ii qaɗaiedatte, amunu le Lebanon qaukoppanu nette, na anambia daattem.

Wau nug gamu amegppa atte

¹⁶ Da dad bia daattem amunu, ulah yawalti uɗitteppanu, na ahe! Ao, ulah yau uɗitteppanu, na uɗie! Aa muttuɗig dahil tuala gokkunu amu, aa uɗiya iwaliɗeɗ! Laa nug dahilnu oo mauhtte ele amu, nug uɗia; nug nuhig dadppa uɗia, appa ad meu enanag laa, nug amu lakkunu ool daatte.