Solomonnu Ahi 3 - Nobonob Baibel

Ah nug gamunu laa amelagppa maditte

¹ Tuqan laappa, da qaɗaqaɗ dahilppa niieye, da laa, da nuhignu ool mauhtte ele, da nug gumiɗa uɗikkunu ool huan dayom; da ool amunab dayom, amge nug ii uɗiom.

² Nug ii uɗiom amunu, da dakka, dahilnu ami. “Da ahen, da aab okkai imuppa oikkul. Ao, da ib naunau, ib okkai ele matte oikkul. Da laa, da nuhignu ool mauhtte ele, da ukke nug madikkul,” awe ami. Ao, da dakka dahilnu anam awoya, da ahe ukke oimi, amge da nug ii anidmi.

³ Da anam oiiyi, aɗi uɗitte anittak danab ag aab okkaippa appa ahilag uɗat henan oinna, ag da uɗal teeg, da ag oɗ mattami. “Ag laa, da nuhignu ool mauhtte ele, ag nug nakok laa anidppigte?” awe oɗ mattami.

⁴ Da anam oɗ mattoya wain ukke, pahanab am da laa, da nuhignu ool mauhtte ele, da nug anidmi. Da nug antte, da nug aɗe, uuiɗa gomanu ɠagattag aɗami. Da nug aɗe, ii paɗami. Iitta. Da nug aɗen, omale ukke, da anil laugppa temi. Ao, da lag amuppa, anai oo laappa da menuiɗom amu, da oo amuppa tein, appa da nug paɗami.

⁵ O Jerusalem ah, ag wan yaan meɗan, da amelppa, “Doɗ gasel, doɗ dakkuɗ dia anig ele, aa onilahppa, ig genab oo mauhak nug oo ii daatte haenppa ii maɗettamta,” akkulagnu ag amelagppa ɠagattag attem.

Ah laikkud Jerusalemnu ag akka akka nai mattinna atteb

⁶ Laa nug atu taɗakppanu aab kah taata, wan ele aɗeɗe gotte bia uɗitte am aun? Ge, laa imu nug leppu muttuɗig enanag, mir, frankinsens, spais laa oh ele laihnu awa, dadennu mak danab dilagppanu awak, nug amuppa beɗu laitte, nuhigppanu muttuɗig enanag oowo doottem ele amu, nug am aun?

⁷ Antteg! Nug am Solomon, nug nuhig karisppa dayaya oitte. Nug karisppa daye, Israel dilag ban danab ɠagattagnab 60, ag nug atognokkulagnu talilidna daatteb.

⁸ Danab amu oh ag qep elab ele; amuppa ag ban hekkulagnu doon autna aotteb. Ag anen anen oh ag qep elab maɗolag heqo laihppa qakkaladna oitteb; ag tuqan kekeɗ king baneb uɗin, king heppeg nauhmanu, ag aakku babaittak daatteb.

⁹ King Solomon nug he, danab ag nuhig karis amu heppig; ag Lebanon wanppanu adppa heppig.

¹⁰ Ag karis amunu ebehi silwappa bappaidna, ag dayaknu aben nuhig ukku golppa hena, ag dayaknu balal qaɗeppa lamen perpel meppig. Aria, karis ooppan bala amu, Jerusalem ah ag oo mauhak kobol dim lamidna, ag bappaidna autna aoppig.

Wau nug Jerusalem ah amelagppa atte

¹¹ O ag Jerusalem ah, ag uɗin, King Solomon, nug king haɗ meum daatte amu, ag uɗin nug antteg! Haɗ amunu amu, haen nug awiɗe, i ewau dayaknu matulak aomuɗ, deɗ amuppa nug anig nug haɗ amu nug igippa meum; deɗ amuppa amu, king nug gamag ahak naɗi doyom.