Solomonnu Ahi 2 - Nobonob Baibel

Ah nug nukka nukka nai maditte

¹ Da am atuppan bala laa bia daattem. Ao, da am bala laa onig lili, bala amuam oolnu noakppa betteb, da amubia daattem.

Danab nug waunu atte

² Bala lili uud keeke qaun ele oolagppa bette; amubia ah dahil, da nuhignu ool huan mauhtte ele amu, nug ah laa oolagppa enanag anam daatte.

Ah nug gamunu atte

³ Apel adnu dadppa, apel ad laa am apel ad laa oh eɗattak daatte; apel ad laa anam daatte bia amu, laa, nug dahilnu oo mauhtte, nug apel ad amubia nid bau laa oh oolagppa eɗattak daatte. Da apel ad amu waappa, logoppa daakkulnu enanagnab doottem; apel ad meu lakkulnu ele ena doottem. Anamib, da danab dahil ele daagnihnu enanagnab doyeye; keeke aɗi nug da meɗatte amu, da amunu ele da oolppa ena doottem.

⁴ Nug da omaiɗa, hobul naɗippa ukkom; appa nug da neekkiɗeɗe, nug dahilnu oo mauhak dootte am, nug iɗuppa miagib dayom.

⁵ Da nug amegppa ami. “Da nahipnu ool huana mauhe, beɗul gai-iitta meum amunu, da eɗuen ɠagattag daakkulnu na grep meu qaɗaiettak batappatak meɗappe lai! Ao, da eɗuen, ena dookkulnu, na apel ad meu laa meɗappe lai!” awe attem.

⁶ Nug eppeg naneh da ikkil waappa ma aɗaɗa; eppeg naɗiap-ppa da aɗailtte.

⁷ O Jerusalem ah, ag wan yaan meɗan, da amelppa, “Doɗ gasel, doɗ dakkuɗ dia anig ele, aa onilahppa, ig genab oo mauhak oo ii daatte haenppa ii maɗettamta,” akkulagnu ag amelagppa ɠagattag attem.

Ah nug nai tuɗitta maditte

⁸ Doye! Laa dahilnu oo mauhtte ele, nug uɗitte! Ge, antte! Nug aakku uɗitte! Nug uɗiaya, nug qauko okkai tippalala; nug qauko nakok hamu tippala uɗitte.

⁹ Laa nug dahilnu oo mauhtte, nug am doɗ gasel, o doɗ dia gaiɗ, nug amubia daatte; amu antte! Nug ii launih gilil heqo laihppa daatte. Nug gililppa ulah ibuppa dayaya, neekke lag ooppa uɗitte; nug oo ⌊da daattemppa⌋, nug amuppa neekkakka daatte.

¹⁰ Laa nug dahilnu oo mauhtte ele, nug da amelppa aum; “O ah dahil, da nahipnu ool huan mauhtte. Da nahipnu amu, na ah iɗun tuqaknab ele doottem. Na am anamde, na niiak abenppan ahappe, ii goɗa oignih.

¹¹ Aɗinu? Antte! Oug haen iitta meum; gu haen ele gemu ii daatte, iitta meum.

¹² Bala ba, okkai meeme, ai ele ag gayak ahilag enanag hetteb. Ao, uppuɗil beɗulag nakok ag gayak ahilag enanag hetteb.

¹³ Ad fig meu tatamnu am digma oɗutte; muɗi grepnu bala ele mappatattegeg, muttuɗig enanag otte. O ah dahil, da nahipnu ool huan mauhtte, na ahan do! O ah dahil, da nahipnu, na ah iɗun tuqaknab doottem, amu na ahappe, ii goɗa oignih,” awa aum.

Gamu nug wau amegppa atte

¹⁴ “O ah dahil, na am uppuɗil beɗulag nakok laa men bai giɗoɗoppa daatte bia daattem; o iitta, na uppuɗil beɗulag nakok laa baippa gegeti ena laappa lokkuma daatte bia daattem. Na baatnu oqotti am ena, ubuhi ele; na iɗun am enanag, tuqak ele, amunu iɗun da ippuniɗe! Ao, na heppe, da na baat doye!

Wau nug gamu amegppa atte

¹⁵ Muɗi grep dadppa grep haɗag mappatadtteb haenppa amu, doɗ foks nakkud ag heeg, haɗag mappatppig nauhtteb amunu, meu ii otteb. Amubia keeke naunau ag heppeg, nug oo mauhak ihinih iitta memanu, na keeke nakok amu dahilppa daattetai, o nahip-ppa daattetai, na dabmenan heppe, iitta maɗ!”

Ah nug laa amelagppa gamunu maditte

¹⁶ Laa nug dahilnu oo mauhtte ele, nug am dahil daatte; da amu, da nuhig daattem. Doɗ gasel ag gikkiɗah, bala onig lili gamagppa daatte, gasel ag appa gikkiɗah aon latteb. Laa nug dahilnu oo mauhtte ele amu, nug doɗ gasel bia, da am bala lili bia daattem.

Ah nug gamu amegppa atte

¹⁷ O danab dahil, na dahilnu oot mauhtte, da na doɗ dakkuɗ gasel, o iitta na doɗ dakkuɗ dia gaiɗ, ag qauko qappakppa daatteb, na anam bia daappe ukkeb, atu haɗaetta, wagkkaɗkkun heebeb, na eɗun dahilppa uɗikkutnu oɗ medattem.