Solomonnu Ahi 1 - Nobonob Baibel

¹ Solomon nug ahi imu yom. Nug ahi laa ele yaalattom, amge ahi imu, am ahi laa oh nug yom eɗadtte. Ahi laa nug yom am imubia iitta; ahi imu doyaknu am doya, ittag qak enanagnab.

Ah nug gamu amegppa atte

² O danab dahil, nahip oo mauhak dahilnu am wain ubuhi ele lanak eɗidtte; amunu na baubau da ootuqiɗkkutnu ool daatte.

³ Leppu muttuɗig ena ele na laidttem am muttuɗig enanagnab ele. Ao, laa nug leppu muttuɗig ena ele amu gokkaɗeb, muttuɗig huana okku, am na onin am amubia. Ge, am anam, am diig amunu ah bau na waatad daatteb ele, ag nahipnu oolag mauhtte!

⁴ Na da omaiɗna gokkutnu ool okkai daatte. Ahappe, ii paha goɗu! O king dahil, na da omaiɗna, lag oo na daattem, amuppa gokkutnu ool daatte. Da na king, da nahipnu gamag ahak naɗi doottem, nahipnu enanagnab doottem; da wain enanag lain, “Wain amuam lanak baag ubuhi enanag,” attem, amge na king, na dahilnu oo mauhak okkai doottem amunu, da wain enanag binag mettem, amu eɗittak, da na binan okkai, attannab mettem. O dahil danab, ah bau na waatad daatteb, ag nahipnu oolag mauhtte amu, ag tutukku hetteb.

Wau nug laikkud Jerusalemnu amelagppa atte

⁵ O ag Jerusalem ah, da gaɗal am hinqak bia, amge da iɗul tuqak ele. Da gaɗal am hinqak bia, Kedar danab ag ahilkad doɗ gaɗa lag, amu beɗu bia. Ao, da gaɗal am hinqak bia, Solomonnu peh lag, amu beɗu bia.

⁶ Da gaɗal am anam daatte, amge ag Jerusalem ah, ag diig amunu ag amelag behabeb, aib neekkiɗppig. Ge, aam he, da anam daattem, amge diig amunu ag aib neekkiɗppig. Da awalad amalad ele, ag am dahilnu oolag nauhe heeg, da dimittim wain datta, aam gakkaɗakppanab uɗat heinne daaiyi, da gaɗal hinqeum; da dad uɗat amu hemi, amge da beɗul babaittaknu goɗen laa, o keeke laa laidkkulnu da elele iitta daaiyi, gaɗal inam beum daatte.

Ah nug gamu amegppa atte

⁷ O danab dahil, da am nahipnu ool mauhtte. Na gemu nahipad sipsip ag gikkiɗah lakkulagnu na adeppa omaladna gokkutnu am appe doyei! Ge, na gemu aam anig haenppa sipsip ag hik aon daaglagnu adeppa maadppe daaglag amu, na aben amu appe doyei! Da na laipad, ag ahilkad sipsip gumadnan daappeg, da na maditten anidkkulnu ag oolagppa oikkul am ena iitta; amunu da amu hepanu, na adeppa daakkutnu am appe dookkulnu ool okkai daatte.

Danab nug wau amegppa atte

⁸ O ah dahil, na am ah enanag, iɗun tuqaknab ele, ah laa oh eɗattak. Amu na da adeppa daakkulnu ii doottem dayeb amu, na sipsip dahilad baelag mattan gona, sipsip gumak danab ag ahilkad peh lag daattebppa tena, na meeme nakkud nahip appa gikkiɗah lakkulagnu atognoatte!

⁹ O ah dahil, da nahipnu ool huanaknab mauhtte. Na iɗun tuqaknab, nakka oilom amu, danab ag dim dim lamidlob.

¹⁰ Na dautppan bala am bid elab, bid amuam he, na hippen laih laih oh am neekkaknu enanagnab daattep; baatppa amu kalele, men daden nob okkainab eleppa hak daatte amunu, na baat ele am neekkak enanagnab.

¹¹ Ig nahip bid golppa heta; silwa ele amuppa mekkunig.

Ah nug gamunu nai maditte

¹² King nug qaɗaqaɗ teppu eleppa niitte amu; nug da leppu muttuɗig enanag ele beɗulppa laidmi amu doyaya, enanagnab dootte.

¹³ Muttuɗig enanag dahilppa daakkunu, da tuqan keeke muttuɗig enanag onig mir lamen qattippa qakkak huhulaɗ dahil gamagppa mei, da ele ouqaknab anam daatte; amu laa da nuhignu ool mauhtte ele amu, nug ele anamib daatte.

¹⁴ Aben laa onig Engedi appa grep dad eppakppa bala onig hena mappat-tteb; amu laa dahilnu oo mauhtte ele amu, nug bala enanag amubia dahil neekkakppa daatte.

Danab nug wau amegppa atte

¹⁵ O ah dahil, da nahipnu ool huan mauhtte. Na am ah iɗun tuqak ele; ge, na am ah iɗun tuqaknab ele. Na amen ele am anttaknu enanagnab. Uppuɗil beɗulag nakok ag amelag am enanag, amu na amen ele anamnab daattep.

Ah nug gamu amegppa atte

¹⁶ O danab dahil, na dahilnu oot mauhtte ele, na am dahil danab iɗun tuqak ele. Ge, da neekki ukke anittette, da na danab iɗun tuqakib anidttem. Niiak aben ihinih am atu ooppa, aben laappa wan etetuab enaib, aben enanagnab, laa wanppa niiaya, wan gai-iitta, anam dootte amu, niiak aben ihinih anambia daatte.

¹⁷ Amuppa ihinih mulug am ad sida; ihinih hol am ad pain.