Sepanaia 3 - Nobonob Baibel

Juda dilag hipunin, amu waappa daamnanu ehanittak awak ahilag elenu nai

¹ Jerusalem danab ah dilagnu am gadonnab gadon. Ag lailkad dilagnu nug eheɗ hattak kobol hetteb. Ao, ag nai tappe nak danab ah daatteb. Yawenu neekkakppa ag oolagppa dubuttid teum daatte.

² Jerusalem danab ah ag ulum nai laa oɗeppa aoglagnu uun autna aotteb. Ao, laa nug daulag batebeb, ag nai nuhig ii doomna; uuglag. Jerusalemnu danab ah ag Yawenu oolagppa genab ii dootteb. Ag ahilag Kayak ii dim lamidtteb.

³ Israel dilag ehanittak anuqak danab amu, ag danab ah dilagnu laion doɗ laa qa lakkunu oiyaya gaatte, amubia ag danab ah dilagppa hetteb. Ao, Israel ag ahilkad okkai danab ag doɗ wulp, ag tueb meeb, ag doɗ laa anidna, qena lalobnu oitteb bia hetteb. Doɗ laion, o doɗ wulp ag aɗi doɗ laa tueb qena lae neppig, butti buttua huppu nakok laa ii daatte, amubia hetteb.

⁴ Propet danab Jerusalem daatteb ele ag am beɗuppa tak danab daatteb. Ao, ag hambuppuak kobolppa keeke ag oolag hette ele, ag amu aotteb. Mana mettak danab Jerusalemnu ag kobol eheɗ heegeg, Kayaknu mettid lag, nuhig neekkakppa am dubuttid teum daatte. Ge, ag hambuppunna, Kayaknu ɗo inam inam ippunigtte atteb, amge Kayaknu ɗo anam ii ippunigtte.

⁵ Ag anam hetteb, amge Yawe Nug aab amuppa tuɗidib daatte, Nug am genab tutukku hak kobol aakkuib dim lamidtte. Nug kobol kaliak nakok laa ii hette. Deɗ oh Yawe Nug nai doya mala hettoɗia epeɗia elele mettak kobol dim lamidtte. Ge, deɗ oh Nug nai doya mala hettoɗia epeɗia elele mettak kobol ii hemanu uutte. Amge danab laa, nug am genab tutukku hak danab iitta, nug heumnu dabmaama, nug eheɗ heumnu uɗa nak ii dootte.

⁶ Amu Yawe Nug atte. “Da wanppan wan kuɗum hei, nauhna autna aoppig daatteb. Ao, da hei, ahilag ban haknu aben ɠagattag ele nauhppig. Da hei, ahilag aab okkainu ib amu, danab ah laa ag appa ii oitteb. Ao, da hei, appa auntai laa ii noa gotte. Ahilkad aab am nauhak daatteb. Danab o ah laa appa bau ii daatte.

⁷ Amu da Jerusalem danab ah amelagppa ami. ‘⌊Ag uug digdig da laa dilagppa hemi anidppig amunu,⌋ gemu ag Jerusalem danab ah, ag dahilnu ebehilag oh bodoetta le mekkunu doottem. Ao, ⌊ag anidna,⌋ gemu ag daug batak nai dahil doon, dim lamidkkulag ⌊amunu, da baula bu madakkulnu ii hepa⌋ doottem,’ ami. Amge iitta. Jerusalem danab ah ag anam heppiglob amu, ahilag aab nauhkkunu ii daama. Ge, dahil bu oh ahilagppa taknu ii daama. Anam, amge ag tuɗidna hipunin hekkulagnu oolag huana dayom. Ao, ag buttua ukka tueb batak hewona, tueb ukka buttua aam bette batak amuib henan daappig,” awa atte.

⁸ Jerusalem danab ah ag anam heegeg uɗie, gemu ele hetteb amunu, Yawe Nug atte. “Ag danab ah ⌊ag akka onilag qeeg ne oitteb amu,⌋ ag da amel meig! Ao, ⌊haen elab iitta amu,⌋ da ahen, da danab eheɗ hetteb amu ippuanatten, bu madakkul amunu, ag da amel meig! Aɗinu? Da matu inam dabmein, aakku hekkulnu daattem. Da heppi, wanppan wan ohnu danab ah qagmeppeg, da bu eheɗ madette, dahil oo nauhak huanaknab, dahil oppoɗi bak ameg kokoɗ eppak ele da amu ele doyen, bu amu madakkul. Ge, da Yawe, da oo nauhak laa, oo nauhak amuam dahil dooi laa aomanuppa bette, oo nauhak amu be, da haen amuppa oo nauhak amuppa heppi, wanppan wan oh ag nauhna autnanab aoglag.

⁹ Aɗinu? Da amu hewoya, wan atu ohppan danab ah ag da Yawe, ag da unuqilkkulagnu, ag oh laippu daan, ag da waalppa daan, da oɗel dim lamidkkulagnu, da heppi, ag amu hekkulagnu elele daaglag.

¹⁰ Amu da heppi, dahilad danab ah, ag da noolppa dup nona binal metteb, ag Kus wanppan le digdig eɗatta onak tamtam daatteb amu, ag eɗun uɗin, doɗ manadna da meɗaglag.

¹¹ Ag Jerusalem danab ah ag dahilnu eheɗ heppig, amge haen amuppa ag tuɗidna, uɗa nak akka ahilagnu ii doomna. Amu bekkunu diig amu, da heppi, laa ag dada kobol hena, ag amunu gamag ahak dootteb ele, ag baula aab imuppa ii daamna. Laa ag dada ha laa eɗittaknu dabmak awak kobol dim lamidtteb amu, ag ippa ii oimna.

¹² Da laa ag dagom danab, ag agakka ag onilag qeeg nette ele, da ag Jerusalem appa uuadppi daaglag. Laa amu ag da Yawe, ag dahilnu oolagppa genab dootteb. Da am Yawe.

¹³ Israel oɗo yaak danab ah daaglag amu, ag eheɗ ii hemana; ag hambuppuak nai ii mattimna, layag laa ele ii buppuidmana. Aɗinu? Ag sipsip ee lawona niitteb, amubia ag daanna, ag uug laa ii doomna; laa heeb, ii baɗamna.” Yawe Nug anam awa atte.

¹⁴ O Israel danab ah Sion daatteb ag, ag ahi etteg! Ao, Israel danab ah oh, ag oolag gamag aheb, ag huan qalan eig! Ag Israel danab ah ag Jerusalem appa daatteb amu, ag meulag ohppa ele oolag huan gamag ahaɗ!

¹⁵ Aɗinu ag Israel danab ah ag amu hekkulag? Yawe Nug ag bu aoglagnu nai daatte am heeb, bu awak amu am iitta meeb, ag baula ii aomna. Nug ahilkad kekeɗ lamadkku. Yawe, Nug am Israel dilag king daatte, Nug Israel danab oolagppa daakku amunu, ag Israel, ag baula uug naunab laa ahilagppa tekkunu ii baɗamna; iitta.

¹⁶ Haen amu uɗieb laa ag, ag Israel ahilagnu ag inam akkulag. “O Israel danab ah, ag aib baɗappig. Ao, ag oolag uug ele doonna, hamu aib daappig.

¹⁷ Yawe, ahilag Kayak, Nug ag oolagppa daatte; Nug am ban danab ɠagattag, Nug hanhan nuhikkud ehanatte, ag kekeɗ eɗadtteb. Yawe Nug ahilagnu enanagnab dookku. Nug ahilagnu oo mauhtte, amu amuppa ag maɗoɗ aoglag. Ge, Nug ahilagnu oo gamag ahebeb, ahi edakku,” aon akkulag.

¹⁸ Amu Yawe Nug atte. “Ag laa ag hobul dayaknu haen epeɗiaknu oolagppa uug doon mahitteb ele, da ag amuppa daaglagnu qagmaadkkul; laa ag heppeg, ag baula uɗa nak nau guittak ele ii doomna.

¹⁹ Haen amuppa amu, laa ag ag Israel danab ah eheɗ hadappig amu, da ag bu eheɗ madakkul. Da dahilad laa ag eheɗ daatteb ehanadppi, ag eɗun uɗiglag. Ao, kekeɗ ag heeg, ag laih laih matatun gona daatteb amu, da ag qagmaadkkul. Da heppi, wan atu laihppan danab ag dahilad danab ah heeg, laih laih matatun gona daaegeg, appa ag aon aon aqan, uɗa nak madappig ele amu, danab ah amu ag dahilad danab ah binalag mattaglag.

²⁰ Genab, haen amuppa da qagmaadppi, ag oh laippu daaglag. Ao, haen amuppa da heppi, ag laih laihnu eɗun uɗin, ag appalkad diigppa daaglag. Amunu haen da ahilag neekkakppa heppi, ag eɗun ag wanelagppa ena daaglag amu, haen amuppa, kobol amuppa danab ah laa ag, ag Israel ahilagnu, ag am onilag, binalag ele dooglag.” Yawe Nug anam awa atte.