Sepanaia 2 - Nobonob Baibel

Juda danab ag oolag eɗueb, Yawe dim lamidkkulagnu ewak

¹ O Juda danab ah, ag uɗa nak ele amu, ag qagmena ⌊oolag eɗueg⌋!

² Ag deɗ laa, deɗ amuppa Yawe Nug danab ah bu madakku amu, ag gemu deɗ amu ii nak, ag haen imu qagmena ⌊oolag eɗueg⌋! Deɗ amuam pahanab uɗitte; ulah ee aeg dappunkkeg iwale, pahanab laih gotte bia uɗitte. Deɗ amuppa Yawe Nug danab ah bu madakku amunu, deɗ amu ii nak, haen imuppa ag qagmena, ⌊oolag eɗueg⌋! Ao, ⌊ag oolag ii eɗueb,⌋ Yawe Nug ag bu eheɗ nau madakku amunu, Nug amu hekkunu haen ii nak, haen imuppa amu, ag qagmena, ⌊oolag eɗueg⌋!

³ Ag Juda danab ah laa ag akka ag onilag qeeg ne, ag Yawenu haknunab anak dim lamidtteb ele amu, ag Yawe ehanadkkunu ii daye daye Nug oɗ metteg! Ag genab tutukku hak kobolnu ippu, laa nukka onig qeeb nak kobolnu ippu ele anidkkulagnu mattieg! Ag amu hekkulag dayeb amu, deɗ Yawe Nug danab ah bu madakku, deɗ amuppa Nug ag guppiɗ qalakppa maatteb, ena daaglagtai.

Yawe Nug Pilistia danab ah bu madakku

⁴ ⌊Yawe Nug heeb,⌋ danab laa Gasa appa ii daama. Ao, kekeɗ Askelon heppeg, nauha autanab awa daakku. Asdot appa ele kekeɗ ag danab ah lamadppeg, ag pahanab Asdotnu ahan gona malaglag. Aria, kekeɗ ag danab ah Ekron daatteb amu, ag eheɗ lamadppeg, ag ahilag aab uun gokkulag.

⁵ Anam amunu, ag Keret danab ah yu ihippa daatteb ele, ahilagnu am gadonnab gadon. Ao, ag Pilistia danab, Kanan wanppa appa daatteb amu, Yawe Nug ag bu madakkunu matu aum. Yawe Nug inam aum. “Da heppi, ag ohnab padal mekkulag. Ag oolagppanu laippu laa bau ii daama,” awa aum.

⁶ Keret danab dilag wan am yu ihippa daatte; amu wan ahilag am gikkiɗah dad okkai, sipsip gumak danab ag appa ahilkad sipsip atognoadppeppeg, sipsip ag appa gikkiɗah lanan daaglagnu aben, sipsip dilag aɗ itaglagnu aben ele daakku.

⁷ Israel dilag huu okkai Juda oolagppanu oɗo yaak danab ah daaglag amu, ag wan amu ahilag daakkunu aoglag. Ao, ag sipsip ahilkad diiadna, Pilistia wanppa goppeg, sipsip ahilkad appa gikkiɗah lanan daaglag. Pilistia iitta meppeg, laa appa nug laugppa ii daama, ag laulkad amu oh hamu daaglag amunu, tueb meeb amu, sipsip gumak danab ag Pilistia dilag aab okkai laa Askelon, appan danab laulkadppa niiglag. Aɗinu sipsip gumak danab ag anam hekkulag? Yawe, ahilag Kayak, Nug ag atognoatta, aɗi keeke bau daaglagnu daatte amu, Nug ag madakku.

Yawe Nug Moap, Amon danab ah ele bu madakku

⁸ Yawe Nug inam atte. “Da Moap ag dahilad danab ah dilagnu awa awa qettak nai naunab madippig amu, da ahilag nai amu da doomi. Ge, Amon danab ag dahilad danab ah dilagnu hippeg qakkak nai madippig amu, da ahilag nai amu da doomi. Amu oh ag dahilad danab ah dilagnu awa awa qettak nai naunab madippig, amu da nai amu doomi. Ele amu, da ag oh ag dahilad danab ah eɗadna, ag ahilag wan aoglagnu madippig amu, da amu ele doomi,” awa atte.

⁹ Amu Yawe Nukka Ɠagattag Oh Ele, Israel dilag Kayak, Nug imu ele atte. “Ag anam heppig amunu, da genab bau daattem, genab amubia da heppi, Moap wan am Sodom bia daakku. Ao, da heppi, Amon wan am Gomora bia daakku. Ahilag wanppa amu uud beppeg, ahilag wanppa wan moɗ ele daappeg, amuppa le yu ele daakku. Ahilag wan am meu waknu nakokib elele hanhan daakku amunu, dahilad danab ah oɗo yaak daaglag, ag wana, Moap danab ah, Amon danab ah ele dilag keeke akkan gokkulag. Ao, dahilad danab ah ag Moap, Amon ele dilag wan aoglag.” Yawe Nukka Ɠagattag Oh Ele Nug anam awa atte.

¹⁰ Moap danab, Amon danab ele ag dada danab daatteb; ag Yawe Nukka Ɠagattag Oh Elenu danab ah aon aon aqadppig. Ge, ag awa awa qettak nai naunab ahilagnu madippig amunu, ag nob imu aoglag.

¹¹ Yawe Nug heeb, Moap, Amon ele dilag kayak hambuppuak oh ag padal mekkulag amunu, Moap danab ah, Amon danab ah ele ag Yawenu ebehilag oh bodoetta le mekku. Yawe Nug anam ha maleb, wanppan wan ohppan danab ah ag ahilag wanppa Yawe noobppa dup nona Nug binag mekkulag.

Yawe Nug Kus, Asiria ele bu madakku

¹² Yawe Nug atte. “Ag Kus daatteb amu, da ag dahil qep elabppa bu madakkul,” awa atte.

¹³ Anam amu, Yawe Nug Asiria ele bu madakku. Asiria am Israelnu yawalti uɗitteppanu daatte. Yawe Nug heeb, Asiria danab ah, ahilag wan ele hele-ettak daappeg, ahilag aab okkai Niniwe am nauhakib daakku. Ao aab amuam atu taɗak, qaɗaiettaknab daatte bia daakku.

¹⁴ Niniwe am sipsip, makau ele dilag gikkiɗah dad okkai daakku. Ao, doɗ dakkuɗ kuɗum appa ana daaglag. Atu taɗakppan hipunai, hipunai gayak baag eheɗ ele appa king laulkad nauhakppa daaglag. Ao, ag lag loppaɗak amuppa daanna gaaglag. Lag loppaɗak amu odppa am kinipan ambak daakku. Aɗinu? Laa heppeg, lag nauhppeg, lag ebehi, ad sida ena ena amuppa lag amu hadappig ele, ad amuam miag atiak daaglag.

¹⁵ Aab okkai Niniwe amu, tatam appan danab ah ag gamag ahaknu qagmakppa daan, muttub qenana, ag baɗak iittappa daappig. Appan danab ah ag appig. “Wan atu ohppa aab laa ihinig aab imu bia laa ii daatte. Aab ihinig amu laa oh eɗadtte,” aon appig, Amge Yawe Nug heeb, Niniwe nauha auta autanab aokku. Aab naɗi amuam doɗ dakkuɗ laulkad daakku. Ao, danab aun aɗi ag laih gokkulagnu Niniwe gukkuidna wana gonana, ag aab naɗi amu aon aon qettaglag.