Sepanaia 1 - Nobonob Baibel

¹ Haen Amon bekka Josaia nug Juda dilag king dayeye, Yawe Nug nai imu Sepanaia mettom. Sepanaia nug Kusi bekka. Kusi mameg am Gedalaia. Gedalaia mameg am Amaraia. Amaraia mameg am Hesekaia.

Yawe heeb, baoliak okkai wanppa bekku

² Yawe Nug inam atte. “Da heppi, aɗitai keeke laa wan qaɗeppa ii daama.

³ Ah kinipan tate ukkak bia, da heppi, danab, am doɗ ele oh wanppa ii daamna. Ao, ah kinipan tate ukkak bia, ai hagagaɗna oitteb, kakai leppa oitteb, ag oh wanppa ii daamna. Haen da heppi, danab ah wanppa ii daamna amu, haen amuppa nau hak danab dilag keeke am kinipan ameg okkai hume tak aakkuib daaglag.” Yawe Nug anam atte.

Yawe Nug Juda bu madakku

⁴ Amu Yawe Nug inam atte. “Da danab ah Jerusalem daatteb, Juda danab laa oh ele bu okkai madakkul. Ao, da heppi, auntai laa nug kayak hambuppuak Bal noobppa dup noa binag mette, aria Bal dottog, nug noobppa dup noa binag mak hekkunu keeke oh ele amu, amunu keeke laa nakok laa ii daama. Da kayak hambuppuak dilag mana mettak danab aqappi mauhkkulag. Ao, da amu heppi, danab ah laa ag amu dilagnu baula ii dabmemana, ag daulagppa ele ii daama; ag wanppa ii daappig bia daakku.

⁵ Da heppi, laa ag laulkad koɗokko uɗem ukkakppa tena, appa ag aam, kalam, hoɗoppai ele dilagnu, ‘Umu ag am kayak laa,’ anana, ag amu noolagppa dup nona binalag metteb ele amu, ag oh nauhkkulag. Ao, da heppi, laa ag da, Yawe, ag da dim lamiɗtteb anan, ag da onilppa ele ahilag nai ɠagattag qettan atteb, amge ag kayak hambuppuak Molek onigppa ele ahilag nai ɠagattag qettan atteb amu, ag nauhkkulag.

⁶ Da heppi, laa ag anukka da noolppa dup nona binal meppig, amge ag uun uuiɗna, kayak laanu dabmetteb; ag da, Yawe, ag da aniɗna dim lamiɗkkulagnu ii mattiɗna, ag da ulum madakkulnu oɗ ii meɗatteb amu, da ag ele heppi, ag nauhkkulag.” Yawe Nug anam awa atte.

⁷ Ag Naɗi Yawe noobppa toettan dayeg! Aɗinu? Yawenu deɗ naɗi miag uɗiom daatte. Laa amu, danab nug mana mettak hewowa, doɗ amu teppu nuhignu daatteppa hobul hekkunu bappaidtte, amubia Yawe Nug hobul babaittom. Nug he, laa hobul amuppa daaglagnu ag nuhikkud daaglagnu tituanattak daatteb.

⁸ Yawe Nug atte. “Deɗ da mana mettaknu hobul hekkul amu, deɗ amuppa da kingnu ehanittak anuqak danab, king bekkod, amu laa oh wan laappan danab ah ag eheɗ hetteb bia eheɗ hetteb ele, da danab ah amu oh bu madakkul.

⁹ Ao, da laa ag kayak hambuppuak noolagppa dup nona binalag menan, ag laa guittak nau mauhnoak mattan, ahilkad keeke yab aotteb, ag hambuppuak ibuppa ag lailkad dilag keeke ele yab aotteb, ag keeke amu aon gona, ahilag kayak hambuppuak laulagppa metteb amu, da ag oh bu madakkul,” awa atte.

¹⁰ Amu Yawe Nug ele atte. “Deɗ da Yawe, da Juda danab ah bu madakkul amu, danab ah aɗnu od onig Kakainu Od guguittak daatteb amu, ag gaaglag. Amu danab ah ag aab ooppa aben bau heppig amuppa, ag mahiak okkai hekkulag. Amu aab ooppa qauko nakok daattebppa amu, appanu oqotti naɗi oobob dooglag.

¹¹ Keeke laihnu awa dadennu mak danab ag oh mauhkkulag. Ge, keeke laihnu awa dadennu mak danab ag silwappa ahilag uɗat hetteb amu, ag oh nauhkkulag. Anam amunu, ag laa, ag maket guguittak daatteb, ag oh huan gayeg!

¹² Amu da haen amuppa da, Yawe, da lam aɗe ugekke, da Jerusalem aab ooppa, aben ohppa neegppi gokku. Ao, da amu hein, da laa ag hipunin henan daan, amu haknu enaib dootteb bu madakkul. Ag ahilag haknu uug laa ii dootteb. Ao, ag, ‘Yawe Nug aɗi keeke laa ii hema. Ge, Nug keeke ena, o keeke nau nakok laa ii hema,’ anan oitteb.

¹³ Da heppi, kekeɗ ag uɗin, ban hena, danab ah amu dilag en aon gokkulag. Ao, kekeɗ ag uɗin, anam henana, ag danab ah amu laulkad loppaɗppeg nauhkkulag. Danab ah eheɗ anam hetteb amu, ag laulkad heppig, amge ag appa ii daamna. Ge, ag grep dad ebappig, amge ag grep dad amuppanu meu laa aon, wain laa hena, nakok laa ii lamana.” Yawe anam awa atte.

Naɗinu deɗ okkainab

¹⁴ Amu Yawenu deɗ naɗi okkai amuam miag uɗiom daatte. Ge, deɗ amuam paha neeb anidkkulagnu miagib daatte Deɗ amuppa, deɗ amuam Yawenu deɗ naɗi aakku, deɗ amuppa danab ah ag eheɗ gaaglag. Ao, ban deɗ amuppa daakku, amu ban danab ag ekkulag.

¹⁵ ⌊Danab ah ag hipunin qetteb amunu, Yawe Nug oo nauhehe daatte. Anam amunu,⌋ Yawe Nug danab ah amu deɗ nuhig amuppa Nug ag bu madakku. Ao, danab ah ag oolagppa uug nau doon, ag oolagppa guittak naɗi, nau ele dooglag. Deɗ amuam deɗ uug ele, keeke he nauhaknu deɗ. Ao, deɗ amuam deɗ gatatu ele daakku. Deɗ amuppa lombig wan atu oh tonebeb, amahlak ii daama.

¹⁶ Deɗ amuppa ban daakku. Danab ban hekkulagnu trampet iwalppeppeg, ban haknu ewak ele ekkulag. Ao, ag aab okkai ɠagattag aɗ ele, aria aabnu aɗ daug daugppa ban haknu lag attan ta ukkak menppa hak, ag amu ele aoglagnu ban hekkulag.

¹⁷ Amu Yawe Nug atte. “Danab ah ag da, Yawe, ag dahilppa hipunin heegeg uɗie, gemu ele hetteb amunu, da uug nau madakkul. Ao, da heppi, ag danab ameg gaɗuak ele ib antta, wana gokkunu ib maditte bia henan daaglag. Kekeɗ ag aqappeppeg, ag tiilag huanak, wanppan nekku. Ge, ag aqappeppeg, ag biilag am wanppa doɗ biiak bia daaglag,” awa atte.

¹⁸ Deɗ Yawe Nug danab ah bu madakku amu, deɗ amuppa ahilag silwa, o gol am nakok laa ii ehanadma. Yawe Nug danab ah nuhikkudnu, dahil doya laa aomanu doyak aɗa daatte, amge ag nuhikkudib daaglagnu ii heegeg, nug oo huana nauhtte. Oo nauhak amuam aab ewak laa huan ewawa, keeke oh he nauhtte, amubia daatte. Nuhig oo nauhak amuam heeb, wan oh nauhkku. Aɗinu? Danab ah oh ag wanppa daatteb, Nug heeb, ag padal mena autna aoglag.