Sekaraia 9 - Nobonob Baibel

Yawe Nug Israel dilag kekeɗ bu madakku

¹ Yawe Nug wanppan danab ah oh, Israel danab ah oh ele, neekkadtte amunu, Yawenu nai imuam Aram wan, Aramnu aab okkai Damaskus ele, amu oh dilag bu awaknu nai uug ele.

² Nai imuam Hamat, Damaskus guguittak daatte, aab onig Tair, aab onig Saidon ele, bu mettak nai imuam ag oh ele tonadtte. Appan danab ag akka ag, “Ig am doyak dabmak okkai ele” atteb.

³ Aab Tair appa amu, ag ban haknu aben ɠagattag bappaidna malappig. Ag silwa huanak, gappud bia aoppig daatte. Ao, ag gol huanak, ibppa gappud daatte bia aoppig daatte.

⁴ Amge Naɗi Nug Tairnu keeke aɗitta aokku. Nug heeb, uub okkai, Tair dilag, ag yu ooppa nona nauhkkulag. Kekeɗ ag uɗin, Tair aab manadppeg ewa, iitta mekku.

⁵ Askelon danab ah ag Tair nauheb anidna, ag eheɗ baɗaglag. Gasa danab ah ag anidna, ag eheɗ nau dooglag. Ekron danab ah ele anamib. Aɗinu? Ag ena bekkulagnu dabmak aɗan oiglagnu ib laa ii anidmana. Kekeɗ ag Gasa danab ah eɗadna, king ahilag ele qeppeg mauhkku. Danab laa Askelon appa ii daama.

⁶ Wan laihnu danab ag uɗin, Asdot aon, aguppa daaglag. Amu Yawe Nug atte. “Da heppi, Pilistia danab ag dada danab daatteb amu, ag baula anam iinab daamna.

⁷ Da heppi, ag doɗ teppu, tiig ele baula ii lamana. Ao, ag ee laala ele, ag lamananu nai anak daatte amu, ag amu baula ii lamana,” awa atte. Keeke amu beeb, Pilistia danab ah oɗo yaak daaglag amu, ag Kayak noobppa dup nona binag mekkulag. Ag anam hebeppeg, Kayak Nug heeb, ag Juda oolagppa aab ikki laa bia daaglag. Am Pilistia danab Ekron daatteb, ag Jebus danab anukkanab heppig bia Juda ele laippu daaglag.

⁸ Amu Yawe Nug atte. “Da dahil lag, da amuppa dayeye, Juda danab ah atognoatten heppi, kekeɗ ag uɗin, wanppa ii oimna. Da pehetten neekkitte daattem amunu, kekeɗ laihnu ag baula uɗin, danab ah dahilad dilag wan ii aomna. Ag baula dahilad danab ah eheɗ ii hattamna,” awa atte.

Sionnu king uɗitte

⁹ Danab ah ag Sion appa daatteb, ag oolag huana gamag ahaɗ! Yo, danab ah ag Jerusalem daatteb, ag oolag gamag aheb, huana eig! Antteg! King ahilag Nug ahilagppa aakku uɗitte. Nug genab tutukku hak kobol haaha, nug danab ah ehanatteb, padal ii memananu kobol ele dim lamitta haaha uɗitte. Nug nukka Nug onig qe ne, ⌊Nug danab onig iitta bia,⌋ Nug donki laa attan dayaya uɗitte. Yo, Nug donki nag laa ⌊nakok okkai meum⌋ attan dayaya uɗitte.

¹⁰ Yawe Nug inam atte. “Da geha heppi, ban haknu karis ag baula Israel appa ii daamna. Ao, da heppi, hos banppanu ag Jerusalem appa baula ii daamna. Ge, da geha ban haknu lat heppi qiiadkkulag. Amu king ahilag Nug geha heeb, wanppan wan ohppa ag ban kobol uuna, ag maɗoɗ ele daappeg, ahilag king nug geha danab ah wan atu ohppanu gumadkku. Yo, Nug geha le naɗi Yupretis appanu digma ukka, wan batakppa ele gumadkku.

¹¹ Da hei, da ag Israel ele ig nug tituanta nai qakkamut. Amu nai qakkak dahil amu, am doɗ tiigppa ɠagattag qak dayom. Ig anam hemut amunu, diig amuppa da geha heppi, ahilagnu laa ag maniguittak danab moɗ naɗi le iitta eleppa daatte, ag amubia daatteb amu, ag amuppa ii daamna.

¹² O Israel danab ah, ag diia ukka laih me dayak danab ah daatteb, ag ena bekkulagnu dabmak aɗan oiglagnu elele amunu, ag eɗun, ahilag aab aɗ ɠagattagnab ele, ag amuppa uɗieg! Da ag amelagppa attem. Ag uug maoppig, amge da geha heppi, ag bu laippu aoppig dayeb amu, ag keeke ena aɗit aoglag. O ag bu aɗit aoppig dayeb amu, ag keeke ena waɗele aoglag. Da heppi, ag anam anamib aoglag.

¹³ Anam amunu, Juda danab ag dahil lat bia daaglag. Israel danab ag am lat doɗo dahil bia daaglag. Aab Sion am dahil qep elab bia daakku. Da heppi, ag Grik danab ele ban hena, ⌊eɗadkkulag⌋.” Yawe Nug anam atte.

Yawe Nug tula bekku

¹⁴ Yawe Nug nuhikkud danab ah dilagppa tula ba boppalatteb, nuhig lat doɗo oh pahanab, amemɗi pahaedatte bia gokkulag. Naɗi Yawe Nug trampet iwala, Nug ulah kilibob, atu taɗak yau uɗitteppanu daatte, appanu huana uɗitte, amubia Nug nuhikkud kekeɗ ele ban hekkulagnu gokku.

¹⁵ Yawe Nukka Ɠagattag Oh Ele Nug nuhikkud danab ah dilag guppiɗ daakku. Nug ehanatteb, ag ahilkad kekeɗ men katapulppa mena aqan eɗadkkulag. Danab wain lanan etteb, amubia Yawenu danab ag kekeɗ eɗadna ekkulag. Yawenu danab ag ahilkad kekeɗ tiilag huana gokkaɗkkulag. Mana mettak danab nug doɗ mana, Kayak medakkunu haaha, doɗ tiig qaɗab daugppa gokkaɗtte, kekeɗ tiilag amubia gokkaɗkkulag.

¹⁶ Deɗ amu uɗieb amu, Yawe, ahilag Kayak, Nug nuhikkud danab ah ehanatteb, ag ii mauhmana. Sipsip gumak danab nug doɗ nau laa nuhikkud sipsip heeb nauhmananu sipsip nuhikkud atognoadtte bia, Yawe Nug nuhikkud danab ah atognoadkku amunu, haen amuppa Israel danab ah ag Yawenu wanppa men daden nob okkainab ele king haɗppa amemɗiag aotte, amubia ag nuhig wanppa anam daaglag.

¹⁷ Wan am enanag, neekkak enanag ele daakku. Anam amunu, ee aeg am heeb, nid danab ag enanag bena daaglag. Ao, wain bau am heeb, ah makkun ag enanag bena daaglag.