Sekaraia 8 - Nobonob Baibel

Yawe Nug Jerusalem itidkku

¹ Amu Yawe Nukka Ɠagattag Oh ele Nug baula Sekaraia nuhig nai mettom. Nai amuam inam.

² Yawe Nukka Ɠagattag Oh Ele Nug inam atte. “Da Sionnu dahilnu doye laa aomanu doyak aɗe daye autenab aottem. Ge, da nuhignu dahil doya laa aomanu doyak aɗe daye aute autenab aottem,” awa atte.

³ Amu Yawe Nug laa ele inam atte. “Da eɗuen, qauko Sion appa ukken, da Jerusalem daakkul. Da amu heppi, danab laa ag Jerusalemnu, aab okkai amu onig am Yawe Dim lamittaknu Oo Metta Ii Uuak Kobol, akkulag. Amu qauko Sionnu, qauko amuam Yawe Nukka Ɠagattag Oh Elenu amu, ag qauko amunu, qauko amu onig am, Qauko Kayaknu Tituanak Daatte, akkulag,” awa atte.

⁴ Yawe Nukka Ɠagattag Oh Ele Nug inam atte. “Danab ah kainonab, ag hokkat ele oitteb amu, ag eɗun Jerusalem, appa ib giginppa hokkat aɗaladna, heɗep nena daaglag.

⁵ Kaino ag anam daappeg, nid, nid ahin ele kuɗumnab ag Jerusalemnu ibppa qiɗ henan daaglag,” awa atte.

⁶ Yawe Nukka Ɠagattag Oh Ele Nug amu anana, Nug imu ele atte. “Anukka ag danab ah huanak daappig, gemu ag oɗo yaak danab ah daatteb, amu gemu ag keeke ena amu qinob bekkunu oolagppa elele iitta bia doon daatteb bia, amge diig amunu da Yawe, da ele anam doottemte? Iitta. Da hekkulnu elele!” Yawe Nukka Ɠagattag Oh Ele Nug anam awa atte.

⁷ Am Yawe Nukka Ɠagattag Oh Ele Nug inam atte. “Genabnab da dahilad danab ah ehanadppi, ag kaɗag uɗitteppanu, qaban uɗitteppanu ele eɗun uɗin, ahilag wanppa bena daaglag.

⁸ Ag eɗun, Jerusalem daaglagnu da omaladppi, ag eɗun uɗin daaglag. Ag uɗin dahilad danab ah daappeg, da ahilag Kayak daakkul. Da ahilagnu oo metta ii uuak kobol, nai doya mala hettoɗia epeɗia elele mettak kobol ele dim lamidkkul,” awa atte.

⁹ Amu Yawe Nukka Ɠagattag Oh Ele Nug inam atte. “Ag oolag ɠagattag qettan, ag da, Yawe Dakka Ɠagattag Oh Ele, ag da laul heppeg malaɗ! Serubabel nug digma, da laulnu men ukku meum, haen amuppa propet danab ag, ag aɗi hekkulagnu mattieg dooppig ele amu, gemu ag baula nai amu dootteb.

¹⁰ Haen, ag dahil lag bappaidkkulagnu ii digmeppig, haen amuppa danab laa nug uɗat ha, men doɗo aokkunu, o laa nug doɗ nuhig laa eppegppa meeb, uɗat medatta, doɗ mameg men doɗo medakkunu ib laa ii dayom. Kekeɗ kuɗum daappig amunu danab laa maɗoɗ ele oikkunu elele iitta; guittak aokkunu am miagib. Layag nug layag ele nug qak huanak ele dayom.

¹¹ Amge gemu da Israel danab ah oɗo yaak daatteb, da anukka Israel dilagppa hemi bia amu, da gemu ahilagppa anam ii hepa.” Yawe Nukka Ɠagattag Oh Ele Nug anam awa atte.

¹² Am Yawe Nug atte. “Anam amunu, da heppi, Israel danab ah ag aɗi eppaglag am meu okku. Grep muɗi ahilag meu oobob, dad ahilag ele ee meu oobob, gu ele elele nekku. Da Yawe, da Israel danab ah oɗo yaak daatteb, da ag aulag daakkunu ag anam madakkul.

¹³ O Juda danab ah, Israel danab ah ele, wan laappan danab ag, ag laa nug eheɗ laa awaknu anak waappa daakkunu anana, ag, Juda danab ah, Israel danab ah ele ag eheɗ nau aoppig, amubia na ele eheɗ nau am awe! appig. Ag anam appig, amge da ag Juda danab ah, Israel danab ah ele ehanadppi, ag padal ii mena, enanag daappeg, wan laappan danab ag akka akka nug amegppa nai mattina, Juda danab ah, Israel danab ah ele ag itittak enanag aoppig bia, na ele amu awe! aon akkulag. Anam bekku amunu, ag ɠagattag dayeg! Ag aib baɗappig, Ag ahan, Kayaknu mettid lag babaitteg!” Yawe Nug anam atte.

¹⁴ Yawe Nukka Ɠagattag Oh Ele Nug inam atte. “Ag ii baɗamna. Ag ahan lag bappaidkkulagnu diig am, anukka haen ag mamelkad aɗi ag hipunin heegeg, da ool nauhe, da bu madakkulnu dabmak aoi ɠagattag eppe, da dabmak dahil ii eɗumi,

¹⁵ amubia gemu Juda danab ah, laala Jerusalemnu, laa am Juda wanppa laih laihnu, da ag itittak ena madakkulnu dabmak aoi ɠagattag eppom amu, da amunu ele dabmak dahil ii eɗupa. Anam amunu, ag Juda danab ah, ag aib baɗappig,” awa atte.

¹⁶ Amu Nug ele atte. “Amge ag Israel danab ah, ag imu hekkulagoitte. Ag akka ag ihuhun mattin, ag nai genabib akka akka ahilagppa mattieg! Ag aib nug buppuidppig. Hettoɗiakppa amu, ag nai doya mala hettoɗia epeɗia elele mettak kobol dim lamitteg!

¹⁷ Ag anen anen lailkad guittak mattaglagnu maittak aib aoppig. Ag keeke laa, keeke amuam genab iitta amu, ag keeke amunu anana, da dahil nai ɠagattag qetten, amuam genab attem, aib appig. Ag amu hekkulagnu oolag aib mauhom. Aɗinu? Kobol amu ohnu amu da nau ninig ele doottem.” Yawe Nug anam atte.

¹⁸ Amu Yawe Nukka Ɠagattag Oh ele, Nug da, Sekaraia, Nug da nuhig nai baula meɗom. Nai amuam inam.

¹⁹ Yawe Nukka Ɠagattag Oh Ele Nug inam atte. “Ag Juda ag kalam waɗeleppa, kalam tanig eleppa, kalam eblaih aɗitppa, am kalam eblaih laihppa ele, ag kalam amunu deɗ laala ee ohnu kud men daatteb amu, da heppi, haen amu oh ag qagmak gamag ahak ele bena daaglag. ⌊Amge ag da tutukku dim lamiɗppeg, keeke amu oh anam bekku⌋ amunu, ag doyak diig genabib, maɗoɗ kobol elenu oo mauhak doyeg!” Yawe Nug anam atte.

²⁰ Amu Yawe Nukka Ɠagattag Oh Ele Nug inam atte. “Wan atu laih laihnu danab ah, aab okkai kuɗumppan danab ah ele ag Jerusalem tekkulagnu uɗiglag.

²¹ Aab laappan danab ah ag ahan gona, aab laappan danab ah amelagppa akkulag. Ahappeg, ig paha Yawe itigkkunu unuqidkkunignu Jerusalem tetu! Ig paha Yawe Nukka Ɠagattag Oh Ele Nug anidta, dim lamidkkunignu Nug mattignignu, ig Jerusalem tetu! Ig gokkunig amunu, ig oh gokkunignu ag ahappeg, ig oh gotu, aon akkulag.

²² Danab ah wan atu kuɗumppanu, wan ɠagattag laalappanu ele, ag ahan, Yawe Nukka Ɠagattag Oh Ele, ag Nug mattina, dim lamidkkulagnu Nug mattiglagnu, Nug ag itadkkunu unuqidkkulagnu uɗin, Jerusalem tekkulag.” Yawe Nug anam atte.

²³ Amu Yawe Nukka Ɠagattag Oh Ele Nug atte. “Haen amuppa amu, wanppan wan ohppanu, nailag ohppanu ele danab eblaih tanig ele ag ahan, Juda danab laippunu lamen elab daug koitak ele aɗan, ag akkulag. Kayak Nug ag ele daatteb doomut amunu, ig na ele daagnignu oɗ medattem. Ag anam akkulag.” Yawe Nug anam atte.