Sekaraia 7 - Nobonob Baibel

Yawe Nug aɗi kobolnu anuqak dootte

¹ King Darius nug Persia dilag king dayaya, nuhig king dayaknu maɗ waɗeleppa, kalam eblaih waɗele, kalam amu onig Kisleb, kalam amunu deɗ waɗeleppa Yawe Nug nuhig nai Sekaraia mettom.

² Yawe Nug Sekaraia nai imu mettomnu diig am, danab ah Betel daappig ele, ag Sareser, Regemelek, amu ahilti danab laala ele ag Yawe ehanadkkunu unuqidkkulagnu maatteg uɗippig.

³ Ag Yawe amunu unuqidkkulagnu otiadna, laa am ag propet danab, Yawe Nukka Ɠagattag Oh Ele laugppanu mana mettak danab ele keeke laanu oɗ mattaglagnu ele maatteg uɗippig. Ag oɗ mattan inam akkulagnu appig. “Ig Betel amu, ig maɗ kuɗum uɗie uɗie, gemu ele ig deɗ kekeɗ ag Kayaknu Mettid lag heeg nauhom, ag amu kalam tanig eleppa heppig amu, deɗ amuppa ig mahiak hetata, ee ohnu kud meta daattem, amge ig amu tuɗitta hekkunig am enate, o iittate? Ag appeg doognignu oonig daatte,” appig.

⁴ Am Betelnu maatteg uɗippig ele, danab amu ag uɗin, ag amunu oɗmak heeg, Yawe Nukka Ɠagattag Oh Ele Nug da, Sekaraia, Nug da nai laa meɗom. Nai amuam inam.

⁵ “Na wan imuppan danab ah oh, ahilag mana mettak danab ele amelagppa inam appe doyeg! Maɗ 70, kalam tanig eleppa, kalam eblaih aɗitppa ele ag ee ohnu kud mena daappig, amge ag heppig ele, ag genab dahilnu dabmena heppigte?

⁶ Ge, haen ag ee, le ele lappig, ⌊haen amuppa ele ag genab dahilnu dabmena heppigte?⌋ Ag oo hak ahilag dabmen iite heppig?” Yawe Nug nai amu da meɗom.

⁷ Yawe Nug nai amu da meɗom, amu Nug nai amuib nuhig propet anukkanu, Nug ag oɗelagppa Juda danab ah iite madattom. Amu Nug ag amelagppa nai amu mattiaya aum, haen amuppa Jerusalem danab ah, aab laala Jerusalem talilidna daatteb ele dilag danab ah ele ag maɗoɗ, keekenu ele eleleppa daaegeg, amu Juda wan ooppa aben laa onig Negeb, amu laih qaban uɗitteppa qauko nakok qauko okkai diigppa daatteb amu, haen amuppa danab ah ele ag amuppa daappig.

⁸ Amu Yawe Nug baula nuhig nai Sekaraia mettom. Nai amuam inam.

⁹ “Yawe Nukka Ɠagattag Oh Ele Nug inam atte. Ag nai doya mala hettoɗia epeɗia elele mettak kobolnu oo metta ii uuak doon hena, ag oo gai-iitta doya oo metta ehanittak kobol, ag oo bodoetta le mak kobol ele dim lamidna, anamib akka akka ahilagppa heig!

¹⁰ Ag ah qab, nid ag mamelkad mauhppig, wan laihnu danab ah, amu daɗek danab ah ele aib eheɗ hadappig. Laa amu, ag anen anen, ag lailkad dilag guittak mattaglagnu maittak aib aoppig.” Yawe Nug anam atte.

¹¹ Yawe Nug anam atte, amge ag mamelkad aɗi ag nuhig nai dabmettaglagnu uuppig. Ag ahilag dabmak ɠagattag eppe, ag Yawe dimettan, ag danab nug nai doomanu nug daug eppeg doɗoppa itutte, amubia ag Yawenu nai doyaknu uuppig.

¹² Ag ahilag dabmak dim lamidkkulagnu, ag eɗun Yawe dim lamidmananu dabmenana heegeg, dabmak ahilag amu ɠagattagnab eppe, ag ɗo nai, Yawe Nukka Ɠagattag Oh Ele ag dooglagnu me uɗiom, ag amu doyaknu uuppig. Yawenu Ouɗi Nug propet danab anukkanu nai matte, ag danab ah amelagppa mattieg dooppig, amge ag nuhig nai amu ele dooglagnu uuppig, diig amunu Yawe Nukka Ɠagattag Oh Ele Nug ahilagnu oo nauhak huanak doyom.

¹³ Amu Yawe Nukka Ɠagattag Oh Ele Nug atte. “Israel danab ah ag da ag amelagppa nai mattimi, haen amuppa ag dahil nai dooglagnu uuppig amunu, ag da onilppa eeg, da ele ii doomi.

¹⁴ Da hei, ag wanppan wan uma, ulah kilibob he, keeke tamtam laih laih gona daatteb bia daappig. Da hei, ag gona appa daanna, ag aab diig danab iitta wan amuppa daappig. Hak ahilagppa ag heeg, wan ahilag am hele-etta auta autanab awom. Danab ah ag wan amuppa ii oippig. Israel danab ah ag heeg, ahilag wan enanag, ee meu huanak oum ele amu, wan amuam hele-ettak dayom.” Yawe Nug anam atte.