Sekaraia 6 - Nobonob Baibel

Karis waɗele

¹ Aria, amu dimppa da baula neekki ukke, da karis waɗele ag qauko aɗit gamalahppanu uɗiegeg anadmi. Qauko aɗit amu aa brasppa haatak.

² Hos kokoɗ karis laa anuqak amu eeɗegeg, hos hinqak karis laa eeɗegeg,

³ hos hakkab karis laa eeɗegeg, amu hos ɠagattag, beɗulag otultul ele karis laa eeɗppig.

⁴ Da anam antten, da engel nug da ele nai mattimuɗ oɗ mettami. “O naɗi dahil, imuam aɗi,” awe oɗ mettami.

⁵ Da oɗ mettai, nug da amelppa aum. “Imuam hab aabppanu ouɗi waɗele. Ag Naɗi, Nug wan atu ohppanu Naɗi amu, ag Nug noobppa daatteb. Ag ahan, nuhig uɗat hekkulagnu gotteb.

⁶ Karis laa hos hinqak ele, karis amuam yawalti uɗitteppanu gotte. Karis laa hos hakkab ele, karis amuam qaban uɗitteppanu gotte. Karis laa hos ɠagattag, beɗulag otultul ele, karis amuam yau uɗitteppanu gotte,” awa aum.

⁷ Hos ɠagattag ele ag ahan, wan atu ohppa gonan, eɗun uɗinna, gonan, eɗun uɗinna, eɗun gokkulagnu wagai men daappig. Ag anam daappig amunu, Yawe Nug aum. “Ag ahan, wan atu ohppa wanana, eɗun uɗinna, wanan, eɗun uɗieg!” awa aum. Nug anam aum amunu, ag uɗat amu hekkulagnu ahan goppig.

⁸ Aria, amu dimppa Yawe Nug dahilppa eum. “Laa yawalti uɗitteppanu goppig ele ag heeg, dahil Ouɗi Nug appanu wan laa, Nug appa hik awawa daatte,” awa aum.

Sekaraia nug mana mettak danab haɗ Josua igippa mekkunu nai

⁹ Amu dimppa amu, Yawe Nug nai laa da meɗom. Nai amuam inam.

¹⁰ “Juda danab ah Babilon appa diia ukka laih me dayak danab ah daatteb amu, ag silwa, gol ele Heldai, Tobia am Jedaia ele eppelagppa meppeg, ag gol, silwa amu aon uɗiglag. Ag amu hekkulag amunu, danab ewam amu ag uɗippeg, na gona, amu ag eppelagppanu awona, deɗ amuppaib na Sepanaia bekka Josaia laugppa ukke!

¹¹ Ag silwa, gol ele amu na medappeg, na ag eppelagppanu aon, na mana mettak danab haɗ laa amuppa he! Na haɗ amu hena malon, na aon, Jehosadak bekka Josua, nug mana mettak ikki danab daatte, na nug igippa me!

¹² Na amu hewona, na nug amegppa inam akkut. Yawe Nukka Ɠagattag Oh Ele Nug inam atte. Laa nug onig Ad Diigppa Ita Bau, nug nuhig abenppa dayaya, elelenab mekku. Nug Yawenu mettid lag eɗua bappaidkku.

¹³ Nug Yawenu mettid lag hekku. Da heppi, nug danab dagom onig ɠagattag ele daakku. Nug nuhig sia kingppa dayaya, danab ah gumadkku. Mana mettak danab laa nug danab amunu sia king heqo laih dayaya ehanittebeb, aa oh maɗoɗ, dabmak laippu ele uɗat hekkulah.” Yawe Nug nai amu da meɗom.

¹⁴ Amu haɗ amuam Yawenu mettid lagppa appa, danab ah ag Heldai, Tobia, Jedaia, amu Sepanaia bekka Josaia ele dabmettaglagnu daakku.

¹⁵ Danab wan atu kuɗumppanu ag uɗin, Yawenu mettid lag eɗun bappaidkkulag. Ag amu heppeg anidna, ag dooglag, da, Sekaraia, da Yawe Nukka Ɠagattag Oh Ele oɗeppanu nai awe, ag mattami. Ag Yawe, ahilag Kayak, ag nuhig haknunab anak oh yagbak ele dim lamidkkulag dayeb amu, keeke amu oh anam aakku bekku.