Sekaraia 4 - Nobonob Baibel

Lam maattaknu balal, ad olip aɗit dottolti ele

¹ Amu oh ba ukka male, engel nug da ele nai mattimuɗ amu, nug eɗua uɗia he, da ahami. Da danab niiom bia daye ahami.

² Nug anam he ahai, nug oɗ meɗom. “Gemu na aɗi anidttem?” awa oɗ meɗom. Oɗ meɗe, da nug amegppa ami. “Da lam maattaknu balal, golppa hak, amu tappiɗ igippa daatte anidttem. Am lam eblaih aɗit ele lam maattaknu balalppa daatteb. Amu tappiɗppanu goɗen lamppa gokkunu ippu am eblaih aɗit, laippu lam anen anenppa gotteb.

³ Laa amu da olip ad aɗit anat-ttem. Laa amu lam maattak balal heqo naɗiap-ppa daye, laa heqo nanehppa daatte,” awe ami.

⁴ Da anam mattie malen, da engel oɗ mettami. “O naɗi, amuam aɗi keeke?” awe oɗ mettami.

⁵ Da anam ai, nug da oɗ meɗom. “Na amu iite doottem?” oɗ meɗom. Oɗ meɗe, da, “O naɗi, iitta, da ii doottem,” ami.

⁶ Da ai, nug aum. “Nai imuam Yawe Nukka Ɠagattag Oh Ele Nug na Serubabelnu na amenppa atte. Da na uɗat hekkutnu ool hette amu, na uɗat amu danab dilag ɠagattagppa, o danab ebehilagppa ii hemana. Iitta. Dahil Ouɗi Nug ɠagattag metteb, na hekkut,” awa aum.

⁷ Amu engel nug Yawe oɗeppanu nai anam ana, nug nai tuɗitta aum. “Keeke aɗi, qauko naɗi, o aɗi keeke laa, keeke amu nug Serubabelnu ib iinab oo nema. Qauko laa daakku dayeb, Kayak Nug heeb, qauko amu honap na, uɗem daakku. Nug anam heeb, Serubabel nug Kayaknu mettid lag ha malakku. Nug ha malebeb, danab ah ag enan, Kayaknu itittak enappa lag imu beum! Kayaknu itittak enappa lag imu beum! ekkulag,” awa aum.

⁸ Aria, da Sekaraia, da Yawenu nai amu oh aoi, Nug nuhig nai laa da meɗom. Nai amuam inam.

⁹ “Serubabel nug mettid lag imunu ukku menppa haknu am aakku heum, nugib lag amu ha malakku amunu, qinob nai amu meu ob, dahilad danab ah ag da Yawe Dakka Ɠagattag Oh Ele, da na Sekaraia, da na meitte uɗime dooglag.

¹⁰ Amu danab nug keeke digmette amu, digmakppa laa ag keeke am nakokib anidtteb, amge ag keeke nakok imunu ena iinab doyak aib dooppig. Aɗinu? Danab ag mettid lag imu haknu plam lain Serubabel eppegppa dayebeb anidna, ag gamag ahak dooglag. Amu lam eblaih aɗit ele amu ag Yawe, Nug ameg eblaih aɗit ele, amuppa Nug keeke oh anidtte amu, lam amu ag amu ippunadtte,” awa anam meɗom.

¹¹ Amu dimppa amu, da engel oɗ mettami. “Olip ad aɗit, laa amu lam maattak balal heqo naɗiap-ppa daye, laa heqo nanehppa daatte amu, aa am aɗi keeke?

¹² Am laa amu, ad olip eppeg aɗit aa gappad golppa hak, goɗen gokkaɗeh gotte, aa gappad aɗit amu daug daugppa daattep amu, eppeg aɗit amu, aa am aɗi keeke?” awe oɗ mettami.

¹³ Da anam oɗ mettai, nug aum. “Na amu iite doottem?” oɗ meɗom. Oɗ meɗe, da ami. “O naɗi. Iitta. Da ii doottem,” awe ami.

¹⁴ Da anam ai, nug aum. “Naɗi, Nug wan atu oh gumadtte ele, Nug danab aɗit aa Nug ehanidkkulahnu goɗen gokkaɗakppa tituanatom amu, ad aɗit amu, ad eppeg aɗit ele am danab aɗit amu ippunadtte,” awa aum.