Sekaraia 3 - Nobonob Baibel

Kayak he, mana mettak ikki danab nug lamen dubuttid iittappa dayom

¹ Amu dimppa amu, engel nug mana mettak ikki danab Josua, nug Yawenu engel noobppa hibaitta daye ippuniɗom. Satan nug ele appa engel eppeg naɗiap-ppa dayaya, nai digdig kuɗum mattiaya, Josua yaaya mattiom.

² Nug anam he, Yawe ⌊nuhig engel⌋ nug Satan amegppa aum. “Satan, ⌊na eheɗ hettem.⌋ Yawe Nug na daut bataɗ! Ao, Yawe, Nug Jerusalem tituanom amu, Nug na daut bataɗ! Danab imu, Josua, nug am ad maha laa aab aɗuppa dayeye, ii eomanu danab laa nug paha eppeg bahia aotte, nug amubia daatte.

³ Amu Josua, nug engel noobppa, nuhig lamen am dubuttid nau ele dayom,

⁴ amu engel nug laa ag nug noobppa appa ele hippaidna daappig amu, nug ag amelagppa aum. ‘Lamen dubuttid nau ele amu, ag uɗidna aweg!’ awa aum. Nug anam a, Yawe Nug Josua amegppa aum. ‘Antte! Da nahip hipunin uhuqen mettami; gemu da lamen bau enanag imu na medattem,’ ” awa aum.

⁵ Yawe Nug anam a, da ami. “O gadon, ag igippan lamen dubuttid iitta ele nug igippa mekkulagnu oɗ madattem,” awe ami. Da anam ai, Yawenu engel nug laih hibaitta dayeye, ag igippan lamen dubuttid iitta ele nug igippa meeg, lamen bau ele aɗuitteg noum.

⁶ Ag amu hena malaeg, Yawenu engel nug Josua amu haknunab nai imu nug mettom.

⁷ “Yawe Nukka Ɠagattag Oh Ele Nug inam atte. Na dahil ib, ɗo dahil ele dim lamidkkut dayeb, da Yawe, da heppi, na dahil lag, dahil lagnu haɗap ele gumakkut. Amu da heppi, na ⌊engel⌋ imu hippaidna daatteb oolagppa uɗin daakkut.

⁸ O mana mettak ikki danab Josua, ag mana mettak danab laa oh ele, ag daulag human, dahil nai doyeg! Aɗinu? Ag mana mettak danab, ag am butti aɗi kobol ena bekkunu at daatteb. Laa am, da heppi, dahil maɗi nid, Nug am ad diigppa ita bau bette, amubia bekku, amu Nug uɗikku.

⁹ Amu laa amu, ag men daden nob okkainab ele, da Josua noobppa iikku aihak memi daatte antteg! Men amuam laippu, amge men amu daug am eblaih aɗit ele. Da men amuppa da deɗ laippuppa wan imunu hipunin oh uhuqen madakkulnu nai yen otaɗkkul. Da Yawe Dakka Ɠagattag Oh Ele, da anam awe attem.” Yawenu engel nug Sekaraia amegppa anam aum.

¹⁰ Amu Yawe Nukka Ɠagattag Oh ele Nug inam atte. “Amu deɗ amuppa ag oh anen anen ag mudippan laippu laa ag ele maɗoɗ, enanag ele daaglagnu onilagppa ekkulag,” awa atte.