Sekaraia 2 - Nobonob Baibel

Jerusalem danab ah ag butti aɗi keeke kuɗum ele daaglag

¹ Aria, da Sekaraia, da baula neekki ukke, da danab laa nug melemel doyaknu muɗi eppegppa aɗa dayeye anidmi.

² Da nug anam antten, da nug oɗ mettami. “Na adeppa gottem,” awe oɗ mettami. Da nug oɗ mettai, nug aum. “Da ukken, Jerusalemnu melemel gane anidkkulnu gottem. Da aab amu, nuhig emaitak, elab nuhig ele dookkulnu melemel mekkul,” awa aum.

³ Aria, engel da amelppa nai mattiom amu, nug uuiɗa ugekke, engel laa uɗia, nug uɗa te,

⁴ engel da ele nai mattimuɗ nug engel laa amegppa aum. “Na paha gona, nid bau melemel doyaknu muɗi aɗatte amu, na nug amegppa inam appe doyaɗ! Deɗ laa dimppa danab ah huanak, doɗ manan ele Jerusalem appa daaglag. Ag kuɗumnab Jerusalem daaglagnu henana, ag oh aab ooppa daaglagnu elele iitta amunu, kuɗum ag aabnu aɗ dimittim daaglag.

⁵ Amu Yawe Nug atte. Aab laa aɗ iitta, amge aab ewak hanhan aab amu talilitta ewawa dayaya, aab amunu aɗ daatte, amubia da dakka, da Jerusalemnu aɗ daakkul amunu, diig amunu laa ag aab amuppa, aab amunu aɗ dimittim daaglag ele ag enaib, maɗoɗ ele, qagaiettak iitta ele daaglag. Amu da, da aab amunu binag amahlak oppiaawak ele daakkul, awa atte.” Engel laa nug engel laa amegppa nid amu amegppa anam akkunu aum.

Yawe Nug nuhikkud danab ah piɗenu onilagppa eum

⁶ Amu Yawe Nug atte. “Ag Israel danab ah, kekeɗ ag heeg, ag matatun gona, laih laih daatteb ele amu, ag eɗun uɗieg! Ag yawalti uɗitteppanu uɗieg! Aɗinu? Da hei, ag ulah waɗele uɗittebppanu, amuam kaɗag, yau, qaban, yawalti ele amu, ag aben amu ohppa matatun gona daatteb, ⌊amge ehanittak dahilppa ag aben amu ohppanu ahan, eɗun uɗieg!⌋” awa atte.

⁷ O Sion danab ah, ag Babilon appa diia ukka laih me dayak danab ah daatteb amu, ag appanu eɗun uɗin, Jerusalem ippa dayeg!

⁸ Ag amu hekkulagnu diig am, Yawe Nukka Ɠagattag Oh Ele, Nug da, ⌊Sekaraia, Nug da⌋ Nug binag medakkulnu meiɗe uɗiminu atte. Nug wanppan wan laala, ag ag Israel eɗadna, ahilkad keeke aon goppig ele, Nug amu dilagnu inam atte. “Aun nug ag Israel eheɗ hadatte ele, nug da, Yawe, nug da eheɗ heiɗtte.

⁹ Anam amunu, da eppel humen heppi, wan amuppan begbeg maɗi nid, ⌊amuam Israel aɗi amu,⌋ ag ahan eɗadna, ahilkad keeke aon gokkulag,” awa atte. Amu beeb amu, ag ⌊Israel, ag⌋ Yawe Nukka Ɠagattag Oh ele, Nug da meiɗe uɗimi dooglag.

¹⁰ Amu Yawe Nug atte. “O Sion danab ah, da ag oolagppa daakkulnu uɗittem amunu, ag gamag ahak okkai doon, ag baalag okkaippa eig!” awa atte.

¹¹ Haen amuppa amu, wanppan wan kuɗumnu danab ah ag Yawe gukkuidna daan, Nug dim lamiɗkkulagnu hekkulag. Ag nuhikkud danab ah bena daaglag. Nug ag oh, ag oolagppa daakku. Anam beeb amu, ag Yawe Nukka Ɠagattag Oh Ele Nug da meiɗe, da ahilagppa uɗimi dooglag.

¹² Wan laa Yawenu tituanak daatte, wan amuppa laih Juda am nuhig aug bia dayebeb, Yawe Nug baula Jerusalem tituaneb, nuhig aabnab daakku.

¹³ O danab ah oh ag Yawe noobppa toettan daan, bakkum dayeg! Aɗinu? Nug hab aab, amuam aab oppiaawak ele, Nug appanu uɗitte.