Sekaraia 13 - Nobonob Baibel

Hipunin oppiak

¹ Le dubuttid ihe, iitta mette, amubia qinob Yawe Nug heeb, Dawit buɗub, am Jerusalem danab ah ele ag hipunin iitta, beɗulagppa ele aab iitta daaglagnu ib daakku.

² Yawe Nukka Ɠagattag Oh Ele Nug atte. “Deɗ amuppa da heppi, Juda wanppa danab o ah laippu laa nug kayak hambuppuak noobppa dup noa binag ii mema. Diig amunu amu, danab ah ag kayak hambuppuak laippu laa onignu ii dabmemana; oh am daulag atikku. Da heppi, propet ouɗi nau dilag ehanittakppa uɗat hetteb, amunu laippu laa, amu ouɗi nau amu oolagppanu laippu laa ele Juda wanppa iinab daama.

³ Am inam bekku. Danab laa nug propet nai ⌊hambuppuak⌋ digma mattiebeb, nug mameg, anig ele aa ahaya, ‘Na, “Yawe ippuniɗom amunu, da nai imu madittem,” ame, amge nai amuam nai hambuppuak, Yawe oɗeppanu iitta amunu, na mauhkkutoitte,’ aoya akkulah. Aa bekkalah nug propet nai ⌊hambuppuak⌋ mattiebeb, aa, aanab nug menupiɗ, aa aya aa ahaiya, nug qep-ppa yaaglah.

⁴ Haen amuppa danab nug, ‘Da propet, da tulegleg laa anidmi’ akkunu uɗanak dookku. Danab laippu laa nug danab ah buppualattebeb, ag nuhignu, nug am propet, dabmekkulagnu nug propet dilag lamen ii takkama.

⁵ Amu laa nug danab laa, ‘Na propette,’ oɗ meeb, laa amu nug akku. ‘Iitta! Da propet iitta. Da dad hak danab. Aɗinu? Da nid bau dayeye, da digmein, dad uɗat heinne, da dahil ee amuppa aodttami, gemu ele aottem,’ awa akku.

⁶ Nug anam ab amu, laa nug oɗ medakkutai. ‘Anam daatte dayeb am aɗinu ⌊propet dilag⌋ duɗupa na momonppa daatte?’ awa oɗ medakkutai. Nug anam oɗ metteb, laa nug akku. ‘Da layal laugppa daaiyi, laa guittak amu da meɗom,’ awa akku.” Yawe Nug anam awa atte.

Laa sipsip gumak danab guittak mettaeg, sipsip ag oolna, matatun goppig

⁷ Yawe Nukka Ɠagattag Oh Ele Nug atte. “Qep elab, na ahan, dahil sipsip gumak danab qe! Ge, qep elab, na danab da gukkuiɗak daatte ele qe! Qep elab am sipsip gumak danab qeeb amu, sipsip, ⌊dahilad danab ah amu,⌋ ag oolna, matatun gokkulag. Anam, amge da dahiladnab sipsip gumak danab sipsip nakkud bekkadtte bia atognoadkkul.

⁸ Dahilad danab ah wan ahilagppa huu ewam daaglag. Ag anam daanna, huu aɗit am qep elabppa mauhppeg, huu laippu am bau, ena daaglag.” Yawe Nug anam atte.

⁹ Am Yawe Nug imu ele atte. “Danab nug silwa o gol babaitta epeɗia awak daakkunu uɗat hette, amubia laa bau daaglag amu, da heppi, ag oolag dubuttid iitta daaglag. Ag da onilppa eppeg, da ahilag unuqittak dookkul. Da ahilagnu, imuam dahilad danab ah, appi, ag, Yawe, Nug am ihinig Kayak, akkulag.” Yawe Nug anam awa atte.