Sekaraia 12 - Nobonob Baibel

Yawe Nug heeb, Jerusalem danab ah ag laihppan danab eppelagppa ii daama

¹ Nai imuam Yawe, Nug Israel dilagppanu aum. Yawe, Nug hab abenppa ma, wannu ukku, wan ele ha, Nug danab ah ele bau madatte amu, Nug atte.

² “Da heppi, Juda danab ah, laala Jerusalemnu, laa am Juda wanppa laih laihnu amu, ag le ɠagattag bia daappeg, wan laala ag Jerusalem talilidna daatteb ele, ag uɗin Jerusalem oo mattan aqaknu maadna daaglag, Juda ag heppeg, kekeɗ amu ag danab le ɠagattag lawowa, eheɗ daatte bia eheɗ daaglag.

³ Haen wanppan wan ohnu danab ag ahan, Jerusalem banelag uɗippeg, deɗ amuppa da heppi, Jerusalem amu men uug naunab, humaknu elele iittanab bia daakku. Aun nug men amu humakkunu hekku, nug guittak aokku, ⌊amubia aun nug Jerusalem heeb nauhkkunu hekku, nug guittak aokku⌋.

⁴ Deɗ amuppa da heppi, bannu hos oh ag eheɗnab baɗappeg, daup hos attan oinna ban hetteb amu, ag oh dabmak ahilag eɗatteb, ag kaaka daaglag. Ge, da Juda danab ah neekkatten atognoadkkul, amge da heppi, Juda dilag kekeɗ, ahilkad hos oh ag amelag gaɗuak daakku.” Yawe Nug anam awa atte.

⁵ Am haen amuppa Judanu aab ikki anen anen ag akka akka inam akkulag. “Jerusalem danab ah ag Yawe Nukka Ɠagattag Oh Ele, ahilag Kayak, ag nuhigppa ɠagattag aon ɠagattag daatteb,” aon akkulag.

⁶ Amu Yawe Nug atte. “Deɗ amuppa da heppi, Judanu aab ikki ag waa ooppa aab nakok ewa ukka ukka, aab ameg qagmak eotte, o hul laa ewawa ukka, ee aeg gumu kuɗum ehagna qagmeppig eotte, ag amubia daaglag. Judanu aab ikkinu danab ag wan laala Juda wan talilittak daatteb eɗadna autna aoglag, amu Jerusalem am nuhig abenppa, appa ena, ɠagattag daakku,” awa atte.

⁷ Ban danab Jerusalem dilag, aria King Dawit buɗub ele, ag binalag okkai, Judah danab laa eɗattak aomnanu amu, Yawe Nug heeb, Judah dilag aab naunau, amu dilag ban danab ag tatam kekeɗ eɗaɗkkulag amunu, ag binalag amunu aoglag. Jerusalemnu, Juda laa dilag ele, ag oh am binalag elele aoglag.

⁸ Yawe Nug Jerusalem danab ehanatteb, kekeɗ eɗaɗkkulag, deɗ amuppa amu Nug aun aɗi Jerusalem daatteb, Nug amu dilag guppiɗ daakku. Nug ehanatteb, aun laa nug ɠagattag iittanab ele ag oolagppa daatteb, ag ɠagattag ahilag am Dawitnu bia oiglag. Amu Dawit buɗub ag Jerusalem danab ah gumadkkulag. Ahilag gumak, amuam tatam Yawenu engel laa ag omalatta gumattom, ag amubia gumadkkulag; Kayak gumadtte bia daakku.

⁹ Amu Yawe Nug inam awa atte. “Haen amuppa am inam daakku. Wan laala ag Jerusalem banelag uɗiglag amu, da hadappi, iitta mekkulag.

Laa banppa yaappig elenu mahittak nai

¹⁰ Anam amu, da heppi, Dawit buɗub, aria Jerusalem danab ah ele, ag ehanittak okkai hamu mettaknu kobol, unuqittak kobol ele dim lamidkkulag. Ag anam henana, ag laa qetti banppa atulppig, amuam da, ag eɗun aniɗna, ag dahilnu oo doyak doon, mahiak okkai hekkulag. Laa nug nuhig nid laippuib, nid amu mauhe, nuhignu mahiak okkai hette, ag amubia dahilnu mahiglag. Ao, laa nug nid danab tatamnu mauhe, oo doyak okkai, guittak ele awa mahitte, amubia ag dahilnu mahiglag.

¹¹ Anukka Megido uɗemppa, Hadatrimon appa Juda danab ah gayak naɗi, okkai heppig; amu deɗ amuppa danab ah Jerusalem appa ag amubia gaaglag.

¹² Israel danab oh aab ikki anen anen daan, ag oh oo doyak naɗinab doon, ag gaaglag. Aab ikki laanu danab, ag danabib daanna, gaaglag. Danab amu waalkad, ag piɗe akka daanna, gaaglag. Dawitnu aab ikki danab ag piɗe laa daanna gaappeg, ahilkad ah ag piɗe akka daanna gaaglag. Natannu aab ikki danab ag piɗe akka daanna gaappeg, ahilkad ah ag piɗe akka daanna gaaglag.

¹³ Lewinu aab ikki danab ag piɗe daanna gaappeg, ag waalkad ag piɗe akka daanna gaaglag. Simeinu ebekkod danab ag piɗe daanna gaappeg, ag waalkad ag piɗe akka daanna gaaglag.

¹⁴ Israel buɗub laa oh ag aab ikki anen anen daanna, gaaglag. Danab ag danabib daanna gaappeg, ah ag piɗe akka daanna gaaglag.” Yawe Nug anam atte.