Sekaraia 11 - Nobonob Baibel

¹ Lebanon wan, na aab ewebeb, ad sida nahipad eweb nauhkkulagnu ib babaitteg!

² Ad pain, ag danab hetteb bia, ag eheɗ gayeg! Aɗinu? Ad sida ag nena qeppig. Ao, ad enanag, anttak ahilag enanag ele, am ad sida amu, ag nauhna malappig Ad ok, Basan wanppa daatteb, ag danab bia, eheɗ gayeg! Aɗinu? Ad huanaknab daappig, amge laa ag watteg nauhppig.

³ Doyeg! Sipsip gumak danab ag oolagppa guittak nau doon, eheɗ gaatteb. Aɗinu? Gikkiɗah dad okkai, enanag, sipsip appa gumattegeg ee lappig amu, laa heeg, dad amu nauhppig daatteb. Doyeg! Laion bau ag gaatteb. Aɗinu? Ahilag dayak aben Jodan le daugppa ad naunau huanak oolagppa amu, laa ag heeg, iitta meum.

Sipsip gumak danabnu nai

⁴ Yawe, dahil Kayak, Nug da amelppa inam aum. “Sipsip ameg laa, danab baalag otaɗadna meppeg, laa daden mena lakkulagnu tituanak daatteb amu, na sipsip amu dilag gumak danab daan, ee matte!

⁵ Danab ag sipsip amu ⌊sipsip mamelkad dilagppanu, enub danab laanu men doɗoppa, nuhig daakkunu⌋ daden metteb ele ag daden mewona, ag ⌊laa⌋ baalag otaɗadna ⌊latteb⌋, amge ag bu ii aotteb. ⌊Enub⌋ danab ag sipsip amu ⌊ahilag men doɗoppa aoppig amu,⌋ ag aon meeg, laa daden meeg, enub danab ag men doɗo okkai aon, ag anen anen, ‘Ig Yawe onig humatu. Da enub danab bemi daattem!’ atteb. Sipsip amunu gumak danab ele ag ena ii atognoadtteb; ag ele aqadna ⌊latteb⌋. ⌊Aakku ib ewam amuppa sipsip ameg amuppa daatteb, ag nauhak aotteb.⌋

⁶ Anam amunu, danab amu ag oo doyak kobol dim ii lamidtteb, amubia da Yawe, da Israel danab ah dilagnu, ⌊ag hipunin henan oitteb amu, da ahilagnu⌋ oo gai-iitta doya oo metta ehanittak kobol tuɗitten ii hepa. Da heppi, danab ah oh ag ahilag mudippan laippu, ahilag king ele eppelagppa daaglag. Ag akka anam nug guittak medappeppeg, da ehanadppi, ii iitta mema.” Yawe Nug anam awa aum.

⁷ Yawe Nug anam aum amunu, da Sekaraia, da sipsip ameg laa, danab ag baalag otaɗadna meppeg, laa daden mena lakkulagnu tituanak daappig amu, da sipsip amu dilag gumak danab daami. Da sipsip laa ag eheɗ nau aoppig ele atognoatte aute aomi. Da dudqak hokkat aɗit awen, da laa onig Ehanidkkulnu Ool Daatte ataɗen, laa da onig Laippu Dayak ataɗmi.

⁸ Da anam dayeye, kalam laippuppa da sipsip gumak danab nau ewam lamadmi. Da anam heiyi ukkom, amge sipsip amu, ⌊ag am Israel danab ah,⌋ ag dahilnu ag oolagppa uuaknab dooppig amunu, da ahilagnu bahil yom.

⁹ Anam daye, da ag amelagppa ami. “Da baula ahilag gumak danab ii daapa. Ag mauhkkulag dayeb, ag mauhkkulag! Laa ag ag aqadppeg mauhkkulag dayeb amu, ag aqadppeg mauhkkulag! Aria, laa ii mauhkkulag amu, ag akka akka nug laig!” awe ami.

¹⁰ Da anam awoya, da dudqak hokkat dahil onig Ehanidkkulnu Ool Daatte am awen qiimi. Amuppa da nug tituana nai qakkaknu nai, da Israel danab ah ele hemut amu, nai amuam aakku hei iitta meum ippunadmi.

¹¹ Amuppa da nug tituana nai qakkak ag ele hemut amu deɗ amuppa aakku hei, iitta meum. Amu laa ag laa eppelagppa eheɗ nau aoppig, amge ag dahilnu, “Nug ehanikkeb, ena daagnignu hette,” oolagppa genab dooppig ele amu, ag da heminu, “Yawe Nug danab amunu hakppa keeke ippunigtte,” dooppig.

¹² Aria, da anam hewoya, da ⌊Israel danab laa, da ahilag sipsip gumak danab bia daami amu,⌋ da ag amelagppa ami. “Ag oolag heeb, ag dahil nob, uɗat dahil ganenu meɗaglag. Iitta dayeb amu, ag aib meɗappig,” ami. Da anam ai, ag silwa men doɗo 30 ebqena meɗappig.

¹³ Ag meɗaeg, Yawe Nug da amelppa aum. “Buɗippe ukkeb, waa keeke hak danab nug awaɗ!” awa aum. Ag dahilppa heppig amu, ag eheɗ hena, uɗat dahilnu nob men doɗo honapnab da meɗappig. Amu Yawe Nug anam aum amunu, da men doɗo amu buɗii ukke, waa keeke hak danab, nuhignu Yawe laugppa ukkom.

¹⁴ Da anam hewoya, da Juda danab ah, Israel danab ah ele ag layam batak ii daappig ippunadkkulnu, da dudqak hokkat onig Laippu Dayak ele qiimi.

¹⁵ Da amu hei, Yawe Nug da amelppa aum. “Aria, gemu na gona, sipsip gumak danab dabmak tutukku iittappa keeke hette, na amunu ippu he!

¹⁶ Aɗinu? ⌊Na anam heppe, amuam piksa laa bia daakku.⌋ Am da paɗappi, ikki danab nau nug Juda danab ah gumadkku. Ikki danab amu nug sipsip gumak danab ag sipsip ii gumadtteb bia daakku. Sipsip gumak danab nau ag sipsip mauhkkulagnu hetteb am ii ehanadtteb; sipsip yuɗ qettoɗppig ele ag ii mattialadtteb; sipsip laa ag guittak aoppig ele ii ehanadtteb; sipsip beɗulag ena ele amu, ag ee ii madatteb. Ag helob bia amu, ag ii hetteb. Iitta! Ag sipsip beɗulag enanag ele am aqadna lanana, ⌊huppu nakoknab tippalmananu,⌋ ag baelkad di ele oppat-tteb. Ikki danab nau amu, nug anam hekku.

¹⁷ O gadonnab gadon! Danab okkai amu, nug sipsip pehettak ii gumadtte, nug genab bu okkai aokku. Qep elab nug eppeg okkuleb, nug ameg naɗiap ele yaakku. Ao, nug eppeg am aakku nauhak dayebeb, nug ameg naɗiap ele gaɗuak daakku.” Yawe Nug anam awa atte.