Sekaraia 10 - Nobonob Baibel

Yawe Nug danab ah nuhikkud ehanatteb, ag eɗun, ena daaglag

¹ Ag aam haen digma daakkunu hette, ag haen amuppa Yawe gunu oɗ metteg! Ao, Yawe Nug he, lombig hinqetteb. Yawe Nug he, gu danab ah ehanadkkunu nette. Ao, Yawe Nug he, gu neene, danab dilag ee meu otteb.

² Kayak hambuppuak dottolkad danab ag laulkadppa maatteg daatteb, ⌊amu dilag eman danab⌋ ag nai hambuppuak danab ah madatteb. Ao, eman danab ag tulegleg danab ah ib hambuppuak ippunadtte anidna, nai maditteb. ⌊Danab amu⌋ ag tul niiak hambuppuak anidna, amu danab ah amelagppa amunu atteb. Ao, ag amu anidna, danab ah hambuppualadna, keeke oh enaib daakkunu maditteb, amge amuppa danab ah ag ehanittak genab ii aotteb. Ag amu hetteb amunu, danab ah dahilad ag amu dilag nai oolagppa genab doon, sipsip qettoɗna, hamu oitteb bia oitteb. Ao, sipsip ag sipsip gumak danab iitta ele ag mauhnoak oitteb, amubia dahilad danab ah ag gumak danab genab iitta amunu, ag uug digdig anidna oitteb.

³ Yawe Nug atte. “⌊O Juda danab ah, ahilkad danab okkai ag am sipsip gumak danab bia, amge ag pehettak ii hetteb amunu,⌋ da ikki danab amu dilagnu ool huan nauhtte. Ao, da ikki danab amu bu madakkul,” awa atte. Aɗinu? Yawe Nukka Ɠagattag Oh Ele Nug Juda danab ah, ag nuhikkud danab ah, nuhikkud sipsip bia, Nug ag atognoadtte. Nug heeb, ag ɠagattag, binalag okkai ele, bannu hos bia daaglag.

⁴ Amu Juda buɗubppanu laa nug lagnu men anuqak daakkunu bekku. Nug buɗubppanu laa nug peh lagnu pin elab anuqak daakkunu bekku. Nug buɗubppanu laa nug bannu lat anuqak daakkunu bekku. Nug buɗubppanu ikki danab oh ele bekkulag.

⁵ ⌊Juda⌋ ag ban danab ɠagattag, banppa ban ɠagattag hetteb bia daaglag. Ao, ag danab, ag ahilkad kekeɗ eheɗ eɗadtteb bia hekkulag. Aɗinu? Yawe Nug ag ele daatteb. Ge, ⌊Yawe ag ele daatteb, amunu⌋ ag ban ɠagattag hena, ag kekeɗ hosppa ban hetteb ele eɗadkkulag.

⁶ Yawe Nug atte. “Da Juda danab ɠagattag madakkul. Ao, da Israel danab ele ehanadppi, ag padal ii memana. Da ahilagnu oo bodoetta le mak doottem amunu, da heppi, ag eɗun, ahilag wanppa uɗin daaglag. Da matu geɗadmi, amge da am Yawe, ahilag Kayak amunu, haen amuppa ag da deɗ laa ii geɗadlom bia daaglag. Da ahilag unuqittak doyen ehanadkkul.

⁷ Israel danab ag ban danab ɠagattag bia bena, ag gamag ahak okkai dooglag. Ao, ag danab wain lanan, gamag ahak dootteb bia daaglag. Ahilkad nid ele ag da, Yawe, ag da aɗi hekkul anidna, ag ele gamalag ahakku. Ao, ag da, Yawe, ag da heminu gamag ahak doon oiglag.

⁸ Da ag onilagppa ein qagmaadkkul. Ge, haen amuppa da qagaiettakppanu eɗua uhuqak hekkul amunu, ag appatna, kuɗum bena, anukka kuɗum daappig bia daaglag.

⁹ Da hei, ag haɗag ulah diie, laih laih gotteb bia wan atu laih laih matatun gona daatteb, amge appa ag dahilnu dabmekkulag. Ao, ag, amu ahilkad nid ele ag bau daanna, ag eɗun, ippa, Israel wanppa uɗin daaglag.

¹⁰ Da omaladppi, ag Isip wanppanu, Asiria wanppanu ele eɗun uɗiglag. Ao, da heppi, ag Gileat wanppa, Lebanon wanppa ele daaglag. Ag ⌊appatna,⌋ kuɗumnab daappeg, wan ahilag am nakok ebakku. Ao, ag oh daaglagnu elele iitta daakku.

¹¹ Da ehanadppi, ag danab nug yu naɗi, duban huanak ele mataɗa gokkunu hette, amubia dayebeb uug eɗadkkulag Ao, da heppi, yu duban am iitta mekkulag, Nil le ele qaɗaiedakku. Da heppi, Asiria danab, ag am dada danab amu, ag uɗalag nekku. Ao, da heppi, Isip nauhkku.

¹² Da heppi, dahilad danab ah ag da, Yawe, ag dahil ɠagattag aon, ag ɠagattag daaglag. Ao, da ehanadppi, ag aɗi keeke hekkulagnu daatte amu, dahil ehanittakppa ag hekkulag.” Yawe Nug anam atte.