Sekaraia 1 - Nobonob Baibel

Israel buɗub ag eɗun, Yawe waappa daaglagnu ewak

¹ Darius nug Persia dilag king dayaya, nuhig king dayaknu maɗ aɗitnu kalam eblaih ewam eleppa Yawe Nug nuhig nai propet Sekaraia ⌊engel laa oɗeppa⌋ mettom. Sekaraia nug Berekia bekka. Berekia nug am Ido bekka. Nai Yawe Nug Sekaraia ⌊Israel amelagppa ab dooglagnu⌋ mettom am inam.

² “Yawe Nug ag mamelkad aɗi dilagnu oo huanak nauhom

³ amunu, na danab ah imu amelagppa inam appe doyeg! Yawe Nukka Ɠagattag Oh Ele Nug inam atte. Ag eɗun, dahilppa doppeg, da eɗuen, ahilagppa gokkul.

⁴ Ag mamelkad aɗi heppig bia aib heppig. Haen amuppan propet ag appig. Yawe Nukka Ɠagattag Oh Ele Nug inam atte. ‘Ag ahilag eheɗ hak digdig uun dimettan, aib baula heppig, aon appig, amge ag mamelkad aɗi ag dahil nai amu dooglagnu uuppig; ag ii dabmedappig,’ ” awa atte.

⁵ Amu Yawe Nukka Ɠagattag Oh Ele Nug atte. “Ag haen amuppa anam heppig, amge gemu amu, ag mamelkad aɗi, amu propet amu oh ele ag mauhna malappig, gemu laippu laa ii daatte,

⁶ amge da dahilad maɗi nid, ag propet amu, da ag oɗelagppa aɗi nai mattimi, aɗi ɗo memi, aɗi haknunab nai ami amu, keeke amu oh am genabib ag mamelkad aɗi, amu ahilagppa iite beum? Da ami bianab anam anam aakku beum. Anam beum amunu, haen amuppan danab ag oolag eɗue, ag appig. Ig hipunin heut, Yawe Nukka Ɠagattag Oh Ele bu elele iikku ig mekkom daatte. Nug ihinig haknu bu elele ig mekkom. Nug hekkunu dabmak awe ɠagattag eppom bianab aakku heum, aon appig.” Yawe Nug Sekaraia nuhig nai anam ⌊engel oɗeppa⌋ mettom.

Danab laa nug ad onig mirtel, ad kuɗum amu oolagppa dayom

⁷ Amu Darius nug Persia dilag king dayaya, nuhig king dayaknu maɗ aɗitppa, kalam 11, onig Sebat, kalam amunu deɗ 24ppa Yawe Nug nuhig nai propet Sekaraia mettom. Sekaraia am Berekia bekka. Berekia nug am Ido bekka. Nai Yawe Nug Sekaraia mettom am inam.

⁸ Da Sekaraia, da tuqan tulegleg laa anidmi. Tulegleg amuppa, da danab laa anidmi. Hos nug attan daya oiyom ele amu, hos amuam kokoɗ. Amu danab amu nug ad mirtel kuɗum oolnu noak nakokppa daappig, nug ad amu oolagppa hibaitta dayom. Danab amunu hos dimugppa amu, hos laala ele daappig. Hos amu laala am kokoɗ, bedupped, hakkab ele. ⌊Amu hos anen anen ohppa danab laa attan ta dayom. Aria, ad mirtel amu oolagppa Yawenu engel ele dayeye anidmi.⌋

⁹ Da anam anttena amu, engel laa nug da ele nai mattimuɗ amu, da nug oɗ mettami. “O naɗi dahil, umuam aɗinu anam daatteb?” awe oɗ mettami. Da anam oɗ mettai, engel nug da ele nai mattimuɗ amu, nug eɗua, da amelppa aum. “Ag attemun amu, da na ippunidkkul,” awa aum.

¹⁰ Nug anam a, danab ad mirtel oolagppa dayom ele, nug aum. “⌊Laa hos attan daatteb amu,⌋ ag am laa, Yawe Nug ag wan atu ohppa gokkulagnu tituanatte goppig,” awa aum.

¹¹ Nug anam a, laa hos attan daappig ele ag Yawenu engel ad mirtel oolagppa dayom amegppa appig. “Ig wan atu ohppa oitta, maɗoɗib daatte anidmut,” aon appig.

¹² Yawenu engel nug nai amu doya, nug Yawenu inam unuqittom. “O Yawe Nakka Ɠagattag Oh Ele, na anukka Jerusalem danab ah dilagnu, Juda danab ah laa ele dilagnu oot nauhe uɗie uɗie, gemu ele anam doottem. Oo nauhak nahip aakku maɗ 70 iikku dayaya, ii iitta meum; amu haen gane laa ele ukkeb, na heppe, nahip oo nauhak iitta meeb, na Jerusalem danab ah, Juda danab ah laa oh dilag ele oot gai-iitta doon oot mattan ehanadkut?” awa oɗ mettom.

¹³ Yawenu engel nug anam unuqitte, Yawe Nug engel laa da ele nai mattimuɗ amegppa baag gai-iittappa oo mak nai mattiom.

¹⁴ Yawe Nug engel da amelppa nai mattiom amegppa anam a, engel nug da amelppa aum. “Na danab ah oh nai imu dooglagnu eppe doyeg! Yawe Nukka Ɠagattag Oh Ele Nug inam atte. Da Jerusalemnu, Sionnu ele dilahnu dahil doya laa aomanu doyak aɗe dayak okkai doottem,

¹⁵ amge da wanppan wan laala danab ah dilagnu, ag ahilag dabmakppa ag ɠagattag daatteb, ag uug laa ii anidmananu dabmetteb amu, da amu dilagnu ool nauhtte. Da dahilad danab ah dilagnu ool nakokib nauhom, amge da ag amunu bu madakkulnu dabmein, bu qak amu wanppan wan laala eppelagppa memi. Da anam memi amge, wanppan wan laalappan danab ag bu da dabmemi, ag amu eɗittak, bu eheɗ nau ele Israel madappig,” awa atte.

¹⁶ Diig amunu amu, Yawe Nug inam atte. “Da Jerusalem danab ah dilagnu, ⌊Juda laa oh dilagnu ele⌋ ool gai-iitta doye, ool matte ehanadkkulnu eɗuen uɗimi. Da heppi, danab laa ag dahil mettid lag eɗun bappaidna, Jerusalem ele eɗun bappaidkkulagnu dabmak aoglag.” Yawe Nukka Ɠagattag Oh Ele Nug anam atte.

¹⁷ Engel nug da amelppa anam ana, nug tuɗitta aum. “Na imu ele madippe doyeg! Yawe Nukka Ɠagattag Oh Ele, Nug inam atte. Israel danab ah oh ag baula bau dayaknu keeke oh elele aɗan oinna, amu tuɗittak keeke laa ele aɗan oiglag, awa atte. Amu ag anam oippeg, am Yawe Nug baula danab ah oo mak madakku. Nug Jerusalem am nuhignabnu tituankku. Yawe Nug anam atte,” awa aum.

Qeqeɗi waɗele, amu danab waɗele aenppa uɗat haknu doyak okkai ele

¹⁸ Amu dimppa amu da Sekaraia, da neekki ukke, da doɗ qeqeɗi waɗele anidmi.

¹⁹ Da amu antten, da engel da ele nai mattimuɗ oɗ mettami. “Amu aɗi?” awe oɗ mettami. Da oɗ mettai, nug da amelppa aum. “Qeqeɗi amuam wan laala ɠagattag ele ag heeg, Juda danab ah, Israel danab ah, Jerusalem danab ah ele ag matatun gona, wan atu laih laih daappig ippunigtte,” awa aum.

²⁰ Nug anam a, Yawe he, da danab waɗele aenppa uɗat haknu doyak okkai ele anadmi.

²¹ Da amu antten, da engel da nug ele nai mattimuɗ amu, da nug oɗ mettami. “Danab amu ag aɗi hekkulagnu uɗitteb?” awe oɗ mettami. Da oɗ mettai, nug aum. “Qeqeɗi waɗele ag wan laala ag heeg, Juda danab ah ag matatun gona daanna, uɗa nak nau dooppig, amu danab aenppa uɗat haknu doyak okkai ele, ag qeqeɗi waɗele amu heppeg, ag baɗak eheɗ nau doon, ag nena qena, nauhna autna aoglagnu uɗitteb,” awa aum.