Sam 98 - Nobonob Baibel

Kayak Nug wan atu oh gumatte

Sam laa.

¹ Yawe Nug kobol danab hekkunu elele iitta heum amunu, ig Yawenu ahi bau ettatu! Yawe Nug am ɠagattag, amu oppiaawak ele. Amuppa amu Nug ha, Nug kekeɗ nuhikkud eɗattom.

² Yawe Nug danab ah ehanitta, padal ii mak kobol nuhig danab ah ippuanattom. Ao, Nug aɗi hette, Nug genab tutukkuib hette amu, Nug amu wanppan wan anen anen oh dilag danab ah ippuanattom.

³ Am Yawe Nug oo mauhaknab kobol nuhig, oo metta ii uuak kobol nuhig ele Israel dilagnu dabmaama dim lamidkkunu nai anan qakkom. Yawe Nug anam hekkunu nai anan qakkom, amu Nug aakku heum. Ihinig Kayak Nug ehanikke, ig padal ii memut, amu wanppan danab ah oh ag amu anidppig.

⁴ Ag wanppan danab ah, ag gamag ahak naɗi doon, ag Yawe binag mekkulagnu baalag okkaippa eig! Genab, wanppan danab ah oh ag gamag ahak naɗi doon, laippun digmena, ahi etteg! Ag ahi ettanna, qedadaɗaknu keekeppa qedadaɗeg!

⁵ Ag Yawe Nug onig okkai aokkunu ag harp amu qeig! Ao ag harp qenana, ag ahi baag enanag laala ele ettalatteg!

⁶ Ele amu, ag Yawe onig okkai mettaglagnu amu, ag trampet iwaladna, ag trampet ele iwaleg! Ag Yawe, Nug king, ag Nug noobppa gamag ahak naɗi doon, ag Nug binag mekkulagnu baalag okkaippa eig!

⁷ Heppeg, yu huana koɗkoɗ qeebeb, oqotti okkai oaɗ! Yuppan doɗ oh, ag Yawe binag meig! Wan amu wanppan keeke oh ele, ag anamib heig!

⁸ Heppeg, danab ag gamag ahak doon, eppelag tap qeeg, oqotti otte amu, amubia le nona gotteb ele ag anam heig! Heppeg, qauko nakok ag danab bia gamag ahak doon, ahi etteg!

⁹ Heppeg, keeke amu oh ag Yawe noobppa anam heig! Aɗinu? Yawe Nug wanppan danab ah oh epeɗiadkkunu uɗitte. Nug genab tutukku hak kobol dim lamitta, epeɗiak amu hekku. Ao, Nug wan atu ohppan danab ah nai doya mala hettoɗia epeɗia elele mettak kobolppa epeɗiadkku.