Sam 97 - Nobonob Baibel

Kayak Nug am gumak danab anuqak

¹ Yawe Nug am King! Wanppan danab ah oh ag gamalag ahaɗ! Ao, ag danab ah ag nud ohppa daatteb amu, ag gamalag ahaɗ!

² Bud, amu gatatu teppu ele aa Nug talilidya, happut-ttep. Nug king dayaya, Nug kobol genab tutukku ele, amu nai doya mala hettoɗia epeɗia elele mettak kobol eleib dim lamat-tte.

³ Aab ewak naɗi Nug noob awa, anuqa ugakka, nuhikkud kekeɗ talilittak daatteb amu ewadtte.

⁴ Nuhig amemɗiag awa, wan amahalitte. Wanppan danab ah ag amu anidna, ag hahaɗtteb.

⁵ Yawe, Nug am Naɗi, wan atu oh gumadtte ele amu, Nug uɗieye, qauko ag le metteb.

⁶ Hab daup ag genab tutukku hak kobol nuhig ippunikkeg, danab ah oh ag binag amahlak oppiaawak nuhig anidtteb.

⁷ Amu danab ah ag kayak hambuppuak dottolkad noolagppa dup nona binalag metteb ele, ag uɗa nak dooglag. Ao, danab ah oh ag ahilag kayak hambuppuak binalag metteb, ⌊ag uɗalag nekku⌋. Ag kayak hambuppuak oh, ag Nug noobppa dup nona binag meig!

⁸ O Yawe, na nahipad danab ah ehanadnana, ahilkad kekeɗ eɗadkkut amunu, Sion danab ah ag amu doon, ag gamalag ahakku. Ao, Juda danab ah ag aabaabppa daatteb, ag amu doon, ag oo gamag ahak dooglag.

⁹ O Yawe, amu anam bekkunu diig am, na Kayak Attannab Laa Oh Eɗattak daattem, na wan atu ohnu gumattem. Na kayak laa oh eɗattak daattem.

¹⁰ Ag laa ag Yawenu oolag mauhtte ele, ag kobol naunu, ag nau ninig ele doyeg! Aɗinu? Laa ag Yawenu oo metta ii uuak kobol dim lamidtteb ele, Yawe Nug ag dabmatta, atognoattette, ag bau daatteb. Ge, Nug ag nau hak danab eppelagppanu eɗua diitte.

¹¹ Nug he, amahlak am genab tutukku hak danab ah dilagppa amahaltte. Nug he, ag maɗoɗppan gamag ahak aotteb.

¹² Aun aɗi ag genab tutukku hak danab ah daatteb, ag Yawenu oolag gamag ahaɗ! Ao, ag Kayak, Nug oppiaawak ele, ag Nug binag meig!