Sam 96 - Nobonob BaibelKayak Nug kobol ena nuhikkud danab ah dilagppa hette 1 Ag ahi bau Yawenu etteg! Ao, wanppan danab ah oh ag Yawenu ahi etteg! 2 Ag Yawenu ahi ettan, Nug onig humeg! Deɗ ohppa ag laa amelagppa, “Yawe Nug ig padal mematanu ehanigtte,” aon aig! 3 Ag nuhig binag amahlak oppiaawak elenu amu, ag wanppan wan ohnu danab ah oh amelagppa mehuqeg! Ao, ag nuhig hak enanagnu huu ohppa appeg doyeg! 4 Aɗinu? Yawe Nug onig ɠagattag ele, laa oh eɗattak daatte. Ao, Nug danab ah ag Nug binag mekkulagnu elelenab daatte. Ge, danab ah ag nuhignu ebehilag oh bodoetta le mekkunu elelenab daatteb. Kayak laa anam laa ii daatte. 5 Laa amu, wanppanu danab ah laa dilag kayak oh ag keeke genab iitta. Ag am dottolkad aakkuib daatteb, amge Yawe Nug amubia iitta. Nug hab heum. 6 Nug dagom onig ɠagattag okkai naɗi ele. Ao, ɠagattag, binag amahlak oppiaawak ele nuhigppan uɗitte. 7 Ag wanppan wan anen anen ohppan danab ah ag Yawe, Nug binag amahlak oppiaawak ele, ɠagattag ele amu, ag amu doyeg! Ge, ag amu doyeg! 8 Yawe onig am binag amahlak oppiaawak ele, ag amu doyeg! Ao, ag doɗ laa manan mettaglagnu aon, Nug laugppa uɗieg! 9 Ag Yawenu oppiaawak ele daan, ag Nug noobppa dup nona Nug binag meig! Ao, ag wanppan danab ah oh, ag Nug noobppa daappeg, beɗulag hahaɗaɗ! 10 Ag wanppan wan ohnu danab ah oh amelagppa, “Yawe Nug King daatte!” aig! Nug wan ha, abenabppa meum daatte amunu, laih wakkunu elele iitta. Ao, geha dimppa amu, nug hettoɗiak aɗa, danab ah nai doya mala hettoɗia epeɗia elele mettak kobolppa epeɗiadkku. 11 Ag habppa daatteb ele, ag oh gamalag ahaɗ! Ao, ag wanppa daatteb ele, ag oh gamalag ahaɗ! Yu, nuhig keeke oh ele, ag gamalag aheb, eig! 12 Ge, dad okkai oh, amuppan keeke oh ele, ag gamalag ahaɗ! Ag anam heppeg, ad oh atuppa daatteb ag gamag ahak doon, ahi ettaglag! 13 Ao, ag Yawe noobppa daanna, ahi ettaglag. Aɗinu? Nug wan imuppa uɗitte. Ao, Nug wan imu epeɗikkunu uɗitte. Nug genab tutukku hak kobol dim lamittatta, Nug danab ah epeɗiadkku. Ao, Nug doyak diig genabib dim lamittatta, danab ah oh epeɗiadkku. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.