Sam 95 - Nobonob Baibel

Kayak binag maknu ahi laa

¹ Doppeg, ig Yawe binag humatu! Ao, Nug kekeɗ iqamanu ehanittak ihinig daya ehanikke, ig ii mauhttem amunu, ig gamanig aheb, baanig okkaippa nuhignu ahi edatu!

² Ig Nug gumidta, Nug noobppa gota, amegppa, “Ena heme,” akkunig. Ao, ig musiknu keeke qaadtat, ig ahi ena ena ele Nug binag meta edatu!

³ Aɗinu? Yawe Nug am Kayak onig, ɠagattag ele. Ao, Nug king. Nug kayak laa oh eɗattak, attannab daatte.

⁴ Wan unuqagnab amu, aben amuam Nug eppegppa daatte. Ao, qauko ikki, aben amu ele Nug eppegppa daatte.

⁵ Nug yu heum, am nuhig daatte. Ao, nug eppegppa wan heum.

^6-7 Yawe Nug am ihinig Kayak amunu, doppeg ig Nug noobppa dup nota binag metu! Ao, ig laa Nug ig heikkom ele, ig Nug noobppa gota, gatenig qaun okkunig. Nug danab ag sipsip elelenab gumadtteb, amubia Nug ig danab ah gumigtte. Ao, ig sipsip gikkiɗah aon latteb, amubia ig ee keeke aottem amu, Nugib ig megatte. Ag gemu Kayak Nug nai inam atte amu, ag daulag human doyeg!

⁸ Nai amuam inam. “Ag mamelkad aɗi ag Meriba appa heppig bia gemu ag heppeg, oɗe ii dim lamidmananu dabmak ahilag ɠagattag aib eppom. Ao, ag mamelkad aɗi deɗ laa Masa appa, Masa am atu taɗakppa daatte amu, ag appa heppig bia gemu ag heppeg, oɗe ii dim lamidmananu dabmak ahilag ɠagattag aib eppom.

⁹ Ag gemu daatteb, ag mamelkad aɗi ag aben amuppa da ma anttak okkai meɗanna, ag da aɗi aɗi hemi anidppig.

¹⁰ Danab amu ag maɗ 40 anamib heegeg, da ahilagnu ool nauhehe daami. Ao, da anam daye, da ami. ‘Danab ah imu ag haen oh dahil ib apiɗidna oitteb. Ge, ag dahil kobol ii doyadppig, gemu ele ii doyadtteb.’

¹¹ Anam amunu, da ool nauhe, da keeke laa hekkulnu dahil nai ɠagattag qein ami. ‘Danab ah amu ag hik awak dahil iinab aomna.’ ” Yawe Nug anam aum.