Sam 94 - Nobonob Baibel

Kayak Nug danab ah oh epeɗiadkku

¹ O Yawe, na danab ah aun aɗi ag eheɗ hetteb ele, na ag heppignu nob tutukku bu mattaknu Kayak daattem. O Kayak, na nahip hak ɠagattag amu epponna, danab ah eheɗ hetteb amu, na ag heppignu nob tutukku bu madakkutnu oɗ medattem.

² O laa, na wan oh epeɗiadttem ele amu, na ahakkutnu oɗ medattem. Ao, dada hak danab ag bu aoglagnu daatteb amunu, na ahilag hak nau eleleppa bu madakkutnu unuqidttem.

³ O Yawe, nau hak danab ag eheɗ hena, gamag ahak huananab dootteb; amu haen gane laa ele ukkebeb, am anam daakku? Ge, haen gane laa ele ukkebeb, ag anam hekkulag?

⁴ Ag am beɗup tak danab nau daan, ag beɗup tak danab ah nau bia nai maditteb. Ao, nau hak danab ah ag dada danab dilag nai mattinna daatteb.

⁵ O Yawe, danab ah nau hetteb ele ag nahipad danab ah aduduɗatteg nauhtteb. Ao, ag danab ah nahipadnab daatteb ele, ag eheɗ hatteg nauhtteb.

⁶ Ag ah qab, wan laihnu danab ele aqaeg mauhtteb. Ao, ag nid naunau anilkad mamelkad mauhppig amu, ag ag duulkad otteb.

⁷ Ag atteb. “Yawe Nug ii neegtte.” Ao, ag atteb. “Jakop buɗub dilag Kayak, Nug ig attem hettemnu dabmak ii aotte.”

⁸ Amge ag danab ah ag dabmak pehettak ii aon oitteb ele ag dabmeig! Ag danab ag Kayaknu ii dabmena, ii dim lamidtteb ele, ag haen gane laa ukkeb, ag danab ah doyak dabmak ena ele bena daaglag?

⁹ Laa Nug ag daulag heum ele, Nug daug ituak elete? Laa Nug ag amelag heum ele, nug ameg gaɗuak elete?

¹⁰ Laa Nug danab ah toliadtte amu, Nug ag bu iite mattama? Laa Nug danab ah keeke ippuanatte, Nug nuhig doyak tutu meum daattete?

¹¹ Yawe Nug danab ah dilag dabmak dootte; Nug dabmak amuam keeke hamunab dootte!

¹² O Yawe, danab na toliadna, bu madattem ele amu, ag itittak ena aoppig daatteb. Ao, danab na nahip ɗo ag ippunadttem ele amu, ag itittak ena aoppig daatteb.

¹³ Na nau hak danab heppe nauhkkulag, amge ag ii nauhppig haenppa, haen amuppa nau hak danab ag heeg, uug digdig nahipad danab ah aqadkkun betteb, amu uug amu nahipad danab ah aqatta aot autanab aomanu, na ehanadttem.

¹⁴ Aɗinu Yawe Nug amu hette? Nug danab ah nuhikkud di-ii-mattama. Ao, Nug nuhikkudnab danab ah ii uuadma.

¹⁵ Laa amu, Nug heeb, hettoɗiak danab ag genab tutukku hak kobol dabmenana, ag nai doya mala hettoɗia epeɗia elele mettak kobol dim lamidkkulag. Amu laa oh ag oolagppanab Kayaknu dabmetteb ele, ag amu dim lamidkkulag.

¹⁶ Aun nug da ehaniɗe, da nau hak danab ele ban hettem? Ao, aun da ele nau hak danab hatteb nauhaknu ehanittak dahil daatte?

¹⁷ ⌊Yawe Nug da ehaniɗtte.⌋ Nug da ii ehaniɗlo amu, da pahanab mauhlom.

¹⁸ O Yawe, haen da, “Da nein qekkulnu hettem!” ami amu, na nahip oo mauhaknab kobolppa ehaniɗme.

¹⁹ Haen da ool unuqagppa baɗak he, na oot meɗan hee, da maɗoɗppan gamag ahak doomi.

²⁰ O Kayak, gumak danab ag nau hetteb ele, ag danab ah ɗoppa heeg nauhtteb amu, ag na laipad daaglagnu elele iitta.

²¹ Gumak danab nau ag genab tutukku hak danab hadappeg nauhkkulagnu, ag oohona daatteb. Ao, ag danab eheɗ laa ii heppig mauhkkulagnu atteb.

²² Ag anam hetteb, amge Yawe Nug aab aɗ ɠagattagnab ele dahil bia daatte. Ao, Kayak Nug am dahil kekeɗ niɗamanu ehanittak daatte. Da Nug, Nug am dahil padal mak eɗitteb ena dayaknu ehanittak daatte amu, da nuhigppa ena daattem.

²³ Yawe Nug nau hak danab ah bu madakku. Ao, Nug ahilag nau haknu hatteb nauhkkulag. Ge, Yawe, ihinig Kayak, Nug ag hatteb nauhkkulag.