Sam 92 - Nobonob Baibel

Ahiettak laa, Kayak binag mette

Sam imuam Sabatppa ahi ettaglagnu daatte. Imuam ahi laa.

¹ Danab ah ag Yawe amegppa, “Ena hen mekkame,” akkulag, amuam kobol ena. Genab, O Kayak Attannab Laa Oh Eɗattak, danab ah ag na binan mekkulagnu ahi ettaglag, amuam kobol ena!

² O Yawe, danab ah ag oo mauhaknab kobol nahipnu buttua laa amelagppa anak amu enanag. Ao, oo metta ii uuak kobol nahipnu danab ah tueb amelagppa anak amu enanag.

³ Am laa nug laia muɗi 10 ele qedadaɗebeb, ahi ettak amu ettaglag, amuam enanag. Yo, laa nug ahi baag amuib harp qeebeb, ag Kayak kobolnu ahi ettaglag, amuam kobol ena.

⁴ Aɗinu? O Yawe, keeke na hena meɗame ele, keeke amu he, da gamag ahak doottem. Yo, na keeke hemenu da gamag ahak doyeye, ahi edattem.

⁵ O Yawe, na kobol danab laa hekkunu elele iitta kuɗum hettem! Ao, nahip dabmak am unuqagnab noak daatte.

⁶ Am danab ah ag dabmak pehettak ii aon oitteb ele ag imu ii dootteb. Ao, danab ah ag Kayak dab-ii-menan ii dim lamidtteb ele ag dabmak imunu diignu doyak tutukku laa iitta.

⁷ Dabmak ag ii dootteb ele amu inam. Nau hak danab ag gikkiɗah enanag bette, amubia betteb. Yo, danab ah ag nau hetteb ele, ag enanag anam betteb. Amge ag padal mena autna aoglag.

⁸ Nau hak danab ah dilagppa anam aakku bekku, amge O Yawe, na keeke oh dilag okkai daattem. Na hanhan hab attan onin binan okkai ele daattem.

⁹ O Yawe, nahip kekeɗ, ao nahip kekeɗ ag wana, padal mena oiglag amunu, danab ah oh ag nau hak kobol qetteb ele, ag tamtam gona, ɠagattag ii daamna.

¹⁰ Na, da ɠagattagnab, makau okkai ebehi ele dakkuɗ bia heiɗme. Yo, na da itiɗna human qeme.

¹¹ O Yawe, na da ehaniɗe, dahil kekeɗ ag nena qeeg, amelppa anidmi. Ao, Yawe, na ehaniɗe, dahil kekeɗ, ag nau hak danab amu, ag oolnana, eegeg doomi.

¹² Ad pam enanag ba, okkai mette, amubia genab tutukku hak danab ah aɗi ag ena bena daatteb. Yo, ag am Lebanonnu ad sida, amubia ɠagattag betteb.

¹³ Ag am ad laa aben enanagppa eppaeg ba auta aotte, amubia ag Yawe laugppa daan, ena betteb. Ao, ag ihinig Kayak laugppa enaib daatteb.

¹⁴ Am ad, ag aben laa enappa eppaeg ba dayaya, meu otte, amubia genab tutukku hak danab ag ena daaglag. Ao, ad nug ba, hokkua mette, me enaib dayaya, meu wawaib daatte, amubia genab tutukku hak danab ah ag ena hekkulag.

¹⁵ Ag, Yawe Nug tutukkuib daatte laa ippunadkkulagnu anam daaglag. Nug am kekeɗ niɗamanu ehanittak dahil daatte. Yawe Nug kobol nau laa ii hette.