Sam 91 - Nobonob Baibel

Kayak atognoigtte, kekeɗ ag ii iqatteb

¹ Laa nug Kayak Attannab Laa Oh Eɗattak guppiɗ dimugppa daatte amu, nug Kayak Nukka Ɠagattag Oh Ele, nug nuhig dabmettak waappa daakku.

² Da Yawenu miag atiak inam iikku attem. Nug am padal mak eɗitteb ena dayaknu ehanittak dahil daatte. Nug am aab aɗ ɠagattagnab dahil bia ele daatte. Nug am dahil Kayak. Da nuhignu oolppa genab doottem.

³ Aɗinu? Yawe Nug nahip guppiɗ dayeb amu, Nug pelem mak ohppanu, amu oɗe nau digdigppan ele ehanitteb, amuppa na padal ii memana.

⁴ Ai laa nug nakkud haugppa dabmadatte bia, Nug na atognoidkku. Ao, nahip padal mak eɗitteb ena dayaknu aben Nug haug waappa daakku. Ge, nuhig oo metta ii uuak kobol, amuam nahip guppiɗ, aria nahip wan buue te aɗ itak bia, Nug amubia ele daakku.

⁵ Am na Yawenu ootppa genab dookkut dayeb amu, na tuqanppa, keeke oh heeg danab ah baɗak eheɗ nau dootteb amu, na amunu ii baɗamna. Ao, amunppa kekeɗ ag lat doɗo eeg, nahip-ppa gotteb, na amunu ii baɗamna.

⁶ Tuqanppa oɗe nau danab kuɗum aqe mauhtteb ele, na amunu ii baɗamna. Ao, na oɗe nau laa, aam anig danab ah aqadtte amu, na amunu ele ii baɗamna.

⁷ Oɗe amu digmekku dayeb, danab ah 1,000 ag na guguittak daatteb, am aqeb mauhlobtai, amge na oɗe ii aomna. Ge, 10,000 ag na eppen naɗiap-ppan, na guguittak daatteb mauhlobtai, amge na oɗe ii aomna.

⁸ Anam beeb, na amenppanab Yawe Nug nau hak danab attem bu madatte amu, na neegna anidkkut.

⁹ Kayak Attannab Laa Oh Eɗattak, Nug nahip ena dayaknu aben bia daatte dayeb, Ge! Yawe, Nug padal mak eɗitta ena dayaknu ehanittak dahil daatte, Nug nahip ena dayaknu aben bia daatte dayeb,

¹⁰ diig amunu amu, nahip-ppa eheɗ laa ii bema. Ao, oɗe nau danab kuɗum aqe mauhtteb amu, nahip peh lag guguitta ii uɗima.

¹¹ Aɗinu? Nug engel nuhikkud amelagppa nahipnu haknunab ab, ag na adeppa adeppa gokkut amu, ag na pehettak atognoidkkulag.

¹² Anam amu, na baen men yaamanu, ag geha ag eppelagppa aɗaidna ehanidkkulag.

¹³ Na geha laion, amu mat nau ele eɗadppe, ag aɗitai keeke laa hekkulagnu elele iittanab daaglag. Ao, na geha laion bau, mat nau ele tappaladppe noppeg, ag aɗitai laa hekkulagnu elele iittanab daaglag.

¹⁴ Yawe Nug atte. “Na dahilnu oot mauhe, da gukkuiɗaknab daattem amunu, da geha na ehanidppi, na qagaiettakppa ii daamna. Ao, na da dooiɗttem amunu, da geha na atognoitte dabmedakkul.

¹⁵ Na da onilppa eppe amu, da geha ewak nahip nob mekkul. Na uugppa daappe amu, da geha na ele daagnih. Da geha na ehanidppi, na qagaiettakppa ii daamna, da na binan okkai ele medakkul.

¹⁶ Da na bau dayak haen elab daakkutnu medakkul. Da ehanidppi, na padal ii memana,” awa atte.