Sam 90 - Nobonob Baibel

Kayak, danab elenu nai

Sam imuam Mosesnu unuqittak laa. Moses nug Kayaknu danab.

¹ O Naɗi, anukkanab uɗie uɗie, gemu ele amu, na ihinig ena dayaknu aben bia dayeye daattem!

² Na qauko ii hattame haenppa, ao, na wan, amu keeke oh amuppa daatteb ele ii hattame haenppa, na, O Kayak, na daame. Na am Kayak. Na hanhan anam daame, hanhan ele anam daakkut.

^3-4 Aɗinu? Nahipnu amu, maɗ 1,000 am tumai ba ukka malom, am amubia daatte! Ao, maɗ amu oh am tuqan aɗi uɗitte anittak danab nug aua waɗele keeke dayaya, uɗat amu heehe, laa uɗia, nug abenab awa hette amu, maɗ amu oh am, na Kayak, nahip neekkakppa aua amubia daatte. O Kayak, na danab ah amelagppa, “Ag eɗun gappud meig!” attem; amu nai amuppa na hee, ag mauhna, eɗun gappud metteb.

⁵ Ao, na hee, danab ah laippun mauhtteb. Ge, ag am gikkiɗah buttua bette, amubia daatteb.

⁶ Buttua amu, gikkiɗah bette. Amge tueb am qaɗaietta bunaɗtte.

⁷ ⌊Ig anam bia daattem.⌋ Aɗinu? Nahip oo nauhak ig heikke nauhttem. Nahip oppoɗi bak he, ig baɗak eheɗ nau doottem.

⁸ Na hee, ihinig hipunin oh na noomppa miag atiak daatteb. Ao, na am amahlak ele, amu na hee, ihinig hipunin, ig lokkumakppa hemut ele amu, hipunin amuam na noomppa amahlakppa miag atiak daaegeg anadttem.

⁹ Amunu, ig bau daautut, na ihinignu oppoɗi bak doon, bu megattem. Ao, ig aeqakkatta mauhttem.

¹⁰ Danab ah kuɗum ag bau daan, maɗ 70 aotteb. Ao, laib laib ag ɠagattag daan, ag maɗ 80 aotteb. Amge ig bau daatta oittem, maɗ amunu binanig maknu keeke oh, keeke amuam uug, ooppan oo doyak ele aakkuib megatte. Aɗinu? Haen elab iitta, ihinig maɗ iitta meeg, ig laih gottem.

¹¹ O Naɗi, aun nug nahip oo nauhaknu ɠagattag doyeb oo maidkku? Danab ag nahip oppoɗi bak pehettak anidna dootteb ele amu, ag pehettak nahipnu ebehilag oh bodoetta le mette.

¹² Ig doyak dabmak ena ele daagnignu, na ig haen tutuib bau daattemnu ippunigppe doognignu oɗ medattem.

¹³ O Yawe, na ihinignu oot nauhe hee, ig uugppa daattem, amu na heppe, nahip oo nauhak iitta mekkunu unuqidttem. Na oot nauhom daatte; haen gane laa ele ukkeb, oppoɗi bak nahip am bodoedakku? Amu, na ig nahipad maɗi nid, na ihinignu oot gai-iitta doon oot mekkan ehanigkkutnu oɗ medattem.

¹⁴ Ig bau daattem haen imuppa ig haen oh oonig gamag ahebeb, ahi ettagnignu amu, buttua oh na heppe, oo mauhaknab kobol nahip ihinigppa daakkunu oɗ medattem.

¹⁵ Tatam ig uug mekkae, ig deɗ kuɗum uug amuppa daamut, amu haen amubiaib na heppe, ig gamag ahak doogningnu oɗ medattem. Ao, ig maɗ gane uug anam doomut amu, na heppe, gemu ig oo gamag ahak maɗ anam doognignu unuqidttem.

¹⁶ Na heppe, ig nahip maɗi nid, ig kobol danab haknu elele iitta na hettem amu, ig amu anidkkunignu oɗ medattem. Na heppe, ig buɗunkad ag nahip hak enanagnab anidkkulagnu unuqidttem.

¹⁷ Naɗi, na ihinig Kayak, nahip itittak ena ihinigppa daakkunu oɗ medattem. Ao, ig aɗi keeke oh hettem, amuppa na ig ehanigppe, ihinig uɗat meu okkunu unuqidttem. Ge, ig aɗi keeke oh hettem, amuppa na ig ehanigna heppe, meu okkunu oɗ medattem.