Sam 9 - Nobonob Baibel

Danab nug Kayak Nug nai doya mala hettoɗia epeɗia elele mettak kobol dim lamidttenu dabma, Kayak amegppa, “Ena heme,” atte

Imuam Dawitnu sam; Dawit nug danab kwaia gumattenu yom. Laa ag ahi ettaglag ele amu, ag ahi laa onig, “Bekka Mauhomnu Ahi,” ag ahi amu baag dabmena, ahi ettaglagnu daatte.

¹ O Yawe, da meul ohppa ele, na amenppa, “Ena heme,” akkul. Da na kobol danab haknu elele iitta heme amu, da amunu madikkul.

² Nahipnu amu, da ool gamag huanaknab ahakku. Ao, O Kayak Attannab Laa Oh Eɗattak, da geha na oninnu humittak ahi edakkul.

³ Na dahil kekeɗ eɗatte, ag oolna gotteb. Ao, na hee, ag nena qeeg, na ag hattai nauhtteb.

⁴ Aɗinu? Na da epeɗilna, ag hamu da eheɗ heiɗtteb anidme. Ao, na nahip sia kingppa daan, da eheɗ ii hemi anidna, na genab tutukku hak kobol dim lamidna ehaniɗme.

⁵ Na wanppanu wan anen anennu danab ah ag daulag batan, na nau hak danab hattai nauhppig. Ao, danab ah ag geha baula danab ah amu, ag ahilagnu ii dabmemana.

⁶ Na ihinig kekeɗ hattai nauhna iitta meppig. Ao, na hee, ahilkad aab okkai am loppaɗa nakib daatteb. Ge, danab ah ag geha danab ah amu, ag ahilagnu dab-iinab-memana.

⁷ Yawe Nug am king hanhannu daatte. Nug danab ah tutukku epeɗiadkkunu, Nug nuhig sia king babaittom daatte.

⁸ Nug geha genab tutukku hak kobol dim lamittatta, wan ohppan danab ah ib amuppa epeɗiadkku. Ao, nug geha nai doya mala hettoɗia epeɗia elele mettak kobol dim lamittatta, wan atu ohppan danab ah atognoadkku.

⁹ Danab ag laa waalkadppa eheɗ daatteb ele amu, Yawe Nug ahilag padal mak eɗitteb ena dayaknu ehanittak, ag nuhigppa daaglagnu daatte. Ao, Nug am uug doyak haenppa ahilag ban haknu aben ɠagattag bia daatte.

¹⁰ O Yawe, na laa nug na anitta dim lamidkkunu na mattitta oitte ele, na nug ii uuidttem amunu, aun aɗi ag na dooidtteb, ag nahipnu oolagppa genab dooglag.

^11-12 Yawe, Nug danab ag laa makkuɗadtteb ele, Nug ag eheɗ heppignu nob tutukku madatte amu, Nug kobol nau ag hetteb ele, Nug amu daug ii atitte. Ao, Nug laa ag gai-iitta daan, laa waalagppa eheɗ daan, Nug ehanadkkunu gaatteb amu, Nug ag ii guhuɗadtte amunu, ag Yawe, Nug Sion dayaya, danab ah gumadtte ele amu, ag nuhignu, Nug binag maknu ahi laa etteg! Ao, ag Nug keeke heumnu wanppan wan ohnu danab ah oh appeg doyeg!

¹³ O Yawe, na dahilnu oot gai-iitta doon oot meɗan ehaniɗkkutnu oɗ medattem. Ao, na da laa ag dahilnu nau ninig ele dootteb, na da ag eppelagppa daaiyi, ag eheɗ heiɗtteb anidkkutnu oɗ medattem. Ge, na da mauhakppan eɗun awiɗkkutnu unuqidttem.

¹⁴ ⌊O Yawe,⌋ da Sionnu aɗ odppa na onin humakkulnu, na da ehaniɗe, da kekeɗ eppelagppa ii daattemnu na binan medakkulnu amu, da diig amunu na anam ehaniɗkkutnu oɗ medattem.

¹⁵ Danab ah wan imuppan wan laalappanu ag moɗ laa, danab ah laa ag amuppa nena qena daaglagnu aoppig amu, ag akka ag moɗ amuppa noppig. Ao, ag akka ag ahilag uhuippa noppig.

¹⁶ Yawe Nug hanhan nai doya mala hettoɗia epeɗia elele mettak kobol dim lamidtte amu, danab ah ag amu dootteb, amge nau hak danab ag akka ahilag pelemppa notteb. Ag amu dabmetteg! Sila.

¹⁷ Am nau hak danab ag Kayak ele ii daamna. Iitta! Ag mamak abenppa daaglag. Ao, wan imuppan wan ohppan danab ah ag Kayaknu daulag atitte ele amu, ag ahilagppa anam bekku.

¹⁸ Aɗinu? Yawe Nug heeb, danab ah ag tutu mak oitteb ele, ag laa eppelagppa hanhan ii daamna. Ao, Nug heeb, geha daɗek danab ah keeke ena bekkunu dabmak aɗan oiglagnu, ag ahilag dabmak amu iitta ii mema.

¹⁹ O Yawe, na ahan, danab ah ag na aɗi hekkulagnu attem amu, ag nai amu tabappeg neeb, uuadppe, ag na oɗen ii dim lamidkkulagnu hemananu oɗ medattem! Na wan imuppan wan ohppan danab ah na noomppa qagmaadna epeɗiadkkutnu unuqidttem!

²⁰ O Yawe, na heppe, wan imuppan wan ohppan danab ah ag eheɗ nau baɗaglagnu oɗ medattem! Ao, na heppe, ag am danab aakkuib daatteb dooglagnu unuqidttem. Sila.