Sam 89 - Nobonob Baibel

Uug Israel wanppa dayomnu sam laa

Imuam Esra buɗub Etannu sam; am maskil laa.

¹ O Yawe, da oo mauhaknab kobol nahipnu oo gamag ahak doyeye, hanhan ahi edakkul. Yo, da geha oo metta ii uuak kobol nahipnu laa amelagppa madikkul.

² Aɗinu? Nahip oo mauhaknab kobol am ɠagattagnab hanhan daatte. Ao, nahip oo metta ii uuak kobol, amuam hab ɠagattag daatte, ɠagattag anambia daatte.

³ Na ame. “Da danab laa epeɗimi ele amu, da hei, da nug ele nug tituanɗa, nai qakkamuɗ. Yo, da dahil maɗi nid Dawit, da nug amegppa keeke laa hekkulnu dahil nai ɠagattag qetten ami.

⁴ Da nai inam ɠagattag qetten ami. ‘Da geha heppi, na buɗunad oolagppanu laala ag ahilag haen anen anenppa, ag Israel dilag king hanhan bena daaglag. Yo, da Israel danab ah dilag gumak uɗat na, amu na buɗunad ele, da ag eppelagppa hanhan daakkunu ɠagattag qedakkul.’ ” Sila.

⁵ O Yawe, hab daup ag kobol danab hekkunu elele iitta, na hettem amu, ag amunu na binan metteb. Ao, laa ag nahipnu, oppiaawak ele daatteb, ag nahip oo metta ii uuak kobolnu binan metteb.

⁶ Aɗinu? Auntai laa hab ohppan nug Yawe ele melemel laippu ele daakkunu am laal iitta. Ao, auntai laa nug ag hab attan daatteb oolagppanu, nug Yawe bia iitta.

⁷ Danab ah Kayaknu oppiaawak ele daatteb, ag laippu qagmena amu, ag Kayaknu ebehilag oh bodoetta le mak dootteb. Laanu iitta. Ao, laa Kayak talilidna daatteb ele amu, danab nug ag anatteb, nug ebehi oh bodoetta le mekku, amge laa nug Kayak antteb, nug ebehi oh bodoetta le ma auta autanab aokku.

⁸ O Yawe Kayak Nakka Ɠagattag Oh Ele, auntai na bia laa iitta! O Yawe, na ɠagattagnab ele. Na oo metta ii uuak kobolnu diig daattem.

⁹ O Yawe, naib na yuppan duban okkai okkai gumadttem. Yo, yu duban qak okkai okkai hette amu, na he uutteb.

¹⁰ Naib yuppan doɗ naɗi eɗidna he nauhom. Ao, na nahip ɠagattagppa kekeɗ nahip eɗadna he, tamtam goppig.

¹¹ Hab amu nahipib, wan ele am nahip. Ao, wan, keeke oh wanppa daatteb amu, amu nahip, na amu oh heme.

¹² Na wan ukka yawalti uɗitteppanu, o wan ukka yau uɗitteppanu amu, na amu oh heme. Aam nodeppan wan, qauko Tabor am aam nodeppa daatte amu, aria aam bedeppan wan, qauko Hermon aam bedeppan daatte amu, appan danab ah ag na ɠagattag oh ele doon, ag na onin humatteb.

¹³ Na ebehin ele! Na eppennab am ɠagattag ele! Nahip ɠagattagppa amu, na kekeɗ eɗadttem.

¹⁴ Nahip ɗo maɗoɗppa danab ah ag genab tutukkuib hak kobol waappa daan, nahip nai doya mala hettoɗia epeɗia elele mettak kobol waappa ele daan oitteb. Ao, na aɗi aɗi hettem amu, amuppa danab ah ag nahip oo mauhaknab kobol, oo metta ii uuak kobol nahip ele miagib anidtteb.

¹⁵ O Yawe, danab ah ag na binan okkai mettaglagnu doon malappig, ag na ele, nahip amahlakppa oitteb amu, ag am itittak ena aoppig daatteb.

¹⁶ Ag na diit enanag anidna doon, ag haen oh amun, tuqan ele nahipnu oolag gamag ahatte. Na genab tutukku hak kobolib dim lamidna hee, danab ah ag enanag dootteb.

¹⁷ Aɗinu? Na am ahilag binag amahlak oppiaawak ele, na ahilag ɠagattag ele daattem. Ao, na ii helom bia me, na ehanittak kobol nahip amu, kobol amuppa na hee, ig ɠagattag daattem.

¹⁸ Aɗinu? Ihinig king, nug ihinig guppiɗ daatte amu, nug Yawenu danab. Yo, ihinig king nug ig Israel, nug ihinig Kayak Oppiaawak Elenu danab.

¹⁹ O Kayak, na haen laa danab ah nahipad, ag nahipnu oo metta ii uuak kobol dim lamidtteb ele amu, na ag tulegleg anttak laa mattame. Tulegleg amuppa na ame. “Da ban danab laa hei, ɠagattag ele daatte. Ao, da nug danab dahilad oolagppan epeɗie hei, king beum.

²⁰ Da dahil maɗi nid Dawit anidmi. Da Kayak, da goɗen dahilnu tituanak daatte, da amu laa awen, goɗen gokkaɗakppa tituanmi.

²¹ Da nug ɠagattag medakkul. Ge, da nug ehanidppi, ɠagattag daakku.

²² Nuhig kekeɗ laa nug ii eɗidma. Ao, nau hak danab laa nug wagai ma, ii eɗidma.

²³ Da nug noobppa nuhig kekeɗ eɗatte oɗoɗadkkulag. Ao, da nuhig kekeɗ amu hadappi nauhkkulag.

²⁴ Dahil oo metta ii uuak kobol, amu oo mauhaknab kobol dahil ele, amu oh am nug ele daakku. Da nug ehanidppi, nug king ba, nug ɠagattagnab daakku.

²⁵ Da wan oh, Mediterenia, yu amuam qaban uɗitteppanu daatte amu, da wan appanu, ukka, Taigris, Yupretis ele, le amuam kaɗag uɗitteppanu daattep amu, da wan aben amu gamagppa daatteb oh medappi, nug wan amu oh dilag king daakku.

²⁶ Nug dahilnu akku. ‘Na am da Mamel. Na am dahil Kayak. Na am dahil kekeɗ niɗamanu ehanittak daattem. Na am dahil padal mepanu ehanittak daattem.’

²⁷ ⌊Nid danab tatamnu ag nid anuqak daan binalag, aulag okkai ele aotteb, amubia⌋ nug nid ⌊danab⌋ naanaeg dahil daakkunu otikkul. Ao, nug wanppa king okkai naɗinab, king laa oh eɗattak daakku.

²⁸ Da nuhignu hanhan oo mauhaknab dookkul. Ao, nug tituana nai qakkak da hei, da nug ele hemuɗ am iitta ii mema.

²⁹ Da geha heppi, nug buɗub oolagppanu laala ag ahilag haen anen anenppa, ag Israel dilag king hanhan bena daaglag. Yo, da geha heppi, hab dayebeb amu, king dayaknu ehah am nug buɗuppudppa hanhan daakku.

³⁰ Amge Dawit bekkod ag dahil ɗo dim lamittak uuna, ag dahil ib, ɗo dahil ippunadtte amu, ag amu ii dim lamidkkulag dayeb,

³¹ ag ɗo da ag mattaminu hamu bia doon ii dim lamidna, dahil haknunab anak ele ii dim lamidkkulag dayeb amu,

³² da ag bu okkai ag hipunin heppignu madakkul. Ao, ag hipunin heppignu, da bu okkai ag madakkul.

³³ Amge da laa nug tituanmi ele amu, da nuhignu oo mauhaknab dahil tuqen ii aopa. Ge, oo metta ii uuak kobol nuhignu da doottem amu, da ii tuqe aopa.

³⁴ Da hei, da nug ele nug tituanɗa, nai qakkamuɗ ele amu, da nai amunu hamu bia doyen, ii tippalpa. Ao, da nai ami amu, da iinab baolipa.

³⁵ Da Kayak, da oppiaawak daattem. Amu da Dawit amegppa keeke laa hekkulnu ainne amu, da dahil oppiaawak dayak dabmein, da amuppa dahil nai amu ɠagattag qettami. Da ami amu, da aakku ami; da baula ii apa. Amu da Dawit ii hambuppuidpa.

³⁶ Da inam ami. ‘Da geha heppi, nug buɗub oolagppanu laala ag ahilag haen anen anenppa, ag Israel dilag king hanhan bena daaglag. Yo, da geha heppi, aam dayebeb amu, king dayaknu ehah am nug buɗuppudppa hanhan daakku.

³⁷ Kalam daatte, amubia king dayaknu ehah amu nuhigppa hanhan daakku. Ao, hab daatte, amubia king dayaknu ehah amu nuhigppa hanhan daakku.’ ” Kayak Nug anam aum. Sila.

³⁸ ⌊O Kayak, na Dawitnu anam ame, amge gemu⌋ na laa nug king daakkunu goɗen gokkaɗakppa tituanak daatte amu, ⌊nug hipunin he,⌋ na nug uume. Na nug dimettame. Na nuhignu oot nauhom.

³⁹ Na hee, nug tituana nai qakkaknu nai na, aria nahip maɗi nid Dawit, na nug ele aa hepiɗ amu, ⌊nai amuam Dawit buɗub dilag ag ena hekkulag dayeb, ag itittak ena aoglagnu nai,⌋ nai amu gemu laa king daatte, nuhigppa ii daatte. Ao, na hee, king haɗ nuhig wanppa na qa dubuttid tak ele niieye, king nug nuhig abenppa ii daatte.

⁴⁰ Na gilil nug talilittak daappig loppaɗe neum. Ao, na ban haknu aben ɠagattag oh, nug aguppa ena daakkunu daappig amu, na aben ɠagattag amu oh loppaɗe, nena qena nauhakib daatteb.

⁴¹ Laa oh ag uɗitteb, ag nuhigppa yab hetteb. Ao, nuhig mudippan laippu ag nuhignu, “Keeke hamunab,” dootteb.

⁴² Na nuhig kekeɗ ele ban hekkulagnu ɠagattag mattae, ag nug eɗidppig. Ao, na hee, nuhikkud kekeɗ ag gamalag ahom.

⁴³ Na hee, nuhig qep elab am nuhig kekeɗ ii yaalattom. Na nug banppa ehanidkkutnu uume.

⁴⁴ Nug am king, amu nug king ɠagattag okkai naɗi ele dayom, amge na nug king abenppan awe, nug baula onig amu ele ii daatte. Ao, na nug king daamanu geɗidna autna aome.

⁴⁵ Nug kaino ii meum, amge na hee, nug kaino meum. Ao, na nug danab ah noolagppa uɗa nak mettame. Sila.

⁴⁶ O Yawe, na nakka na lokkumidttem; amu haen gane laa ele ukkeb, na amu ii hemana? Na hanhan na nakka, na lokkumidkkutte? Nahip oppoɗi bak am aab diditte bia daatte; amu haen gane laa ele ukkeb, nahip oppoɗi bak am anam ii daama?

⁴⁷ Na da, laa oh ele, ig bau dayak ihinig haen elab ii daatte amu, na amunu dabmekkutnu oɗ medattem. Ao, na ig danab ah oh mauhttem amu, na ig dabmegakkutnu unuqidttem!

⁴⁸ Auntai laa bau dayaya, ii mauhma. Ao, auntai laa nug nukka nug heeb, nug moɗppa ii noma. Sila.

⁴⁹ O Naɗi, anukkanu na ihinignu oo mauhaknab doottem, amge gemu kobol amu adeppa daatte? Ao, na oo metta ii uuak kobol dim lamidna, na Dawit amegppa ihinignu oot bodoetta, oot ele mauhkkunu nahip nai ɠagattag qettan ame, amge gemu kobol amu adeppa daatte.

⁵⁰ O Naɗi, na nahip maɗi nid da uɗa nak nau guittak ele doottem amu, na amu dabmekkutnu oɗ medattem! Danab ah ag huana aon aon niɗaegeg, da uug amu oolppa mawe oiyeye, uug nau doottemnu dabmekkutnu unuqidttem.

⁵¹ Yo, O Yawe, nahipad kekeɗ ag king aon aon qedatteb. Ao, ag laa nug na king daakkunu goɗen gokkaɗakppa tituanme ele, ag nug aon aon qettaeg, da, da am king amu, da uug amu oolppa mawadttem.

⁵² Ig Yawe hanhan binag metu! Genab, anam dayaɗ! Genab, anam dayaɗ.