Sam 87 - Nobonob Baibel

Laa nug Jerusalem onig humom

Imuam Kora buɗubnu sam; sam imuam ahi laa.

¹ Aab laa Yawe buuom ele amu, aab amuam qauko nuhignu tituanak daatte, am qauko amuppa daatte.

² Nug aab okkai Sion, aab amuam aab okkai laa oh Israel ooppa daatteb eɗattak amu, nug aab amunu oo mauhtte.

³ Anam amu, danab ah ag Kayaknu aab okkai Sionnu keeke ena ena kuɗumnu atteb. Sila.

⁴ Yawe atte. ⌊“Israel danab ah ag da noolppa dup nona, da binal metteb amunu, da ag onilkad dahil bukppa yaami.⌋ Dimppa, Isip danab ah, Babilon danab ah ele, ⌊ag da noolppa dup nona binal mekkulag amunu,⌋ da ag onilkad, Israel onilkad dahil bukppa yaak daattebppa yaakkul. Yo, dimppa danab ah Pilistianu, Tairnu, amu Kus appanu ele, ⌊ag da noolppa dup nona binal mekkulag. Ag anam heppeg,⌋ da ahilagnu, ‘Imu ag Sion appa menuadppig!’ akkul.” Yawe Nug anam atte.

⁵ Sionnu amu, danab ah ag akkulag. “Danab ah oh appalagnab am aakku.” Amu Laa Attannab Laa Oh Eɗattak Nug heeb, Sion ɠagattag daakku.

⁶ Yawe Nug, aabaab danab ah anen anen onilkad yaakkunu, Nug inam yaakku. “Imu anig nug nug Sion appa menuom.” Sila.

⁷ Danab ah ag ahi ettaladnana, ag akkulag. “Yawe Jerusalem appa daatte, Nugib ig bau dayak megatte!” aon akkulag.