Sam 86 - Nobonob Baibel

Kayak Nug laa ehanidkkunu unuqittak

Dawitnu unuqittak.

¹ O Yawe, da am daɗek, keekenu tutu mak daattem amunu, na dahil unuqittak doon, ehaniɗkkutnu oɗ medattem.

² Da hanhan nahipnu oo metta ii uuak kobol dim lamidttem amunu, na da dabmeɗappe, da ii mauhpanu na oɗ medattem. Ao, na am dahil Kayak, da nahip maɗi nid, da nahipnu oolppa genab doottem; na da ehaniɗppe, da padal ii mepanu na unuqidttem.

³ O Naɗi, da na deɗ oh, amun, tuqan ele na unuqidttem amunu, na dahilnu oot gai-iitta doon oot meɗan ehaniɗkkutnu oɗ medattem.

⁴ Ge, O Naɗi, da, nahip maɗi nid, da na unuqidttem amunu, na heppe, da gamag ahak dookkulnu oɗ medattem.

⁵ Aɗinu? O Naɗi, na am enanag. Na danab ah, ahilag hipunin uhuqna madattem. Nahip oo mauhaknab kobol am amba, leta nette, amu danab ah ag na ⌊ahilag hipunin uhuqna madakkutnu⌋ unuqidtteb amu, na amu dilagnu oo mauhaknab kobol nahip amu dim lamidttem.

⁶ O Yawe, na dahil unuqittak dookkutnu unuqidttem. Ao, da na dahilnu oot gai-iitta doon oot meɗan ehaniɗkkutnu unuqidttem amu, na amu dookkutnu daut humakkutnu oɗ medattem.

⁷ Da unuqidppi amu, na nob mekkut amunu, da uugppa dayeye, da na oninppa ekkul.

⁸ O Naɗi, kayak laa na bia laa iitta. Na danab keeke hekkunu elele iitta hettem, amge ag am anam iitta.

⁹ Naɗi, na danab ah wan ohppan hattame, ag uɗin, na noomppa dup nona binan mekkulag. Ao, ag na onin am binag amahlak oppiaawak ele mettaglag.

¹⁰ Ag amu hekkulagnu diig am, na onin ɠagattag ele, na kobol danab hekkunu elele iitta okkai okkai hettem. Na aakkuib am Kayak.

¹¹ O Yawe, da nahip doyak diig genabib dim lamidkkulnu amu, na nahip ib ippuniɗkkutnu oɗ medattem. Ao, da nahipnu ebehil oh bodoetta le mekkunu na heppe, da na dim lamidkkulnu oo laippu dayak dayeye oikkulnu unuqidttem.

¹² O Naɗi, dahil Kayak, da meul ohppa na amenppa, “Ena hen meɗame,” akkul. Ao, da hanhan na binan mekkul.

¹³ Aɗinu? Na dahilnu oo mauhaknab okkai doon dim lamidttem amunu, na da atognoiɗna, mauhak abenppanu eɗun awiɗe, da ii mauhmi.

¹⁴ O Kayak, beɗuppa tak danab ag da banel uɗitteb. Ao, oo doyak ii doyaya nau hak danab ag da iuppeg mauhkkulnu hetteb. Danab amu ag nahipnu dab-ii-metteb.

¹⁵ Amge O Naɗi, na kayak laa bia iitta; na am Kayak oo bodoetta le mak kobol, oo bodoette enanag maɗoɗ ele hak kobol ele dim lamidttem. Na paha oot ii nauhtte, amu nahip oo mauhaknab kobol, oo metta ii uuak kobol ele am ambeya, letaya nettep.

¹⁶ Na eɗun, ena neekkiɗna, dahilnu oot gai-iitta doon oot meɗan ehaniɗkkutnu oɗ medattem. Da am nahip maɗi nid, da na ɠagattag meɗakkutnu ool daatte. Ao, da am nahip maɗi ah laa bekka. Da padal mepanu ehaniɗkkutnu unuqidttem.

¹⁷ O Yawe, na dahilnu ena doottemnu at daakkunu amu, na ehaniɗkkutnu, oo mak ele meɗakkutnu oɗ medattem. Aɗinu? Na anam hekkut dayeb amu, laa ag dahilnu nau ninig ele dootteb, ag amu anidna, ag uɗa nak dooglag.