Sam 85 - Nobonob Baibel

Kayak danab ah atognoadkkunu unuqittak

Imuam Kora buɗubnu sam; Ag danab kwaia gumattenu yaappig. Am sam laa.

¹ O Yawe, na nahip wannu hena autna aome. Ao, na hee, Israel danab ah ig eɗut ena daattem.

² Na ig danab ah nahipad, na ihinig hipunin uhuqna mekkame. Ao, na eheɗ hak ihinignu oppin mekkame. Sila.

³ Anukka na ihinignu oppoɗin beum, amge gemu amu, na hee, amu iitta meum. Ge, na anukka ihinignu oo nauhak huanaknab doome, amge gemu amu iitta.

⁴ O Kayak, na Padal ii maknu ehanittak ihinig daattem. Na eɗun aigppe, ig na guguittak daagnignu oɗ medattem. Ao, na ihinignu baula oppoɗin bemanu unuqidttem.

⁵ Na ihinignu hanhan oot nauhkkute? Na heppe, nahip oo nauhak am hanhan bodo-ii-ettamate?

⁶ Ig nahipad danab ah, ig nahipnu oonig gamag ahakkunu amu, na baula ɠagattag iqakkutnu oɗ medattem.

⁷ O Yawe, na nahip oo mauhaknab kobol ig ippunigkkutnu oɗ medattem. Ao, na ig ehanigppe, ig padal ii mematanu unuqidttem.

⁸ Amu da Kayak Yawe Nug aɗi atte, da amu dookkulnu daul humakkul. Aɗinu? Nug nuhikkud danab ah, ag nuhignu oo metta ii uuak kobol dim lamidtteb ele, Nug ag maɗoɗ matteb daaglagnu nai ana qagatte, amge ag eɗun, anukkanu Kayak dab-ii-maama hak kobol aib heppig.

⁹ Genab, binag amahlak oppiaawak ele nuhig ihinig wan imuppa daakkunu, Nug danab ah ag nuhignu ebehilag oh bodoetta le mette ele padal ii memananu ehanadtte.

¹⁰ ⌊Qinob, Kayak Nug heeb,⌋ oo mauhaknab kobol, amu oo metta ii uuak kobol ele aa ouqak miagib daaglah. Ge, genab tutukku hak kobol, amu maɗoɗ kobol ele am tamaniya daaglah.

¹¹ Keeke wanppa bette, amubia oo metta ii uuak kobol am baaba, wan oh tonakku. Ao, aam amahala, wan oh amahlak medatte, amubia genab tutukku hak kobol am hab attannu na, wan oh tonakku.

¹² Yawe Nug genab keeke ena ig megakku. Nug mekkebeb, wan ihinigppa ee meu ena ena bekku.

¹³ Yawe Nug uɗia, wan imuppa daakkunu amu, nai awa ukkak danab onig Genab Tutukku Hak Kobol, nug anuqa ukka, ippu babaitteb, Nug dokku.