Sam 84 - Nobonob Baibel

Kayaknu mettid lag, amuppa dayaknu oo haknabnu sam

Imuam Kora buɗubnu sam; ag danab kwaia gumattenu yaappig. Danab laa ag musik haknu keeke muɗi ele qebeppeg, laa ag sam imu ahi ettaglagnu daatte.

¹ O Yawe Nakka Ɠagattag Oh Ele, nahip mettid lag amu enanag, anttaknu ena.

² Da Yawe daatteppa wain daakkulnu ool huanaknab hette. Ao, da ool, meul ohppa ele, da wain Kayak bau daatte ele daagnihnu ool daatte.

³ O Yawe Nakka Ɠagattag Oh Ele, dahil king, dahil Kayak, ai onig sparo, ag ahilkad teɗ bappaidkkulagnu aben anidna aotteb. Ao, ai laa onig swalo, ag nalkad aguppa makkulkkulagnu teɗ bappaidtteb. Ag teɗ hena, aguppa daatteb amu, amubia da nahip qaɗab guguittak daakkulnu ool daatte.

⁴ Laa ag na lautppa daan, ag hanhan ahi ettanna, na binan metteb ele amu, ag itittak ena aoppig daatteb. Sila.

⁵ O Kayak, laa ag nahip-ppan ɠagattag aon, ag na gukkuidna Jerusalem gokkulagnu oolag hette amu, ag itittak ena aoppig daatteb.

⁶ Ag oolnu noak onig Baka appa oinna, uug kuɗum anidtteb amu, Yawe Nug he, aben enanag daye, le kuɗum ele daye, Nug he gu na, le ameg daatteb!

⁷ Ag oitteb haenppa, Yawe Nug ag dabmatta atognoattatta, ɠagattag madette, ag anen anen Sion appa Kayak toppa gotteb.

⁸ O Yawe Kayak Nakka Ɠagattag Oh Ele, na dahil unuqittak dookkutnu oɗ medattem. Ao, O Jakopnu Kayak, na da dooiɗkkutnu unuqidttem. Sila.

⁹ O Kayak, na ihinig king, nug ig atognoigtte ele amu, na nuhig dabmekkutnu oɗ medattem! Ao, na laa na nug king daakkunu goɗen gokkaɗakppa tituanme ele amu, na ii helom bia me, na ehanittak kobol dim lamidna, nuhigppa hekkutnu unuqidttem.

¹⁰ Deɗ laippu na guguitta dayaknu am enanag. Deɗ 1,000 atu laih adekku dayaknu am enanag iitta! Da Kayaknu mettid lag, da amuppa od gumak danab aakkuib daakkul am enanag. Da nau hak danab ele daat, keeke ena ena ele aɗat oignig, amuam eheɗ, am nau.

¹¹ Aɗinu? Yawe Kayak Nug am ihinig amahlak, guppiɗ ele daatte. Nug ii helo bia me, Nug ehanittak kobol dim lamidttatta, Nug binag okkai ele megatte. Yawe Nug danab ah nuhikkud ag nuhig neekkakppa oolagppa kaliak laa iitta ele amu, Nug ag keeke ena ena oh madatte.

¹² O Yawe Nakka Ɠagattag Oh Ele, laa ag nahipnu oolagppa genab dootteb ele, ag am itittak ena aoppig daatteb.