Sam 83 - Nobonob Baibel

Laa nug Kayak ehanatteb, Israel ag ahilkad kekeɗ eɗadna autna aoglagnu unuqittom

Imuam Asapnu sam; am ahi laa.

¹ O Kayak, na hamu daamnanu oɗ medattem. Na, O Kayak, na toettan daanna, ii ehanigkkutnu hemananu unuqidttem!

² Aɗinu? Nahipad kekeɗ ag ahatteb. Ao, nahipad kekeɗ ag ban hekkulagnu ahatteb.

³ Ag nahipad danab ah guittak mattaglagnu lokkumakppa kobol nau haknu maittak aotteb. Ag danab laa nug doɗ aokkunu atognoa auta awa, pelem mette bia hetteb. Ao, ag danab ah nahipad, na danab ah amu dilagnu oot mauhtte ele amu, ag amu dilagnu eheɗ hattaglagnu maittak aon dabmetteb.

⁴ Ag atteb. “Ahappeg, ig hepput, Israel ag nauhna autnanab aoppeg, ahilag wan iitta maɗ! Ao, ahappeg, danab ah laa ag baula Israel wan ii dabmemananu ig hepput, Israel ag nauhna autnanab aweg!” aon atteb.

⁵ Ag amu hekkulagnu amu, ag oh oɗelag ooho, ag amu hekkulagnu atteb. Ao, ag nahip-ppa amu hekkulagnu nai ana qagappig.

⁶ Amu heppig ele amu Edom, Ismael, Moap, Hagri,

⁷ Gebal, Amon, Amalek, Pilistia amu Tair danab ah ele. Ag oh amu heppig.

⁸ Asiria ag ele Amon, Moap ele danab ah ehanadna ouaqappig. Amon, Moap ele, ag am Lot buɗubnu danab ah. Sila.

⁹ O Kayak, amu oh ag eheɗ hekkulagnu atteb amu, na Midian danab ah eɗadme, na amubia eɗadkkutnu oɗ medattem. Ao, na Sisera, amu Jabin ele dilahppa Kison Leppa heme bia hena eɗadkkutnu unuqidttem.

¹⁰ Na Sisera, Jabin ele, amu ahilti daup ele Endor guguittak appa hatte nauheg, ban danab ahilti beɗulag oh amu wanppa kinipan bia niippig.

¹¹ Na heppe, danab eheɗ hekkulagnu atteb amu, ahilkad okkai danab ag Orep Sep ele mauhpiɗ bia mauhkkulagnu oɗ medattem. Ao, na heppe, ahilkad ikki danab ag Seba, Salmuna ele mauhpiɗ bia mauhkkulagnu unuqidttem.

¹² Danab waɗele amu ag appig. “Ahappeg, ig dad Kayaknu amu aot, ig ihinig keeke hetu!” appig.

¹³ O dahil Kayak, na heppe, ag gappud kalu ulah iwale gotte bia daaglagnu oɗ medattem. Ao, na heppe, ag ee aeg dappunkkeg, ulah iwale gotte bia daaglagnu unuqidttem.

¹⁴ Dubuppa aab laippun huan dittieye, ad eotteb, ao, aab pahanab qauko heqo oh ewa gotte,

¹⁵ amubia na Moap, Amon, Ismael aɗi lamadna, ulah ɠagattag, gu ele keeke he nauhtteb bia hadappe nauhkkulagnu oɗ medattem. Ao, ulah ɠagattagnab gu ele uɗiyeye, danab laa baɗa huma qette bia heppe, ag eheɗ nau baɗaglagnu unuqidttem.

¹⁶ O Yawe, danab ag keeke amu nahip kekeɗ dilagppa beeb anidna, ag na anidna dim lamidkkulagnu na mattidkkulagnu amu, na heppe, nahip kekeɗ ag uɗalag naunab nekkunu oɗ medattem.

¹⁷ Na ag eɗadppeg, ag hanhan ag uɗa nak doon, ag oolagppa uug nau qak ele dooglagnu oɗ medattem, Ao, ag uɗa nak naunab nau doon mauhkkulagnu unuqidttem.

¹⁸ O Kayak, na heppe, ag na, na onin am Yawe amu, ag na nakkaib na wan imuppa Kayak Attannab Laa Oh Eɗattak daattem, naib wan imu gumattem amu, ag amu dooglagnu ool daatte.