Sam 82 - Nobonob Baibel

Kayak, Nug okkai laa oh eɗadtte

Imuam Asapnu sam.

¹ Kayak Nug Israel dilag tamaniakppa dayaya, Nug qagmeppig ele dilag okkai daatte. Ao, Nug epeɗiak danab dilagnu nai doya mala hettoɗia epeɗia elele mettak kobol dim lamitta, Nug ag daulag batata, ag amelagppa inam atte.

² “Ag epeɗiak danab, ag danab eheɗ heppignu, ‘Ag eheɗ ii heppig,’ atteb; amu haen gane laa ele ukkeb, ag kobol nau amu ag uuglag? Ao, ag nau hak danab anadna, ag bu aomnanu ehanadtteb; amu haen gane laa ele ukkeb, ag kobol nau amu uuglag? Sila.

³ ⌊Ag tuɗidna, ag hetteb bia aib heppig! Iitta!⌋ Ag laa gai-iitta daatteb, amu nid naunau ag anilkad mamelkad mauhppig ele amu, ag amu dilagnu nai doya mala, hettoɗia, epeɗia elele mettak kobol dim lamidna ehanatteg! Ao, ag danab ah laa ag okkai eppelagppa daaeg, okkai ag eheɗ hadatteb, amu laa ag daɗek ele amu, ag amu oh dilagnu hettoɗiak abenppa kobol tutukkuib hena ehanatteg!

⁴ Danab ɠagattag ele amu ag daɗek, danab ah keeke iitta ele guittak madatteb; ag amu hemananu heppeg uueg! Ao, ag daɗek, danab ah keeke iitta ele amu, ag ag nau hak danab eppelagppan aɗadna diieg!” Kayak Nug anam atte.

⁵ ⌊Epeɗiak danab nau dilagnu amu, Kayak Nug atte⌋. “Ag am keeke laa iinab dootteb. Ag keeke laanu diignu doyak tutukku laa iitta. Ag eheɗ hetteb amunu, wanppan ɗo, wanppan uug mawaknu ukku ele ɠagattag dayaknu elele iitta, keeke oh uɗaltte.

⁶ Da ami. ‘Ag am Kayak ganiappud. Ao, ag am oh Kayak Attannab Laa Oh Eɗattak bekkod daatteb.

⁷ Amge ag oh danab laala mauhkkulag bia mauhkkulag. Ao, ag am danab okkai laa oh nena qetteb bia nena qekkulag.’ ” Kayak Nug anam atte.

⁸ O Kayak, wan imuppan wan anen anen ohnu danab ah ag nahipadnab daatteb amunu, na ahan hippaidna, wannu epeɗiak hekkutnu oɗ medattem.