Sam 81 - Nobonob Baibel

Hobul haknu haenppan ahi

Imuam Asapnu sam; Asap nug danab kwaia gumattenu yom. Danab laa ag musik haknu keeke qebeppeg, laa ag sam imu ahi ettaglagnu daatte.

¹ Ig gamag ahak naɗi doota, ahi ettatta, Kayak binag metu! Nug am ihinig ɠagattag. Ao, ag Jakop buɗub dilag Kayak binag mekkulagnu baalag okkaippa eig!

² Ahi etteg! Tambarin hetteg! Ao, ag laia qenana, harp, baag enanag ele amu, ag amu ele qeig!

³ Kalam bau bette haenppa, ag digmena, hobul hekkulagnu, ag trampet iwaleg! Ao, ig hobul kalam kunum bette haenppa hettem ele amu, haen amuppa ele iwaleg!

⁴ Am ig hobul anam hekkunignu diig am, Kayak Nug ig Israel danab ah, ig anam hekkunignu ɗo amu mekkom. Ao, Jakopnu Kayak Nug ig ɗo amu mekkom.

⁵ Nug ig Israel danab ah ɗo amu mekkom. Ao, Nug Isip bu mattom, haen amuppa Nug mekkom. Ge! Haen ig laa ag nai laa mattieg ig ii doomut ele, haen amuppa Nug ɗo amu ig mekkom.

⁶ Kayak Nug atte. “Da ag gukkalagppan uug amu aɗatte aomi. Ao, da hei, ag baula uɗat uug ele, Isip danab ah ag heeg heppig ele, ag amu baula ii heppig.

⁷ Ag uug nauppa daanna, da unuqiɗeg, da ag ehanatti, ag qagaiettakppa ii daappig. Ao, da lombig hinqakppanu ag unuqiɗppignu nai nob mattami. Ge, Meriba appa amu, da ag ma anttak mattami. Sila.

⁸ O dahilad danab ah, da ag nau aomnanu nai attem imu doyeg! Ao, Israel danab ah, ag dahil nai doolob!

⁹ Ag kayak hambuppuak ahilagppa iinab daakkuoitte. Ao, ag kayak hambuppuak laanu iinab dup nokkulagoitte.

¹⁰ Da, Yawe, ahilag Kayak, da aakkuib ag omalatti, ag Isip uun uɗippig. Ag oɗelag huana aaheppeg, da ag keeke ena ena oɗelagppa inadkkul.

¹¹ Amge iitta, danab ah dahilad ag dahil nai dooglagnu ii heppig. Ao, Israel ag da waalppa daaglagnu uuppig.

¹² Amunu da ag uuatti, ag oɗe dim lamidmananu dabmak ahilag ɠagattag eppe daatteb. Ao, da ag uuatti, ag akka ag aɗi aɗi dooppig amu, ag amuib dim lamidkkulagnu daatteb.

¹³ Amge O gadon! Danab ah dahilad ag genab da dooiɗlob! Ao, Israel ag da ippul dim lamiɗlob,

¹⁴ amu da pahanab ag ehanatte, ahilkad kekeɗ eɗadlom! Gede, da pahanab ahilkad kekeɗ banelag ele golom.

¹⁵ Laa ag Yawe da, dahilnu nau ninig ele dootteb amu, ag baɗan, da noolppa dup nolob. Ao, ahilag bu am iitta ii melo.

¹⁶ Amge da ag Israel danab ah, da ag ee ena ag mattalom. Ao, da ag ee ena ubuhi ele amu, da ag lakkulagnu mattalom.”