Sam 80 - Nobonob Baibel

Israel ag Kayak ehanatteb, ag eɗun ahaglagnu unuqidppig

Imuam Asapnu sam; Asap nug danab kwaia gumattenu yom. Ahi ettaglagnu baag am, “Lili Nug Tituana Nai Qakkaknu”.

¹ O na ig Israel, na ihinig gumitta danab, na sipsip gumitta danab nug sipsip ameg laa diia, laih gotteb bia na ig Israel anuqna gonana omaigttem amu, na ihinig unuqittak imu dookkutnu oɗ medattem. Na sia king nahip-ppa engel okkai-kerubim aɗit dottolah gamalahppa daattem amu, na heppe,

² ig Israel, ig na anidkkunignu unuqidttem. Na heppe, nahip ɠagattag miag atikkunu oɗ medattem. Ao, na dona ehanigppe, ig padal ii mematanu unuqidttem.

³ O Kayak, na eɗun aigppe, ig nagattoppa wakkunignu oɗ medattem. Ao, na ehanigppe, ig ii padal mematanu, na ig ele daagnignu, na oot ihinignu ena daakkunu unuqidttem.

⁴ O Yawe Kayak Nakka Ɠagattag Oh Ele, na nahipad danab ah dilag unuqittaknu oo nauhak doottem; amu haen gane laa ele ukkeb, oo nauhak amu iitta mekku?

⁵ Na hee, ig gayak okkai heutut, ig amenig leb am ihinig ee bia daatte. Ao, na hee, ig gayak okkai heutut, ig amenig leb am le oug lattem, amubia daatte.

⁶ Na danab ah ig guguikkak daatteb ele, na ag uuatte, ag ihinig wan aoglagnu nug qak heegeg, ag ⌊eɗigkkulagnu enanag doon,⌋ ag oolagppa imatteb.

⁷ O Kayak Nakka Ɠagattag Oh Ele, na eɗun aigppe, nagattoppa wakkunignu oɗ medattem. Ao, na ehanigppe, ig padal ii mematanu, na ig ele daagnignu, na oot ihinignu ena daakkunu unuqidttem.

⁸ Anukka na grep muɗi laa Isipnu aon uɗin, na danab laa wan imuppanu lamadna, grep amu wan imuppa eppame.

⁹ Na grep amu ena mekkunu aben qena ooɗitte, grep diɗi wan unuqag ukka, grep muɗi amu nahip wan oh tona malom.

¹⁰ Grep amu okkainab me, qauko ag nug logoppa daappig. Ao, nug eppekkud ag ad sida okkai okkai amu teguadppig.

¹¹ Nug ebekkud ag bahin gona, Mediterenia yuppa teppig. Ag gona, Yupretis leppa ele noppig.

¹² Anam, amge na nuhig aɗ talilittak hak amu loppaɗe ne, gemu amu, aun laa nug ib amu ugakka, nug grep meu mauhnoak aotte. Am anam daatte amu, da na amunu diig appe dookkulnu oɗ medattem.

¹³ Bo dakkuɗ ele ag grep amunu aben heeg nauhtte. Ao, doɗ dakkuɗ ag amunu meu aakku latteb.

¹⁴ O Kayak Nakka Ɠagattag Oh Ele, ig nahipad danab ah, ig grep muɗi amubia daattem amunu, na uɗippe, ig ele daagnignu unuqidttem. Ao, na ig eɗun anigna, ig ele laippu daagnignu, na hab attannu neegppe neeb, ig anigkkutnu oɗ medattem. Ge, na ig, nahip grep muɗi, na ig atognoigkkutnu oɗ medattem.

¹⁵ Nanab, na ig wan imuppa daagnignu, danab grep muɗi ebatte bia wan imuppa meigme. Ao, ig na begapad daagnignu, nahipnu danab ah daagnignu hee bemut.

¹⁶ Ig am nahip danab ah, amge kekeɗ ag ig danab laa nug grep muɗi okkulatte neeg, manatte eoppig bia heikke nauhmut. Ao, na nahipad danab ah alattette, ag mauhtteb.

¹⁷ Ig am danab ah nahipad. Na heppe, ig ɠagattag ele daagnignu oɗ medattem. Ao, ig am na begapad, nahipad danab ah, da na heppe, ig ɠagattag ele daagnignu unuqidttem.

¹⁸ Na anam hekkut dayeb amu, ig na ii dimettamta. Na ig bau dayaknu, na bau ig megappe, ig baula na onin diignig.

¹⁹ O Yawe Kayak Nakka Ɠagattag Oh Ele, na eɗun aigppe, nagattoppa wakkunignu oɗ medattem. Ao, na ehanigppe, ig padal ii mematanu, na ig ele daagnignu, na oot ihinignu ena daakkunu unuqidttem.