Sam 8 - Nobonob Baibel

Yawe onig am enanag

Imuam Dawitnu sam; Dawit nug danab kwaia gumattenu yom. Danab laa ag musik haknu keeke muɗi ele qebeppeg, laa ahi ettaglagnu daatte.

¹ O Yawe, na ihinig Naɗi, danab ah wan atu ohppanu ag na am dagom onin ɠagattag ele dootteb. Ao, nahip binag amahlak oppiaawak ele hab eɗittak daatte.

² Na he, nid naunau, amu nid yuɗ huhppanu ele ag na binan humaglagnu dootteb. Na amu heme, amunu diig am kekeɗ nahipad ag ib iitta ele daaglag. Ao, na amu heme, amunu diig am danab ag akka ag laa nau heppignu nob mattaglagnu hetteb ele amu, ag nai iitta, hamu daaglag.

³ Da na hab heme, na kalam, hoɗoppai keeke ele hattana, abenalagppa maadme ele neekke anatten dabmein dayeye amu, da inam dabmettem.

⁴ ⌊Keeke amu oh am keeke okkainab; aria⌋ danab ah amu, ag am aɗi daatteb amunu, na ag dabmattanna daattem? Ao, danab bekkalkad, ag am aɗi daatteb amunu, na ag atognoadttem?

⁵ ⌊Amunu diig am inam.⌋ Na hab daup nakokib anuqak hattame; danab ah ag ag nakokib waappa daatteb. Na binag amahlak oppiaawak ele, aria dagom onig ɠagattag ele ag mattame.

⁶ Na ag epeɗiadna, keeke oh na hattame atognoadkkulagnu eppelagppa meme. Ao, na ag keeke oh gumadkkulagnu ag eppelagppa meme.

⁷ Amuam sipsip oh, makau oh, doɗ dakkuɗ oh,

⁸ ai hagagaɗna oitteb, kakai yuppanu, amu doɗ laa oh yuppa daanna oitteb ele. Na amu oh ag waalagpa daaglagnu hattame.

⁹ O Yawe, na ihinig Naɗi, danab ah wan atu ohppanu ag na oninnu am enanag dootteb.